পথ দুৰ্ঘটনাই প্ৰাণ ল’লে যুৱ চিকিৎসক শুভজিৎ বৰাৰ, কাৰ্য সম্পাদন কৰি ঘৰলৈ উভতাৰ পথতেই…

এক ভয়ংকৰ পথ দুৰ্ঘটনাই প্ৰাণ ল’লে এজন যুৱ চিকিৎসকৰ। শনিবাৰে বিয়লি চাবুকধৰা ৰাজ্যিক চিকিৎসালয়ত কাৰ্য সম্পাদন কৰি ঘৰলৈ ঘূৰি অহাৰ পথতেই মিকিৰভেটাৰ ওৱাবৰিত দুৰ্ঘটনাতপতিত হয় যুৱ চিকিৎসকগৰাকী। গুৰুতৰভাৱে আহত চিকিৎসক শুভজিৎ বৰাক ঘটনাৰ পাছতেই হাস্পাতালত ভৰ্তি কৰোৱা হয় যদিও তেওঁ দেওবাৰৰ দিনা অকাল মৃত্যুক সাৱতি লয়। এই ঘটনাই সমগ্ৰ মৰিগাঁও অঞ্চলতে শোকৰ ছাঁ পেলাইছে।

জানিব পৰা মতে চিকিৎসকগৰাকীয়ে ঘৰলৈ ঘূৰি অহাৰ পথতেই মটৰ চাইকেল দুৰ্ঘটনা সংঘটিত হয়। গুৰুতৰভাৱে আহত চিকিৎসকগৰাকীক পৰৱৰ্তী সময়ত দিছপুৰ চিকিৎসালয়ত ভৰ্তি কৰোৱা হৈছিল যদিও কালি সন্ধিয়া তেওঁ শেষ নিশ্বাস ত্যাগ কৰে। ২৭ বছৰীয়া যুৱক শুভজিৎ বৰাই ডিব্ৰুগড় চিকিৎসা মহাবিদ্যালয়ৰ পৰা স্নাতক ডিগ্ৰী লাভ কৰি কিছুদিন পূৰ্বে চাবুকধৰা ৰাজ্যিক চিকিৎসালয়ত যোগদান কৰিছিল।

মেধা সম্পন্ন শুভজিৎ বৰাই হাইস্কুল শিক্ষান্ত পৰীক্ষা দি ডিব্ৰুগড় চিকিৎসা মহাবিদ্যালয়ত পঢ়ি থকা অৱস্থাতে পিতৃক হেৰুৱাইছিল। পাছত অশেষ কষ্ট আৰু সাহেসেৰ ভৰি চিকিৎসক হোৱাৰ সপোন পূৰণ কৰিছিল। কিন্তু চিকিৎক হিচাপে যোগদান কৰাৰ কেইদিনমান পাছতেই পৰিয়াললৈ আহিল এই দুখৰ খবৰ। ঠন ধৰি উঠা পৰিয়ালটোক নিষ্ঠুৰ নিয়তিয়ে  নিমিষতে থান বান কৰি পেলালে।