গো-মাংসক লৈ ধুবুৰীত উত্তেজনা! মুখ্যমন্ত্ৰীৰ প্ৰত্যক্ষ নিৰ্দেশৰ পিছত আৰক্ষীৰ টহল, ৩৮ জনক গ্ৰেপ্তাৰ

অসমৰ ভাৰত-বাংলাদেশ সীমান্তৰ ধুবুৰী জিলাত ঈদৰ পিচৰ পৰাই সৃষ্টি হৈছে উত্তেজনাপূৰ্ণ পৰিস্থিতি। যোৱা সপ্তাহত বিশ্বজুৰি ইছলাম ধৰ্মাৱলম্বী লোক সকলে উদযাপন কৰিছিল পবিত্ৰ ঈদ-উদ-জোহা। অসমতো মুছলমানসকলে পালন কৰিছিল এই ঈদ। কিন্তু তাৰ পাছতেই অসমৰ কেতবোৰ স্থানত বিক্ষিপ্ত ঘটনা সংঘটিত হোৱাৰ খবৰ আহে। বিশেষকৈ মন্দিৰৰ চৌহদত গো-মাংস পেলোৱাক কেন্দ্ৰ কৰি অসমৰ ধুবুৰী জিলা উত্তপ্ত হৈ পৰে। বৰাকতো অনুৰূপ এক ঘটনা সংঘটিত হোৱাৰ অভিযোগ উত্থাপন হৈছিল।

ধুবুৰী চহৰত এটা হনুমান মন্দিৰৰ সমীপত গৰুৰ কটা মূৰ উদ্ধাৰ হোৱাৰ পাছতেই পৰিস্থিতি বিঘ্নিত হয়। আইন-শৃংখলাজাতীয় পৰিস্থিতিৰ যাতে উদ্ভৱ নহয়, সেই কথাৰ প্ৰতি লক্ষ্য ৰাখি, আৰক্ষী-প্ৰশাসনে সান্ধ্য আইনো জাৰী কৰিবলগীয়া হয়। ইফালে শুকুৰবাৰে পৰিস্থিতিৰ বুজ ল’বলৈ ধুবুৰীত উপস্থিত হয় অসমৰ মুখ্যমন্ত্ৰী হিমন্ত বিশ্ব শৰ্মা। তেওঁ সমগ্ৰ পৰিস্থিতিৰ বুজ লোৱাৰ লগতে সমাজত বিভেদ সৃষ্টি কৰিব খোজা এনে উপাদানক দেখা মাত্ৰেই গুলীওৱাৰ নিৰ্দেশ দিয়ে আৰক্ষীক। তাৰোপৰি আন কেবাটাও চাঞ্চল্যকৰ অভিযোগ উত্থাপন কৰে হিমন্ত বিশ্ব শৰ্মাই।

ইয়াৰ পাছতেই শুকুৰবাৰে নিশা অসম আৰক্ষীৰ মহাপৰিদৰ্শক (আইন-শৃংখলা) অখিলেশ কুমাৰ সিঙৰ নেতৃত্বত আৰক্ষীৰ দলে ধুবুৰী চহৰত টহল দিয়ে। তাৰ মাজতে আঠখন থানাৰ অধীনৰ কেবাটাও অঞ্চলৰ পৰা মুঠ ৩৮ জন লোকক জামিন-বিহীন ধাৰাত গ্ৰেপ্তাৰ কৰিছে আৰক্ষীয়ে। মুখ্যমন্ত্ৰীয়ে সামাজিক মাধ্যমত পোষ্টযোগে জনাইছে এই কথা।

মুখ্যমন্ত্ৰী শৰ্মাৰ প্ৰত্যক্ষ নিৰ্দেশত ধুবুৰী চহৰত নমোৱা হয় ৰেপিড একশ্যন ফ’ৰ্চ (RAF)। তাৰ পাছতেই এই লোক কেইজনক গ্ৰেপ্তাৰ কৰা হয়। ধুবুৰীৰ ৰাজপথ আৰু আন পথত আৰক্ষী জোৱান আৰু আৰ এ এফৰ জোৱানৰ এক বৃহৎ দলৰ টহল দেখা যায়। চহৰখনৰ বাসিন্দাসকলৰ সুৰক্ষা আৰু নিৰাপত্তা সুনিশ্চিত কৰিবলৈ নিখুঁতভাৱে পহৰা দিয়াৰ ব্যৱস্থা কৰা হৈছে।

বৰ্ধিত সতৰ্কতাই ইতিমধ্যে উল্লেখযোগ্য ফল দিছে। মুখ্যমন্ত্ৰীৰ স্পষ্ট নিৰ্দেশৰ পিছতে সমগ্ৰ জিলাৰ আৰক্ষী থানাসমূহে অপৰাধমূলক কাৰ্যকলাপৰ সৈতে জড়িত ব্যক্তিক গ্ৰেপ্তাৰ কৰাৰ বাবে সক্ৰিয়ভাৱে নামি পৰিছে। এক বৃহৎ অগ্ৰগতি হিচাপে জিলাখনৰ ভিতৰৰ বিভিন্ন থানা এলেকাৰ পৰা মুঠ ৩৮ জন অপৰাধীক গ্ৰেপ্তাৰ কৰা হৈছে বুলি মুখ্যমন্ত্ৰী শৰ্মাই এক পোষ্টত অৱগত কৰে। এই গ্ৰেপ্তাৰসমূহ জামিনহীন ধাৰাত কৰা হৈছে, যিয়ে অভিযোগৰ গুৰুত্বৰ ওপৰত গুৰুত্ব আৰোপ কৰিছে।

কোন কোন থানাত কিমানজন গ্ৰেপ্তাৰ হৈছে-

ধুবুৰী সদৰ থানা: গ্ৰেপ্তাৰ ৪ জন
তামাৰহাট থানা: গ্ৰেপ্তাৰ ৫ জন
আগমনি আৰক্ষী থানা: ১জনক গ্ৰেপ্তাৰ
গৌৰীপুৰ আৰক্ষী থানা: গ্ৰেপ্তাৰ ৭ জন
গোলকগঞ্জ থানা: গ্ৰেপ্তাৰ ৪ জন
বিলাসীপাৰা থানা: ১জনক গ্ৰেপ্তাৰ
চাপৰ থানা: গ্ৰেপ্তাৰ ৩ জন
সাপটগ্ৰাম থানা: গ্ৰেপ্তাৰ ৫ জন

আৰক্ষীয়ে গ্ৰহণ কৰা দ্ৰুত পদক্ষেপৰ লগতে আৰ এ এফৰ কৌশলগত নিয়োগে জিলাখনত অপৰাধৰ প্ৰতি শক্তিশালী প্ৰতিৰোধৰ সংকেত দিছে। ধুবুৰীৰ সকলো নাগৰিকৰ শান্তি আৰু নিৰাপত্তা নিশ্চিত কৰাৰ বাবে চলি থকা প্ৰচেষ্টাৰ অংশ হিচাপে এই অভিযান অব্যাহত থাকিব বুলি কৰ্তৃপক্ষই উল্লেখ কৰিছে।