৬ জনগোষ্ঠী জনজাতিকৰণৰ বিৰুদ্ধে বিটিচিত উত্তাল প্ৰতিবাদ, সচিবালয়ৰ সা-সম্পত্তি ভাঙি লণ্ডভণ্ড

৬ জনগোষ্ঠী জনজাতিকৰণৰ বিৰোধিতাৰে কৰা প্ৰতিবাদত উত্তাল বিটিচি। শনিবাৰে অসম বিধানসভাৰ সদনত ৬ জনগোষ্ঠী জনজাতিকৰণৰ সন্দৰ্ভত মন্ত্ৰীগোটৰ প্ৰতিবেদন দাখিল কৰাৰ পূৰ্বে বড়োলেণ্ড বিশ্ববিদ্যালয়ৰ ছাত্ৰ-ছাত্ৰীয়ে প্ৰতিবাদী কাৰ্যসূচী গ্ৰহণ কৰাৰ খবৰ পোৱা গৈছিল। শেহতীয়া খবৰ অনুসৰি, এই প্ৰতিবাদে ক্ৰমাত উগ্ৰ ৰূপ ধাৰণ কৰে। প্ৰতিবাদনৰ সময়তে বি টি চি সচিবালয়ত প্ৰৱেশ কৰি সচিবালয়ৰ সা-সম্পত্তি ভাঙি লণ্ডভণ্ড কৰে একাংশ প্ৰতিবাদকাৰীয়ে ।

উল্লেখ্য যে, শনিবাৰে সন্ধিয়া বিধানসভাত দাখিল কৰে ৬ জনগোষ্ঠী জনজাতিকৰণৰ মন্ত্ৰীগোটৰ প্ৰতিবেদন। মন্ত্ৰী ৰণোজ পেগুৱে দাখিল কৰে প্ৰতিবেদন। কেন্দ্ৰলৈ প্ৰেৰণ কৰা হ’ব এই প্ৰতিবেদন। যোৱা বুধবাৰে সদনত দাখিল কৰাৰ এই প্ৰতিবেদনত অনুমোদন জনাইছিল ৰাজ্যিক কেবিনেটে।

খবৰ অনুসৰি, বিশ্ববিদ্যালয় চৌহদৰ পৰা ছয় কিলোমিটাৰ দূৰত্বত থকা বড়োলেণ্ড টেৰিটৰিয়েল কাউন্সিলৰ সচিবালয়লৈ ছাত্ৰ-ছাত্ৰীসকলে প্ৰতিবাদী সমদল কৰে। ইয়াৰ পাছতে সচিবালয় সন্মুখত ৬ জনগোষ্ঠী জনজাতিকৰণৰ বিৰোধিতা কৰি উত্তাল প্ৰতিবাদ সাব্যস্ত কৰে ছাত্ৰ-ছাত্ৰীসকলে। ইফালে, একাংশ প্ৰতিবাদকাৰীয়ে বেৰিকেড ভাঙি সচিবালয়ত প্ৰৱেশ কৰি আচবাব ভঙাৰ অভিযোগ উত্থাপন হৈছে।

জানিব পৰা গৈছে, ইতিমধ্যে উক্ত স্থানলৈ অধিক নিৰাপত্তা বাহিনী প্ৰেৰণ কৰা হৈছে যদিও অঞ্চলটোত উত্তেজনা অব্যাহত আছে আৰু পৰিস্থিতি এতিয়াও নিয়ন্ত্ৰণৰ বাহিৰত বুলি জানিব পৰা গৈছে।

ইফালে, বুধবাৰে ৰাজ্যিক কেবিনেটে অসমৰ ৬ জনগোষ্ঠী টাই আহোম, চুতীয়া, মৰাণ, মটক, কোচ-ৰাজবংশী আৰু চাহ জনজাতিক এছ টি মৰ্যাদা প্ৰদানৰ প্ৰস্তাৱ দিয়া মন্ত্ৰী গোটৰ প্ৰতিবেদনত অনুমোদন জনায়। ইয়াক পাছতে বড়োলেণ্ড বিশ্ববিদ্যালয়ৰ ছাত্ৰ-ছাত্ৰীসকলে কেম্পাছত কেবিনেটৰ সিদ্ধান্তৰ প্ৰতিবাদ সাব্যস্ত কৰি তৃতীয় ষান্মাসিকৰ চূড়ান্ত পৰীক্ষা বৰ্জন কৰিছিল।

একেদৰে বৃহস্পতিবাৰে কোকৰাঝাৰ চহৰত সদৌ বড়ো ছাত্ৰ সন্থাৰ লগতে কেইবাটাও জনজাতীয় সংগঠনে সমদল উলিয়ায়। প্ৰতিবাদকাৰীসকলে কয় যে, ৬ জনগোষ্ঠীত এছ টিৰ মৰ্যাদা প্ৰদান কৰিলে বৰ্তমানৰ জনজাতীয় গোটসমূহৰ অধিকাৰ আৰু সাংবিধানিক সুৰক্ষা হ্ৰাস পাব, যাৰ ফলত শৈক্ষিক আৰু কৰ্মসংস্থাপনৰ সুযোগত প্ৰভাৱ পৰিব পাৰে।

শনিবাৰে দিনটোৰ উগ্ৰ প্ৰতিবাদৰ পাছতে প্ৰতিবাদকাৰীক শান্তি আৰু সম্প্ৰীতি বজাই ৰাখিবলৈ আহ্বান জনাইছে এবছুৰ সভাপতি দ্বীপেন বড়োৱে। সামাজিক মাধ্যমৰ জৰিয়তে তেওঁ কয়,”প্ৰতিবাদ অহিংস, গণতান্ত্ৰিক আৰু শান্তিপূৰ্ণ হ’ব লাগে, সকলোকে শান্তি আৰু সম্প্ৰীতি বজাই ৰাখিবলৈ মোৰ বিনম্ৰ অনুৰোধ।

“কোকৰাঝাৰত নিজা উদ্যোগত প্ৰতিবাদ সাব্যস্ত কৰি বিটিচি সচিবালয়ত প্ৰৱেশ কৰা ছাত্ৰ-ছাত্ৰীসকলে পুনৰ নিজৰ ঘৰ আৰু শিক্ষানুষ্ঠানলৈ উভতি আহক। কাৰণ এই সচিবালয় আমাৰ শাসনৰ মন্দিৰ আৰু গণতন্ত্ৰৰ গৌৰৱ। দশক দশক সংগ্ৰামৰ অন্তত আমি শ্বহীদৰ বলিদানেৰে এই প্ৰতিষ্ঠানটো গঢ়ি তুলিছো।” এইদৰে লিখিছে দ্বীপেন বড়োৱে।