কংগ্ৰেছত ভৰি থৈয়েই উজুতি ৰেজাউলৰ, শিৱসাগৰ সম্পৰ্কীয় মন্তব্যৰ বাবে কঠোৰ সকীয়নি মুখ্যমন্ত্ৰীৰ
কংগ্ৰেছত নতুনকৈ যোগ দিয়া ৰেজাউল কৰিম সৰকাৰৰ মন্তব্য সন্দৰ্ভত প্ৰতিক্ৰিয়া প্ৰকাশ কৰিছে মুখ্যমন্ত্ৰী হিমন্ত বিশ্ব শৰ্মায়ো। শিৱসাগৰ সন্দৰ্ভত কংগ্ৰেছৰ নেতাগৰাকীৰ ভাষ্যক “অপমানজনক আৰু উচটনিমূলক” মন্তব্য বুলি অভিহিত কৰি এই বক্তব্যক তীব্ৰ গৰিহণা দিয়ে ।
কংগ্ৰেছত যোগদান কৰিয়েই এক বিস্ফোৰক মন্তব্য কৰিছিল আমছুৰ প্ৰাক্তন সভাপতি ৰেজাউল কৰিম সৰকাৰে। প্ৰদেশ কংগ্ৰেছৰ সভাপতি গৌৰৱ গগৈৰ উপস্থিতিত দেওবাৰে কংগ্ৰেছত যোগদান কৰে প্ৰাক্তন সংখ্যালঘু ছাত্ৰনেতাগৰাকীয়ে। কংগ্ৰেছত যোগদান কৰি দিয়া ভাষণত ৰেজাউল কৰিমে মন্তব্য কৰিছিল যে ধুবুৰীক শিৱসাগৰ আৰু শিৱসাগৰক ধুবুৰী কৰি তোলা হ’ব। তাৰ পাছতেই তীব্ৰ বিতৰ্কৰ সূত্ৰপাত হয় অসমৰ ৰাজনীতিত।
ন-কংগ্ৰেছী নেতাগৰাকীৰ মন্তব্যক ব্যাপক সমালোচনা কৰে বিজেপি নেতাৰ লগতে বিভিন্নজনে। বিধানসভাত বিৰোধীৰ দলপতি তথা কংগ্ৰেছ বিধায়ক দেৱব্ৰত শইকীয়াই ৰেজাউলক ন-কংগ্ৰেছী বুলি উল্লেখ কৰি তেওঁৰ বক্তব্যৰ ওপৰত ভৱিষ্যতে ধ্যান দিবলৈ আহ্বান জনায়। বিতৰ্কৰ মাজতে আজি অৱশ্যে ৰাজহুৱাভাৱে ক্ষমা বিচাৰে ৰেজাউল কৰিম সৰকাৰে।
কংগ্ৰেছত নতুনকৈ যোগ দিয়া ৰেজাউল কৰিম সৰকাৰৰ মন্তব্য সন্দৰ্ভত প্ৰতিক্ৰিয়া প্ৰকাশ কৰিছে মুখ্যমন্ত্ৰী হিমন্ত বিশ্ব শৰ্মায়ো। শিৱসাগৰ সন্দৰ্ভত কংগ্ৰেছৰ নেতাগৰাকীৰ ভাষ্যক “অপমানজনক আৰু উচটনিমূলক” মন্তব্য বুলি অভিহিত কৰি এই বক্তব্যক তীব্ৰ গৰিহণা দিয়ে ।
শিৱসাগৰক “ধুবুৰী”লৈ ৰূপান্তৰিত কৰা হ’ব বুলি কোৱা কথাষাৰৰ প্ৰতিক্ৰিয়া প্ৰকাশ কৰি মুখ্যমন্ত্ৰীয়ে এনে মন্তব্যৰ আঁৰৰ উদ্দেশ্য আৰু কৰ্তৃত্বক লৈ প্ৰশ্ন উত্থাপন কৰে।
“প্ৰশ্ন হ’ল, তথাকথিত বৃহত্তৰ অসমৰ নামত শিৱসাগৰক ধুবুৰীলৈ ৰূপান্তৰিত কৰাৰ কথা ক’বলৈ ৰেজাউল কোন?” বাংলাদেশৰ পৰা পূৰ্বপুৰুষে প্ৰব্ৰজন কৰা কংগ্ৰেছ নেতাৰ এনে মন্তব্য কৰাৰ কোনো নৈতিক অধিকাৰ নাই বুলি উল্লেখ কৰি ডঃ শৰ্মাই কয়। তেওঁ এই বক্তব্যক অহংকাৰৰ চিন বুলি অভিহিত কৰি কয় যে ইয়াৰ দ্বাৰা শিৱসাগৰৰ ঐতিহাসিক আৰু সাংস্কৃতিক পৰিচয়ক হেয়জ্ঞান কৰাৰ ইচ্ছাকৃত প্ৰচেষ্টা প্ৰতিফলিত হৈছে।
মুখ্যমন্ত্ৰীয়ে শিৱসাগৰ কোনো কংগ্ৰেছ নেতাৰ পূৰ্বপুৰুষৰ সম্পত্তি নহয় বুলি দৃঢ়তাৰে কয় আৰু জনসাধাৰণৰ আৱেগক আঘাত কৰিব পৰা দায়িত্বহীন বক্তব্য নকৰিবলৈ সকীয়াই দিয়ে। তেওঁ কয় যে অসমৰ ইতিহাস আৰু ঐতিহ্যত শিৱসাগৰৰ এক অনন্য স্থান আছে আৰু ইয়াক বিভাজনকাৰী ৰাজনৈতিক আখ্যানৰ মাজলৈ টানি অনা উচিত নহয়।
শৰ্মাই কংগ্ৰেছৰ জ্যেষ্ঠ নেতা গৌৰৱ গগৈ আৰু দেৱব্ৰত শইকীয়াক প্ৰশ্ন কৰে যে তেওঁলোকে কিয় “তুষ্টিকৰণৰ ৰাজনীতিত লিপ্ত হৈ আছে,” যিটো তেওঁ ৰহস্যময় আৰু গভীৰভাৱে আমনিদায়ক বুলি অভিহিত কৰে। তেওঁ অভিযোগ কৰে যে এনে ৰাজনীতিয়ে বাৰে বাৰে অসমৰ সামাজিক তন্ত্ৰৰ ক্ষতি কৰিছে।
কংগ্ৰেছ নেতাগৰাকীয়ে শিৱসাগৰক ধুবুৰী কৰিব বুলি প্ৰদান কৰা মন্তব্যক তীব্ৰ সমালোচনা কৰি মুখ্যমন্ত্ৰীয়ে কয় যে এনে তুলনা গ্ৰহণযোগ্য নহয় আৰু ই এক মুকলি প্ৰৰোচনাৰ সমান। তেওঁ লগতে কয় যে ৰাজনৈতিক লাভালাভৰ বাবে ৰাজ্যত আঞ্চলিক বা সাম্প্ৰদায়িক বিভাজন সৃষ্টিৰ কোনো প্ৰচেষ্টা চৰকাৰে সহ্য নকৰে।
