কাজিৰঙাৰ পৰা বহিঃৰাজ্যলৈ কাছ সৰবৰাহ, আমিনগাঁৱৰ পৰা উদ্ধাৰ দুটা বিলুপ্তপ্ৰায় কাছ…

অসমৰ কাজিৰঙা ৰাষ্ট্ৰীয় উদ্যানৰ পৰা ৰাজ্যৰ বাহিৰলৈ সৰবৰাহৰ বাবে লৈ যোৱা দুটা ভাৰতীয় ফ্লেপশ্বেল কাছ উদ্ধাৰ কৰা হৈছে । কামৰূপ জিলাৰ পৰা উদ্ধাৰ কৰা হৈছে এই কাছ দুটা । সূত্ৰৰ খবৰ অনুসৰি, অসম আৰক্ষী আৰু বন বিভাগৰ এটা দলে অভিযান চলাই সোমবাৰে নিশা আমিনগাঁও ঔদ্যোগিক উদ্যানত ৰখাই থোৱা এখন ট্ৰাকৰ পৰা এই বিলুপ্তপ্ৰায় কাছ দুটা উদ্ধাৰ কৰে ।

আৰক্ষীৰ সূত্ৰই সদৰী কৰা মতে, এই কাছ দুটা সৰবৰাহৰ সৈতে জড়িত থকা অপৰাধত দুজন লোকক আটক কৰা হৈছে । মনকৰিবলগীয়া যে, যিখন ট্ৰাকৰ পৰা কাছ দুটা উদ্ধাৰ কৰা হৈছে সেই ট্ৰাকখন ছত্তীশগড়ৰ আছিল । ছত্তীশগড় পঞ্জীয়নভুক্ত ট্ৰাকখনত তালাচী চলাই দুটা ভাৰতীয় ফ্লেপশ্বেল কাছ উদ্ধাৰ কৰা হৈছে ।

সূত্ৰটোৱে জানিবলৈ দিয়া মতে, কাছ দুটা অসমৰ পৰা ছত্তীশগড়লৈ সৰবৰাহ কৰাৰ বাবে পৰিকল্পনা কৰা হৈছিল । আৰক্ষীয়ে আটক লোক দুজনো ছত্তীশগড় ৰাজ্যৰে বুলি জানিব পৰা গৈছে ।

উল্লেখ্য যে, ভাৰতীয় ফ্লেপশ্বেল কাছই জলজ পৰিৱেশ তন্ত্ৰ বজাই ৰখাত গুৰুত্বপূৰ্ণ ভূমিকা পালন কৰে । কিন্তু এই কাছ বিধৰ অবৈধ সৰবৰাহে জৈৱ বৈচিত্ৰ্যৰ প্ৰতি যথেষ্ট ভাবুকি সৃষ্টি কৰিব । সৰবৰাহৰ পূৰ্বে কাছ দুটা উদ্ধাৰ কৰা কাৰ্যই বন্যপ্ৰাণী সৰবৰাহ ৰোধ কৰা আৰু বিলুপ্তপ্ৰায় প্ৰজাতিৰ সুৰক্ষাৰ বাবে অসমত চলি থকা প্ৰচেষ্টাক প্ৰতিফলিত কৰিছে ।

চোৰাং চিকাৰী আৰু বন্যপ্ৰাণী সৰবৰাহকাৰীয়ে এশিঙীয়া গঁড়কে ধৰি চহকী জৈৱ বৈচিত্ৰ্যৰ বাবে পৰিচিত কাজিৰঙা ৰাষ্ট্ৰীয় উদ্যানৰ প্ৰতি নিৰন্তৰ ভাবুকি সৃষ্টি কৰি আহিছে । এই কাণ্ডই ৰাষ্ট্ৰীয় উদ্যানখনৰ বন্যপ্ৰাণীসমূহৰ সুৰক্ষাৰ প্ৰয়োজনীয়তাৰ গুৰুত্বও বৃদ্ধি কৰিছে । সূত্ৰৰ খবৰ অনুসৰি, উদ্ধাৰ কৰা কাছ দুটা পুনৰ সংস্থাপনৰ বাবে বন্যপ্ৰাণী বিষয়াৰ হাতত গতাই দিয়া হ’ব। ইফালে আটক কৰা লোক দুজনৰ বিৰুদ্ধে বন্যপ্ৰাণী সুৰক্ষা আইনৰ অধীনত ব্যৱস্থা গ্ৰহণ কৰা হ’ব বুলি সূত্ৰটোৱে জানিবলৈ দিছে।