বাংলাদেশী মৌলবাদী সংগঠনক যোগান ধৰিছিল ফোন নম্বৰ, আৰক্ষীৰ জালত আলী হুছেইন বেপাৰী

অসমৰ পৰা বাংলাদেশৰ মৌলবাদী সংগঠনলৈ ফোন নম্বৰ যোগানৰ চাঞ্চল্যকৰ খবৰ। মুখ্যমন্ত্ৰী হিমন্ত বিশ্ব শৰ্মাই যোৱা ২৭ আগষ্টত প্ৰকাশ কৰা অনুসৰি মৌলবাদী সংগঠন জামাত-উল-মুজাহিদীন বাংলাদেশলৈ স্থানীয় কেইবাজনো বাসিন্দাৰ ফোন নম্বৰ প্ৰেৰণ কৰাৰ অভিযোগত এজন লোকক গ্ৰেপ্তাৰ কৰা হৈছে।

জেএমবিয়ে ৰাজ্যত অশান্তি সৃষ্টিৰ চেষ্টা চলোৱা বুলি অভিযোগ কৰি মুখ্যমন্ত্রী শৰ্মাই এনেধৰণৰ গোটক সহায় কৰা যিকোনো ব্যক্তিৰ বিৰুদ্ধে কঠোৰ ব্যৱস্থা লোৱা হ’ব বুলি সকীয়াই দিয়ে ৷

গুৱাহাটীত এখন সংবাদমেলত মুখ্যমন্ত্ৰীয়ে কয় যে ধৃত ব্যক্তিজন ভাৰতীয়, জেএমবিলৈ ফোন নম্বৰ যোগান ধৰা মূল যোগসূত্ৰ আৰু তাৰ (জেএমবি) সদস্যসকলে তেতিয়া সেই লোকসকলক সন্ত্ৰাসবাদী হিচাপে প্ৰস্তুত কৰাৰ উদ্দেশ্যেৰে ডায়েল কৰিছিল। আটকাধীন আলী হুছেইন বেপাৰী নামৰ ব্যক্তিজনক পূৰ্বেও আটক কৰা হৈছিল যদিও জামিনত বাহিৰত আছিল বুলি মুখ্যমন্ত্ৰীয়ে জানিবলৈ দিয়ে।

আৰক্ষী তদন্ত অন্তিম পৰ্যায়ত আছে, আৰু অধিক তথ্য শীঘ্ৰেই প্ৰকাশ পোৱাৰ সম্ভাৱনা আছে বুলিও কয় মুখ্যমন্ত্ৰী শৰ্মাই। বাংলাদেশৰ সীমান্তৱৰ্তী ধুবুৰী আৰু দক্ষিণ শালমাৰা জিলাত কঠোৰ সতৰ্কতা অৱলম্বন কৰা হৈছে বুলিও তেওঁ দোহাৰে।

মুখ্যমন্ত্রীয়ে লগতে কয়, “যোৱা পাঁচ বছৰ ধৰি দক্ষিণ শালমাৰা শান্তিপূৰ্ণ হৈ আছে, কিন্তু শেহতীয়াকৈ ধুবুৰীত কেইবাটাও কাৰ্যকলাপ হৈছে। গতিকে, আমি আইন-শৃংখলাৰ পৰিস্থিতিৰ প্ৰতি আশংকাত ভুগি থকাৰ বাবে দুৰ্গা পূজাৰ সময়ত নিশা শ্বুট এট-চাইটৰ নিৰ্দেশ অব্যাহত ৰখাৰ সিদ্ধান্ত লৈছো।”

বাংলাদেশীও ইয়াত থাকিব পাৰে বুলি মন্তব্য কৰাৰ বাবে পৰিকল্পনা আয়োগৰ প্ৰাক্তন সদস্য ছৈয়দা হামিদৰ বিৰুদ্ধে কোনো এফআইআৰ দাখিল কৰা নহয় বুলিও জানিবলৈ দিয়ে মুখ্যমন্ত্ৰীয়ে। “যদি মই এফআইআৰ দাখিল কৰো, তেন্তে তেওঁ দেশৰ বিভিন্ন প্ৰান্তৰ পৰা বৰঙণি সংগ্ৰহ কৰি গোচৰৰ বিৰুদ্ধে যুঁজিব। তেওঁ কেৱল সমৃদ্ধ হ’ব। যদি তেওঁ পুনৰ অসমলৈ আহে, তেন্তে আইন অনুসৰি যি কৰিব লাগিব সেয়া ৰাজ্য চৰকাৰে কৰিব” বুলি মুখ্যমন্ত্রী শৰ্মাই কয় ৷

ডঃ শৰ্মাই আগতেও কৈছিল যে অনুপ্ৰৱেশকাৰীক বৈধতা প্ৰদান কৰি অসমক পাকিস্তানৰ অংশ হিচাপে গঢ়ি তোলাৰ মহম্মদ আলী জিন্নাৰ সপোন বাস্তৱায়িত কৰিবলৈ হামিদৰ দৰে মানুহে বিচাৰে। প্ৰায় চাৰি দশক পূৰ্বে অসম আন্দোলনৰ পিছত কোনো বাংলাদেশীক বিতাড়ন কৰা হোৱা নাই যদিও এতিয়া প্ৰতি সপ্তাহত চৰকাৰে দেশত প্ৰৱেশৰ চেষ্টা কৰা ৭০-১০০ লোকক ওভতাই পঠিওৱা বুলি মুখ্যমন্ত্ৰীয়ে কয়। অসম তথা উত্তৰ-পূৰ্বাঞ্চলক অনুপ্ৰৱেশকাৰীয়ে কৰিড’ৰ হিচাপে ব্যৱহাৰ কৰাটো সত্য বুলিও তেওঁ উল্লেখ কৰে।

ৰাষ্ট্ৰীয় নাগৰিকপঞ্জীৰ সন্দৰ্ভত ডঃ শৰ্মাই অভিযোগ কৰে, “অসমৰ জনসাধাৰণক প্ৰতাৰণা কৰা হৈছে, কাৰণ তালিকাখনত একাংশ সন্দেহজনক লোকৰ অন্তৰ্ভুক্তিৰ সৈতে বহু বিসংগতি আছে।” এই সন্দৰ্ভত গোচৰ উচ্চতম ন্যায়ালয়ত বিচাৰাধীন হৈ আছে বুলিও তেওঁ কয়।

২০১৯ চনৰ ৩১ আগষ্টত প্ৰকাশ পোৱা চূড়ান্ত এন আৰ চিত বাদ পৰিল ১৯,০৬,৬৫৭ গৰাকী আবেদনকাৰী। ৩,৩০,২৭,৬৬১ গৰাকী আবেদনকাৰীৰ ভিতৰত মুঠ ৩,১১,২১,০০৪ গৰাকীৰ নাম অন্তৰ্ভুক্ত কৰা হৈছে। অৱশ্যে ইয়াক এতিয়াও অৱগত কৰা হোৱা নাই।

“কেন্দ্ৰ, উচ্চতম ন্যায়ালয় বা অসম চৰকাৰে যাতে নিজৰ ক্ষমতাৰ ভিতৰতে আইনী কোণ পৰীক্ষা কৰি সমাধান বিচাৰি উলিয়াব পাৰে, সেয়া আমাৰ চূড়ান্ত লক্ষ্য। কিয়নো বৰ্তমানৰ এন আৰ চি আমি মানি ল’ব নোৱাৰোঁ। প্ৰকাশৰ সময়ত আদালতে কৈছিল যে তালিকাখন চূড়ান্ত আৰু সেয়েহে ইয়াক প্ৰকাশ কৰিব পাৰি, তাৰ পিছত ৰাজ্য চৰকাৰে ইয়াক উন্নীত কৰিবলৈ কয়।” সাংবাদিকৰ আগত শৰ্মাই কয়।

ৰাজ্যখনত বেদখলকাৰীক উচ্ছেদ কৰাৰ সন্দৰ্ভত বিদেশী সংবাদ মাধ্যমৰ এটা অংশই প্ৰকাশ কৰা বাতৰি সন্দৰ্ভত মুখ্যমন্ত্ৰীয়ে কয় যে তেওঁলোকৰ প্ৰতি তেওঁৰ কোনো আকৰ্ষণ নাই আৰু “তেওঁলোকৰ কভাৰেজ চোৱা নাই”।

তেওঁ লগতে কয়, “প্ৰধানমন্ত্ৰী নৰেন্দ্ৰ মোদীৰ শাসনত আমি ঔপনিৱেশিক যুগৰ বাহিৰত আছো। আমাৰ বাবে সকলো ৰাষ্ট্ৰীয় বা স্থানীয় সংবাদ মাধ্যম সমান। ইয়াৰ উপৰিও বিদেশী সংবাদ মাধ্যমে আমাক কিমান সময় দিব – হয়তো পাঁচ বা দহ মিনিট আৰু ইয়াৰ কোনো প্ৰভাৱ নপৰে আমাৰ ভোটাৰৰ ওপৰত।”