বিধানসভাৰ অধিৱেশনৰ পৰা হেঙেৰাবাৰীৰ অগ্নিকাণ্ডলৈ…দিনটোৰ শীৰ্ষ খবৰ

আজি ২৯ নৱেম্বৰ, শনিবাৰ। আজি বিধানসভাৰ শীতকালীন অধিৱেশনৰ অন্তিমটো দিন। প্ৰশ্নোত্তৰ শিতানেৰে আৰম্ভ হয় বিধানসভাৰ কাম-কাজ। কাৰ্যসূচীৰ মাজতে সাময়িকভাৱে সদন ত্যাগ কংগ্ৰেছ বিধায়কৰ। মহানগৰীৰ হেঙেৰাবাৰীত ভয়ংকৰ অগ্নিকাণ্ড। অৰুণোদয় পথৰ এটি বাসগৃহত লাগে জুই। জীৱন্তে অগ্নিদগ্ধ ৯৮ বছৰীয়া এজন বৃদ্ধ ।চাওঁ আহক দিনটোৰ ৯ টা শীৰ্ষ খবৰ।

১) আজি বিধানসভাৰ শীতকালীন অধিৱেশনৰ অন্তিমটো দিন। প্ৰশ্নোত্তৰ শিতানেৰে আৰম্ভ হয় বিধানসভাৰ কাম-কাজ। কাৰ্যসূচীৰ মাজতে সাময়িকভাৱে সদন ত্যাগ কংগ্ৰেছ বিধায়কৰ। বিধানসভাৰ মজিয়াত তেজপুৰ বিশ্ববিদ্যালয়ৰ অৱস্থাৰ বিষয়ে আলোচনা কৰাৰ প্ৰস্তাৱ বিৰোধীৰ। আলোচনাৰ অনুমতি নিদিয়াৰ অভিযোগ উত্থাপন কৰি সদন ত্যাগ কৰে কংগ্ৰেছৰ বিধায়কসকলে।

২) মহানগৰীৰ হেঙেৰাবাৰীত ভয়ংকৰ অগ্নিকাণ্ড। অৰুণোদয় পথৰ এটি বাসগৃহত লাগে জুই। জীৱন্তে অগ্নিদগ্ধ ৯৮ বছৰীয়া এজন বৃদ্ধ । মৃত ব্যক্তিজনৰ নাম ধৰ্মেশ্বৰ বনিয়া। এটা ভাড়াঘৰৰ পৰা সূত্ৰপাত হয় এই জুইৰ। জুইত ভস্মীভূত কেইবাখনো বাহন।

৩) নগাঁৱত প্ৰশাসনৰ উচ্ছেদ অভিযান। লুটুমাৰী সংৰক্ষিত বনাঞ্চলত প্ৰশাসনে চলালে উচ্ছেদ। বনবিভাগৰ সূত্ৰৰ পৰা জানিব পৰা মতে বনাঞ্চলখনৰ ৫,৯৬২ বিঘা ভূমিত অবৈধভাৱে বসবাস কৰি অহা প্ৰায় ১৭০০ পৰিয়ালত প্ৰশাসনে চলাব উচ্ছেদ। শেষবাৰৰ বাবে মাইকযোগে জাননী প্ৰেৰণ কৰিছিল বন বিভাগে।

৪) শীতকালীন অধিৱেশনৰ মাজতে চৰকাৰৰ বিৰুদ্ধে পুনৰ বিস্ফোৰক অভিযোগ অখিল গগৈৰ। অখিল গগৈয়ে কয় যে, চৰকাৰে ৮০ জন অভিযুক্তক গুলিয়াই হত্যা কৰিছে। ২২৩ জনক গুলিয়াই আঘাতপ্ৰাপ্ত কৰিছে অসম চৰকাৰে । কিন্তু সিদ্ধাৰ্থ শৰ্মা, শ্যামকানু মহন্তৰ ক্ষেত্ৰত গুলি নচলে। হিমন্ত বিশ্ব শৰ্মাৰ চৰকাৰৰ দিনত গণতন্ত্ৰ নাই বুলি কয় বিধায়কগৰাকীয়ে।

৫) ৬ জনগোষ্ঠীৰ জনজাতিকৰণক লৈ পুনৰ উত্তাল হৈছে ৰাজ্যৰ ৰাজনীতি। ইয়াৰ মাজতে বিধানসভাত ৬ জনগোষ্ঠীৰ জনজাতিকৰণ প্ৰসংগ উত্থাপন কৰিবলৈ সাজু হৈছে অসম চৰকাৰ। তাৰ প্ৰাক ক্ষণত ৬ জনগোষ্ঠীৰ জনজাতিকৰণৰ বিৰোধিতাৰে প্ৰতিবাদত উত্তাল পৰে গুৱাহাটী বিশ্ববিদ্যালয়ৰ চৌহদ। এবছু, টি এম পি কে, ৰাভা ছাত্র সন্থাৰ উদ্যোগত কেইবাটাও জনজাতীয় ছাত্ৰ সংগঠনে বিশ্ববিদ্যালয় চৌহদত যোৱা নিশা ব্যাপক প্রতিবাদী কাৰ্যসূচী ৰূপায়ণ কৰে।

৬) ৪ আৰু ৫ ডিচেম্বৰত দুদিনীয়া ভ্ৰমণসূচীৰে ভাৰতলৈ আহিব পুটিন। আন্তৰ্জাতিক অপৰাধ ন্যায়ালয়ে (ICC) ২০২৩ চনৰ মাৰ্চ মাহত ইউক্ৰেইনত যুদ্ধাপৰাধৰ অভিযোগত পুটিনৰ বিৰুদ্ধে গ্ৰেপ্তাৰৰ পৰোৱানা জাৰি কৰিছিল। অৱশ্যে এই ৱাৰেণ্টৰ মাজতে পুটিন ভাৰতলৈ যাত্ৰা কৰিব। অৱশ্যে ভাৰত আই চি চিৰ পক্ষ নহয়, এই মূল চুক্তিত স্বাক্ষৰ কৰা নাই নতুন দিল্লীয়ে। সেয়ে ভাৰত ইয়াৰ চৰ্তত বান্ধ খাই থকা নাই।

৭) আন এগৰাকী অসম কন্যাৰ সফলতা। অদম্য ইচ্ছাশক্তিৰে জগত জিনিব পাৰি, এই কথা পুনৰ সত্য প্ৰমাণিত কৰিলে নগাঁৱৰ সিমু দাসে । অক্লান্ত পৰিশ্ৰম, দৃঢ় মনোবল আৰু লক্ষ্য প্ৰাপ্তিৰ দিশত কৰা দুৰন্ত যাত্ৰাই ভাৰতীয় দৃষ্টিহীন মহিলা ক্ৰিকেট দলৰ বিশ্বজয়ৰ ইতিহাস ৰচিলে সিমুৱে।

৮) শনিবাৰে বংগৰ দক্ষিণ-পশ্চিম উপসাগৰ, কাৰাইকালৰ পৰা ২২০ কিলোমিটাৰ দক্ষিণ-পূবত আৰু চেন্নাইৰ পৰা ৪৩০ কিলোমিটাৰ দক্ষিণে ডিটৱাহ ঘূৰ্ণীবতাহ আৰু অধিক তীব্ৰতৰ হৈ পৰে। ৩০ নৱেম্বৰৰ আৰম্ভণিতে উত্তৰ তামিলনাডু-পুডুচেৰী-দক্ষিণ অন্ধ্ৰপ্ৰদেশৰ উপকূলৰ ওচৰত উত্তৰ-উত্তৰ-পশ্চিম দিশলৈ গতি কৰিছে ঘূৰ্ণীবতাহে। যাৰ ফলত হাজাৰ হাজাৰ লোকক গৃহহীন হয় শ্ৰীলংকাত। অপাৰেচন সাগৰ বন্ধুৰ অধীনত শ্ৰীলংকালৈ সাহায্য আৰু জৰুৰীকালীন সাহায্য প্ৰেৰণ কৰে ভাৰতে।

৯) অপাৰেচন সেন্দূৰত S-400 এয়াৰ ডিফেন্স চিষ্টেমৰ সফলতাৰ পিছত ৰাছিয়াৰ পৰা প্ৰায় ৩০০টা নতুন ক্ষেপণাস্ত্ৰ ক্ৰয় কৰিবলৈ সাজু হৈছে ভাৰত। এই ক্ৰয়ৰ বাবে ১০ হাজাৰ কোটি টকাৰো অধিক খৰচ হ’ব বুলি অনুমান কৰা হৈছে। প্ৰধানমন্ত্ৰী মোদী আৰু ৰাষ্ট্ৰপতি পুটিনৰ মাজত অনুষ্ঠিত হ’বলগীয়া আগন্তুক শীৰ্ষ সন্মিলনত এই চুক্তি চূড়ান্ত হোৱাৰ সম্ভাৱনা আছে। য’ত ভাৰতে অতিৰিক্ত পাঁচটা S-400 স্ক্ৱাড্ৰনৰ দাবী উত্থাপন কৰিব পাৰে।