প্ৰস্তুতি পৰ্যালোচনা মুখ্য সচিবৰ, বাৰিষাৰ বানৰ সৈতে মোকাবিলা কৰিবলৈ কেনেদৰে সাজু ৰাজ্য চৰকাৰ ?
ৰাজ্যখনৰ মুখ্য সচিবগৰাকীয়ে বাৰিষাৰ পূর্বে বান সমস্যাৰ সৈতে মোকাবিলা কৰাৰ সকলো প্রস্তুতিৰ পর্যালোচনা কৰাৰ লগতে এই সময়ত সকলো বিভাগ আৰু সংস্থাক ঘনিষ্ঠ সমন্বয়ৰে কাম কৰিবলৈ আহ্বান জনাইছে । অনুষ্ঠিত হোৱা পৰ্যালোচনা বৈঠকত বিভিন্ন বিভাগ আৰু কেন্দ্ৰীয় সংস্থাৰ শীৰ্ষ বিষয়াসকল উপস্থিত থাকে।
বাৰিষাৰ বানৰ সৈতে মোকাবিলা কৰিবলৈ সম্পূৰ্ণ হৈছে ৰাজ্য চৰকাৰৰ প্ৰতিটো বিভাগ । উল্লেখ কৰিব লাগিব যে, বান-গৰা খহনীয়া ৰাজ্যখনৰ বাবে এক জলন্ত সমস্যা । প্ৰতিবছৰে বানে ৰাজ্যবাসীৰ বিস্তৰ ক্ষতিসাধন কৰে । শেহতীয়াকৈ এই বছৰ বান সমস্যাৰ সৈতে মোকাবিলা কৰিবলৈ এক পৰ্যালোচনা বৈঠক আয়োজন কৰে অসমৰ মুখ্য সচিব ৰবি কোটাই ।
বৈঠকত ৰাজ্যখনৰ মুখ্য সচিবগৰাকীয়ে বাৰিষাৰ পূর্বে বান সমস্যাৰ সৈতে মোকাবিলা কৰাৰ সকলো প্রস্তুতিৰ পর্যালোচনা কৰাৰ লগতে এই সময়ত সকলো বিভাগ আৰু সংস্থাক ঘনিষ্ঠ সমন্বয়ৰে কাম কৰিবলৈ আহ্বান জনাইছে । শনিবাৰে অনুষ্ঠিত হোৱা পৰ্যালোচনা বৈঠকত বিভিন্ন বিভাগ আৰু কেন্দ্ৰীয় সংস্থাৰ শীৰ্ষ বিষয়াসকল উপস্থিত থাকে। অনলাইন মোডৰ জৰিয়তে জিলা উপায়ুক্তসকলে আলোচনাত অংশগ্ৰহণ কৰে বুলি জানিব পৰা গৈছে ।
বৈঠকত অসম ৰাজ্যিক দুৰ্যোগ ব্যৱস্থাপনা প্ৰাধিকৰণৰ মুখ্য কাৰ্যবাহী বিষয়া জ্ঞানেন্দ্ৰ ডি ত্ৰিপাঠীয়ে ৰাজ্য আৰু জিলা পৰ্যায়ত বিভিন্ন প্ৰস্তুতিৰ ব্যৱস্থাৰ ওপৰত সংস্থাটোৱে গ্ৰহণ কৰা পদক্ষেপসমূহৰ ওপৰত এক বিস্তৃত উপস্থাপন কৰে। তেওঁ কয় যে, বিভিন্ন অংশীদাৰৰ সৈতে সাতখন বিষয়ভিত্তিক বৈঠক আৰু সকলো জিলা দুৰ্যোগ ব্যৱস্থাপনা কৰ্তৃপক্ষৰ সৈতে ভিডিঅ’ কনফাৰেন্স অনুষ্ঠিত কৰি সকলো দিশ পৰ্যালোচনা কৰা হৈছে।
ৰাজ্যৰ মুখ্য সচিবগৰাকীয়ে বানৰ সময়ত এ এছ ডি এম এৰ সৈতে ঘনিষ্ঠ সমন্বয়ৰে কাম কৰি বানৰ ফলপ্ৰসূ ব্যৱস্থাপনাৰ বাবে সকলো বিভাগ আৰু সংস্থাক অনুৰোধ জনায়। বৈঠকৰ সময়ত এন ডি আৰ এফৰ ১ম বেটেলিয়নৰ বিষয়াসকলে কয় যে, ইয়াৰ মুঠ ১৮টা দলৰ ভিতৰত ১৪টা অসমত নিয়োজিত হৈ আছে, যিবোৰ কাছাৰ, বঙাইগাঁও, বৰপেটা আৰু যোৰহাটত প্ৰিপজিচন কৰা হ’ব।
ডিব্ৰুগড়, শিৱসাগৰ, ধেমাজি আৰু শোণিতপুৰ জিলাত এনডিআৰএফৰ দ্বাদশ বেটেলিয়নৰ দল মোতায়েন কৰা হ’ব বুলি তেওঁলোকে জানিবলৈ দিয়ে। অগ্নিনিৰ্বাপক আৰু জৰুৰীকালীন সেৱাৰ বিষয়াসকলে জনোৱা মতে, পৰৱৰ্তী বাৰিষাৰ বাবে ৰাজ্যখনৰ ৫৮টা স্থানত ২৯৯খন সেৱাযোগ্য উদ্ধাৰ নাওৰ সৈতে ৬৩৯ জন এছডিআৰএফৰ কৰ্মী নিয়োজিত কৰা হৈছে।
জিলা আয়ুক্তসকলক স্থানীয় পৰ্যায়ৰ সঁহাৰিদাতা আৰু লোকৰ সামৰ্থ্য বিকাশৰ বাবে তেওঁলোকৰ এলেকাত প্ৰিপজিচন কৰা এনডিআৰএফ দলসমূহৰ সেৱা ব্যৱহাৰ কৰিবলৈ কোৱা হৈছে। জনস্বাস্থ্য কাৰিকৰী বিভাগে বানৰ ফলত ক্ষতিগ্ৰস্ত হ’ব পৰা লোকসকলক বিশুদ্ধ খোৱাপানী যোগান ধৰাত সহায় কৰিব। একে সময়তে কৃষি বিভাগক শস্য বীমা আঁচনিৰ বাবে কৃষকৰ নামভৰ্তিৰ বাবে বিশেষ অভিযান হাতত ল’বলৈ কোৱা হৈছে।
