ৰে’ল দুৰ্ঘটনাত সাতটাকৈ হাতীৰ মৃত্যু, শোক প্ৰকাশৰ লগতে তদন্তৰ নিৰ্দেশ মুখ্যমন্ত্ৰীৰ

অসমৰ মুখ্যমন্ত্ৰী হিমন্ত বিশ্ব শৰ্মাই শনিবাৰে পুৱতি নিশা নগাঁও জিলাৰ কামপুৰত ৰাজধানী এক্সপ্ৰেছৰ খুন্দাত ৭টা হাতীৰ মৃত্যু হোৱা ঘটনাক লৈ গভীৰ শোক প্ৰকাশ কৰে। ছ’চিয়েল মিডিয়াত প্ৰকাশ কৰা এক বিবৃতিত তেওঁ কয় যে বন্যপ্ৰাণী হেৰুৱাই ৰাজ্য চৰকাৰ “গভীৰভাৱে দুখী” আৰু ঘোষণা কৰে যে তেওঁ বন বিভাগক এই ঘটনাৰ বিশদ তদন্ত কৰিবলৈ নিৰ্দেশ দিছে। বিশেষকৈ কম দৃশ্যমানতাৰ বতৰত যেতিয়া এনে দুৰ্ঘটনা সংঘটিত হোৱাৰ সম্ভাৱনা বেছি, তেতিয়া বন্যপ্ৰাণী ক’ৰিডৰৰ সুৰক্ষা ব্যৱস্থা শক্তিশালী কৰাৰ প্ৰয়োজনীয়তাৰ ওপৰতো মুখ্যমন্ত্ৰীয়ে গুৰুত্ব আৰোপ কৰে।

পোষ্টটোত মুখ্যমন্ত্ৰীয়ে লিখিছে- “পুৱতি নিশা সংঘটিত এক দুখজনক ৰে’ল দুৰ্ঘটনাত তিনিটা প্ৰাপ্তবয়স্ক হাতী আৰু চাৰিটা হাতী পোৱালিসহ মুঠ সাতটা হাতীৰ মৃত্যু হোৱাত আমি গভীৰভাৱে শোকাহত হৈছোঁ ৷ এই ঘটনাৰ সম্পূৰ্ণ তদন্ত কৰিবলৈ আৰু বিশেষকৈ ঘন-কুঁৱলীৰ বাবে দূৰলৈ মনিব নোৱৰা সময়ত আমাৰ বন্যপ্ৰাণী চলাচল কৰা পথসমূহ অধিক সুৰক্ষিত কৰাৰ বাবে প্ৰয়োজনীয় পদক্ষেপ গ্ৰহণ কৰিবলৈ মই বন বিভাগক নিৰ্দেশনা প্ৰদান কৰিছোঁ।”

২০ ডিচেম্বৰ শনিবাৰে পুৱতি নিশা অসমৰ নগাঁও জিলাত সংঘটিত হোৱা এক কৰুণ সংঘৰ্ষৰ ফলত ৭টা বন্যহস্তীৰ মৃত্যু ঘটাৰ লগতে তীব্ৰবেগী যাত্ৰীবাহী ৰে’লখন ৰেলপথৰ পৰা নামি যায়, যাৰ ফলত উত্তৰ-পূবৰ উন্নয়ন আৰু সংৰক্ষণৰ মাজৰ ভংগুৰ সংযোগস্থলৰ ওপৰত পুনৰবাৰ প্ৰশ্ন উত্থাপন হয়।

উত্তৰ-পূৱ সীমান্ত ৰে’লৱেৰ লামডিং সংমণ্ডলৰ অন্তৰ্গত যমুনামুখ–কামপুৰ অংশত ছৈৰাং–নতুন দিল্লী ৰাজধানী এক্সপ্ৰেছে ট্ৰেক পাৰ হৈ যোৱা হাতীৰ জাকটোক খুন্দা মাৰে। এই সংঘৰ্ষৰ ফলত ইঞ্জিন আৰু প্ৰিমিয়াম ৰে’লৰ পাঁচটা ডবা ৰেলপথৰ পৰা আঁতৰি যায়। ৰে’ল কৰ্তৃপক্ষই নিশ্চিত কৰিছে যে এই দুৰ্ঘটনাত কোনো যাত্ৰী আহত হোৱা নাই।

স্থানীয় বাসিন্দা আৰু বন বিষয়াৰ মতে, জাকটোত প্ৰাপ্তবয়স্ক আৰু পোৱালিকে ধৰি প্ৰায় আঠটা হাতী আছিল। সাতটা হাতী—তিনিটা প্ৰাপ্তবয়স্ক আৰু চাৰিটা পোৱালি—থিতাতে নিহত হোৱাৰ বিপৰীতে এটা পোৱালি গুৰুতৰভাৱে আঘাতপ্ৰাপ্ত হয়। পোৱালিটোক উদ্ধাৰ কৰি চিকিৎসাৰ বাবে ততাতৈয়াকৈ লৈ যোৱা হয়। গুৱাহাটীৰ পৰা প্ৰায় ১২৬ কিলোমিটাৰ দূৰত্বত অৱস্থিত এই দুৰ্ঘটনাস্থলীত ৰেলপথৰ ওপৰেৰে সঘনাই হাতীয়ে আহ-যাহ কৰে।

এই ঘটনাৰ কিছু সময়ৰ পিছতে দুৰ্ঘটনা সাহায্য ট্ৰেইন, ৰেলৱেৰ জ্যেষ্ঠ বিষয়া আৰু জৰুৰীকালীন সঁহাৰিৰ দলক উদ্ধাৰ অভিযান পৰিচালনা, ধ্বংসাৱশেষ পৰিষ্কাৰ কৰা আৰু ক্ষতিগ্ৰস্ত ট্ৰেক পুনৰুদ্ধাৰ কৰিবলৈ সেই স্থানলৈ প্ৰেৰণ কৰা হয়। বন বিভাগৰ কৰ্মীসকলেও বন্যপ্ৰাণীৰ ক্ষতিৰ পৰিসৰ মূল্যায়ন কৰিবলৈ আৰু আঘাতপ্ৰাপ্ত পোৱালিটোৰ চিকিৎসাত সহায় কৰিবলৈ সেই স্থানত উপস্থিত হয়।

ৰে’লৱেৰ সূত্ৰই জনোৱা মতে, হাতীৰ মৃতদেহ, ক্ষতিগ্ৰস্ত ডবা, ৰেলপথত সিঁচৰতি হৈ থকা ধ্বংসাৱশেষৰ বাবে ৰে’ল সেৱাত ব্যাঘাত জন্মে, যাৰ ফলত উজনি অসমৰ লগতে উত্তৰ-পূবৰ কেইবাটাও গন্তব্যস্থানৰ সংযোগৰ ক্ষেত্ৰত গুৰুতৰ প্ৰভাৱ পৰে। কেইবাঘণ্টা ধৰি পুনৰুদ্ধাৰৰ কাম অব্যাহত থাকে, কাৰণ বিষয়াসকলে ৰে’ল যাতায়ত স্বাভাৱিক কৰাৰ কাম কৰিছিল।

ক্ষতিগ্ৰস্ত ৰাজধানী এক্সপ্ৰেছত যাত্ৰা কৰা যাত্ৰীসকলক অস্থায়ীভাৱে অন্যান্য ডবাত খালী বাৰ্থত ৰখা হৈছিল। ৰে’ল বিভাগৰ বিষয়াসকলে জনোৱা মতে, ৰে’লখন গুৱাহাটী পোৱাৰ পিছত ৰে’লখন নতুন দিল্লীলৈ পুনৰ আগুৱাই যোৱাৰ পূর্বে সকলো যাত্রীক আৰামদায়কভাৱে থকাৰ ব্যৱস্থা কৰাটো নিশ্চিত কৰিবলৈ অতিৰিক্ত ডবা সংলগ্ন কৰা হ’ব ৷

এই ঘটনাই অসমত ৰে’লপথৰ কাষত হাতীৰ মৃত্যুৰ ঘটনাক লৈ পুনৰ উদ্বেগৰ সৃষ্টি কৰিছে, য’ত জটিল বন্যপ্ৰাণী কৰিড’ৰসমূহৰ মাজেৰে ব্যস্ত ৰে’লপথ পাৰ হৈ যায়। সংৰক্ষণবিদসকলে বাৰে বাৰে এনে ট্ৰেজেডী ৰোধ কৰিবলৈ গতি নিষেধাজ্ঞা, উন্নত সতৰ্কবাণী ব্যৱস্থা, ৰেলৱে আৰু বন কৰ্তৃপক্ষৰ মাজত উন্নত সমন্বয়ৰ আহ্বান জনাই আহিছে।