শেহতীয়া খবৰঅসমভাৰতমনোৰঞ্জনব্যৱসায়শিক্ষাখেলজীৱনশৈলীবিশ্বপ্ৰযুক্তিৱেব ষ্ট'ৰীফটোVideos

হ্ৰাস পাইছে উগ্ৰপন্থীৰ কাৰ্যকলাপ, অসমৰ থানাসমূহক অধিক জনকেন্দ্ৰিক কৰি তোলাৰ প্ৰয়োজন: হিমন্ত বিশ্ব শৰ্মা

উগ্ৰপন্থীৰে জড়িত কাৰ্যকলাপ হ্ৰাস পোৱা বুলি দাবী কৰি অসমৰ থানা সমূহ অধিক জনকেন্দ্ৰিক পৰ্যায়লৈ ৰূপান্তৰ কৰাৰ ওপৰত গুৰুত্ব আৰোপ কৰিছে অসমৰ মুখ্যমন্ত্ৰী হিমন্ত বিশ্ব শৰ্মাই । ইয়াৰ লগতে মুখ্যমন্ত্ৰী শৰ্মাই জনসেৱাৰ দায়িত্বত থকা আৰক্ষীক সহায় কৰাৰ ক্ষেত্ৰত ‘নগৰিক সমিতি’ৰ ভূমিকাৰ ওপৰতো গুৰুত্ব আৰোপ কৰে ।

হ্ৰাস পাইছে উগ্ৰপন্থীৰ কাৰ্যকলাপ, অসমৰ থানাসমূহক অধিক জনকেন্দ্ৰিক কৰি তোলাৰ প্ৰয়োজন: হিমন্ত বিশ্ব শৰ্মা
অসমৰ মুখ্যমন্ত্ৰী হিমন্ত বিশ্ব শৰ্মা
manas-borah
Manas Borah | Updated On: 07 Sep 2024 17:09 PM

ৰাজ্যত উগ্ৰপন্থীৰে জড়িত কাৰ্যকলাপ হ্ৰাস পোৱা বুলি দাবী কৰি অসমৰ থানা সমূহ অধিক জনকেন্দ্ৰিক পৰ্যায়লৈ ৰূপান্তৰ কৰাৰ ওপৰত গুৰুত্ব আৰোপ কৰিছে অসমৰ মুখ্যমন্ত্ৰী হিমন্ত বিশ্ব শৰ্মাই । ইয়াৰ লগতে মুখ্যমন্ত্ৰী শৰ্মাই জনসেৱাৰ দায়িত্বত থকা আৰক্ষীক সহায় কৰাৰ ক্ষেত্ৰত ‘নগৰিক সমিতি’ৰ ভূমিকাৰ ওপৰতো গুৰুত্ব আৰোপ কৰে ।

তেওঁ কয়, “যোৱা তিনিটা দশক ধৰি অসমে বিদ্ৰোহৰ বিৰুদ্ধে যুঁজি আছিল। বিদ্ৰোহ ৰোধ কৰাৰ বাবে ব্যৱস্থা গ্ৰহণ কৰাটোৱেই অসম আৰক্ষীৰ মূল লক্ষ্য আছিল । কিন্তু বিদ্ৰোহ সম্পূৰ্ণৰূপে নাইকীয়া হোৱা বুলি নকওঁ, কিন্তু বিদ্ৰোহী সংগঠনৰ কাৰ্যকলাপ হ্ৰাস পাইছে। গতিকে এই সময়তে থানাসমূহক অধিক জনকেন্দ্ৰিক পৰ্যায়লৈ ৰূপান্তৰিত কৰিব লাগিব।’ ৰাজ্যৰ ৩০৭খন থানাৰ ‘নগৰিক সমিতি’ৰ প্ৰথমখন ৰাজ্যিক পৰ্যায়ৰ সন্মিলনত এই মন্তব্য প্ৰকাশ কৰিছে মুখ্যমন্ত্ৰী শৰ্মাই ।

নাগাৰিক সমিতিৰ ভূমিকাই আৰক্ষীৰ মানসিক চাপ লাঘৱ কৰে

মুখ্যমন্ত্ৰী শৰ্মাই লগতে কয় যে, আৰক্ষী জোৱানসকলৰ কৰ্তব্যৰ দীঘলীয়া আৰু কঠিন প্ৰকৃতিয়ে তেওঁলোকৰ মনটোক কঠিন কৰি তুলিব পাৰে । কিন্তু আৰক্ষীৰ জোৱান সকলে অসামৰিক কামত জড়িত থকাৰ সময়ত নাগাৰিক সমিতিৰ ভূমিকাই তেওঁলোকৰ মানসিক চাপ লাঘৱ কৰিব পাৰে বুলি মন্তব্য প্ৰকাশ কৰে মুখ্যমন্ত্ৰী শৰ্মাই ।

সমাজত সৃষ্টি হোৱা ইতিবাচক মানসিকতাই স্থায়ী সামাজিক পৰিৱৰ্তনক ভালৰ দিশত আগুৱাই নিব পাৰে বুলিও মন্তব্য প্ৰকাশ কৰে মুখ্যমন্ত্ৰী শৰ্মাই । শৰ্মাই লগতে কয়, সমিতিসমূহে আৰক্ষী বাহিনীক তেওঁলোকৰ ওপৰত ন্যস্ত কৰা জনসেৱাৰ দায়িত্ব পালন কৰাত সহায় কৰিব পাৰে। লগতে সমিতিসমূহে থানা আৰু জনসাধাৰণৰ মাজত ভাল সম্পৰ্ক বজাই ৰাখিব লাগিব বুলিও উল্লেখ কৰে মুখ্য়মন্ত্ৰী শৰ্মাই ।

মুখ্যমন্ত্ৰীগৰাকীয়ে আঙুলিয়াই দিয়ে যে, থানাসমূহে মেলা, উৎসৱ পাতিবলৈ অনুমতি দিয়া, নিজৰ অধীনস্থ বাসিন্দাসকলক বিভিন্ন প্ৰমাণপত্ৰ প্ৰদান কৰা আদি অসংখ্য দায়িত্বৰ সৈতে মোকাবিলা কৰে আৰু এনে সেৱাৰ ক্ষেত্ৰত সমিতিসমূহে ইতিবাচক ভূমিকা গ্ৰহণ কৰিব পাৰে।

অপৰাধ হ্ৰাস পাইছে

মুখ্যমন্ত্ৰী শৰ্মাই পুনৰ দাবী কৰে যে,‘অপৰাধৰ হাৰ কমি আহিছে। ফৰেনছিকৰ প্ৰয়োজন নোহোৱা বিষয়বোৰত চাৰ্জশ্বীট সময়সীমাৰ ভিতৰত দাখিল কৰা হৈছে। আমি আমাৰ ফৰেনছিক বিজ্ঞান শাখাও উন্নত কৰিছো, যাতে এনে গোচৰৰ চাৰ্জশ্বীট তিনি মাহৰ ভিতৰত দাখিল কৰিব পৰা যায়।’ অক্টোবৰৰ পৰা নতুন সমিতিৰ কাম আৰম্ভ হ’ব বুলি উল্লেখ কৰি মুখ্যমন্ত্ৰী শৰ্মাই আশা প্ৰকাশ কৰে যে, ১২ জনীয়া সমিতিসমূহে জনসাধাৰণ আৰু আৰক্ষীৰ মাজত সেতু হিচাপে কাম কৰাৰ ক্ষেত্ৰত গুৰুত্বপূৰ্ণ ভূমিকা পালন কৰিব।