‘নতুন আজমল’ৰ সন্ধানত ষড়যন্ত্ৰত নামিছে হিমন্ত বিশ্ব শৰ্মা! দাবী ভূপেন বৰাৰ

গাদী হেৰোৱাৰ ভয়ত ৰাজ্য উত্তেজিত কৰি ৰাখিছে মুখ্যমন্ত্ৰী হিমন্ত বিশ্ব শৰ্মাই। গত লোকসভা নিৰ্বাচনৰ ফলাফলৰ পিছত অসমত বিৰোধী ঐক্যমঞ্চ আৰু কংগ্ৰেছে লাভ কৰা ভোটৰ পৰ্যালোচনা কৰি মুখ্যমন্ত্ৰীগৰাকী কংগ্ৰেছ তথা বিৰোধীৰ জনপ্ৰিয়তাৰ গ্ৰাফ উৰ্ধমুখী হৈছে বুলি নিশ্চিত হৈছে। বিজেপি আৰু তেওঁলোকৰ সহযোগী দলসমূহৰ প্ৰতি জনসাধাৰণৰ আস্থা কমি অহা বিষয়টো অনুধাৱন কৰিয়েই মুখ্যমন্ত্ৰীয়ে অসমক অস্থিৰ কৰি ৰাখিবৰ বাবে অপচেষ্টা আৰম্ভ কৰিছে। ৰাজ্যৰ মুখ্যমন্ত্ৰী হিমন্ত বিশ্ব শৰ্মাৰ বিৰুদ্ধে এই অভিযোগ তুলিছে অসম প্ৰদেশ কংগ্ৰেছৰ সভাপতি ভূপেন বৰাই।

আজি নতুন দিল্লীত এক সংবাদমেলত প্ৰদেশ কংগ্ৰেছৰ সভাপতিগৰাকীয়ে হিমন্ত বিশ্ব শৰ্মাৰ বিৰুদ্ধে আন কেতবোৰ বিস্ফোৰক অভিযোগ উত্থাপন কৰে। ভূপেন বৰাৰ অভিযোগ, মুখ্যমন্ত্ৰী হিমন্ত বিশ্ব শৰ্মা আৰু তেওঁৰ পত্নীৰ বৈধ-অবৈধ সম্পত্তি বৃদ্ধিৰ বিষয়টো মানুহৰ মুখে মুখে চৰ্চা হোৱাৰ লগে লগে তেওঁৰ অস্থিৰতা বৃদ্ধি পাইছে আৰু চৰকাৰ পৰিচালনাত সমস্যাৰ সন্মুখীন হৈছে।

ডাবোল ইঞ্জিন চৰকাৰ বুলি কৈ মুখ্যমন্ত্ৰীয়ে প্ৰতি মাহে কৰ্মচাৰীৰ দৰমহাৰ বাবে ঋণ ল’বলগীয়া হৈছে বুলিও ভূপেন বৰাই কটাক্ষ কৰে। এফালে টোলগেটৰ পৰা সাধাৰণ ৰাইজক দৈনিক শোষণ অব্যাহত ৰাখিছে আৰু এতিয়া স্মাৰ্ট মিটাৰৰ যোগেদি লুণ্ঠন চলোৱা হৈছে বুলি উল্লেখ কৰি ভূপেন বৰাই লগতে এনে কাৰণত মানুহৰ অসন্তুষ্টি বৃদ্ধি পাইছে বুলি দাবী কৰে। ইফালে বদৰুদ্দিন আজমলৰ পৰাজয়ত মুখ্যমন্ত্ৰী এতিয়া হতাশ হৈ পৰিছে বুলিও অভিযোগ কৰে  অসম কংগ্ৰেছৰ সভাপতিগৰাকীয়ে।

ভূপেন বৰাৰ দাবী, সাম্প্ৰদায়িক ৰাজনীতিৰ অন্যতম হোতা এআইইউডিএফ আৰু বদৰুদ্দিন আজমল নিঃশ্চিহ্ন হোৱাৰ পিছত মুখ্যমন্ত্ৰী আৰু বিজেপি দলৰ লগতে আৰএছএছে নতুনকৈ আজমলৰ দৰে ৰাজনৈতিক নেতা সৃষ্টি কৰাৰ গোপন ষড়যন্ত্ৰ অব্যাহত ৰাখিছে। এআইইউডিএফক লৈ সাম্প্ৰদায়িক ৰাজনীতিৰে বিজেপিয়ে নিজৰ লাভালাভ অব্যাহত ৰখাৰ পিছত মুখ্যমন্ত্ৰীয়ে শেহতীয়া ৰাজনৈতিক পৰিস্থিতি পৰ্যবেক্ষণ কৰি পুনৰ ধৰ্মীয় মেৰুকৰণৰ অংক কৰিছে বুলি তেওঁ লগতে দাবী কৰে।

এই উদ্দেশ্যেই গুৱাহাটী বিশ্ববিদ্যালয়ৰ শিক্ষকৰ পৰা আৰম্ভ কৰি সাংবাদিকলৈকে মুখ্যমন্ত্ৰীয়ে লক্ষ্য কৰি লৈছে বুলি অভিযোগ কৰি ভূপেন বৰাই লগতে মুখ্যমন্ত্ৰীৰ এই জাল ফালি ২০২৬ত কংগ্ৰেছৰ নেতৃত্বত বিৰোধী ঐক্যমঞ্চই চৰকাৰ গঠন কৰিব বুলিও দাবী কৰে। মুখ্যমন্ত্ৰীয়ে দাবী-ধমকি, বিভাজনৰ ৰাজনীতিৰে ক্ষমতা দখলৰ বাবে যি অপচেষ্টা চলাইছে তাত কংগ্ৰেছ দলৰ নেতা-কৰ্মীয়ে জ্ঞাতে-অজ্ঞাতে সোমাই পৰিছে নেকি সেই বিষয়টো কংগ্ৰেছৰ কেন্দ্ৰীয় নেতৃত্বই নজৰত ৰাখিছে বুলিও তাৎপৰ্যপূৰ্ণ মন্তব্য কৰে বৰাই।

তেওঁ লগতে কয় মুখ্যমন্ত্ৰীয়ে সংবিধানৰ নামত শপত লৈ মুখ্যমন্ত্ৰী পদৰ গৰিমা নোহোৱা কৰিছে আৰু ভ্ৰষ্টাচাৰৰ চূড়ান্ত সীমা পাৰ হৈ লক্ষ্মণ ৰেখা পাৰ কৰিছে। সোঁৱে-বাঁৱে কৰা সম্পত্তি উইল কৰিম বুলি কৈ মুখ্যমন্ত্ৰীয়ে বিষয়টো সলনি কৰিবলৈ নতুন নেৰেটিভ সৃষ্টি কৰা কেতবোৰ স্তাৱকবাহিনী পোহপাল দিছে। যাৰ বাবে ক্ষমতাই এতিয়া মুখ্যমন্ত্ৰীৰ লক্ষ্য হৈ পৰিছে। কিন্তু ৰাইজ এতিয়া সচেতন হৈছে আৰু বিষয়টো পৰ্যালোচনা কৰি আছে বুলি ভূপেন বৰাই লগতে কয়।

ৰাজ্যখনৰ অৰ্থনৈতিক পয়ালগা অৱস্থা লুকুৱাবৰ বাবে ধৰ্মৰ ভিত্তিত উত্তেজনা সৃষ্টিৰে হিমন্ত বিশ্ব শৰ্মাই মানুহৰ দৃষ্টি মূল বিষয়সমূহৰ পৰা আঁতৰাব বিচাৰিছে বুলি বৰাই অভিযোগ কৰে। ২০২১ চনৰ মাৰ্চ মাহৰ ভিতৰত ১ লাখ চাকৰি দিম বুলি ঘোষণা কৰা মুখ্যমন্ত্ৰীয়ে এতিয়ালৈকে সেই প্ৰতিশ্ৰুতি পূৰণ কৰিব নোৱাৰিলে। ভূপেন বৰাৰ দাবী, অসমৰ বুনিয়াদী সমস্যাসমূহ সমাধানৰ বিষয়ে আলোচনা নকৰা মুখ্যমন্ত্ৰীয়ে নতুন আজমলৰ সন্ধানত নামি পৰিছে।

দাড়ি, টুপি, লুঙী পিন্ধা মানুহ মুখ্যমন্ত্ৰী হ’ব জাতীয় এক শংকা সৃষ্টি কৰিবৰ বাবে মুখ্যমন্ত্ৰীয়ে অপচেষ্টা অব্যাহত ৰখা বুলিও তেওঁ ব্যাখ্যা আগবঢ়ায় আৰু নিখিল ভাৰত কংগ্ৰেছ কমিটিয়ে বিষয়টো তীক্ষ্ণ নজৰত ৰাখিছে বুলিও সদৰী কৰে। কংগ্ৰেছৰ ভিতৰচ’ৰাত মানুহ ৰাখি ২০২৬ত আহিবলগীয়া চৰকাৰ ভাঙি নিজে ক্ষমতা লাভ কৰিবৰ বাবে চক্ৰবেহু ৰচনা কৰাৰ অভিযোগ কৰি বৰাই কয় যে কংগ্ৰেছে হিমন্ত বিশ্ব শৰ্মাৰ ষড়যন্ত্ৰ জাল ফালি ৰাইজক সকাহ দিবলৈ চৰকাৰ গঠন কৰাতো নিশ্চিত।

তেওঁ হিমন্ত বিশ্ব শৰ্মাক সকিয়নী দি আহি থকা দিনত অসমৰ ৰাইজে তেওঁক ক্ষমতাচ্যুত কৰিব বুলি মন্তব্য কৰে আৰু নিজৰ বিৰুদ্ধে চিবিআই, ইডিত ইতিপূৰ্বে ৰুজু হৈ থকা গোচৰসমূহৰ মুখামুখি কিদৰে হ’ব সেই লৈ সাজু হ’ব লাগে বুলি কটাক্ষ কৰে। বৰাই অসমৰ ৰাইজক বৰ্তমান পৰিস্থিতিত শান্তি-সম্প্ৰীতি অব্যাহত ৰাখিবলৈ আহ্বান জনায় আৰু ৰাজ্যখনক অস্থিৰ কৰিব খোজা শক্তিসমূহক বিৰোধী দলসমূহে চিনাক্ত কৰি এই অপশক্তিক নিয়ন্ত্ৰণ কৰিবৰ কাৰণে ঐক্যৱদ্ধ প্ৰচেষ্টা ল’বলৈ আহ্বান জনায়।