আনুষ্ঠানিকভাৱে ৰাজ্যসভাৰ সদস্য হিচাপে শপত ল’লে মিছন ৰঞ্জন দাসে

ৰাজ্যসভাৰ সদস্য হিচাপে আনুষ্ঠানিকভাৱে শপত গ্ৰহণ কৰিলে অসমৰ বিজেপি নেতা মিছন ৰঞ্জন দাসে । ১০ ছেপ্টেম্বৰ মঙলবাৰে সংসদ ভৱনত অনুষ্ঠিত এক অনুষ্ঠানত ৰাজ্যসভাৰ সদস্য হিচাপে শপত গ্ৰহণ কৰে মিছন ৰঞ্জন দাসে । তেওঁক শপত বাক্য পাঠ কৰোৱাই ৰাজ্যসভাৰ অধ্যক্ষ তথা ভাৰতৰ উপ-ৰাষ্ট্ৰপতি জগদীপ ধনখড়ৰে। কৰিমগঞ্জৰ অভিজ্ঞ ৰাজনীতিবিদ তথা প্ৰাক্তন বিধায়ক দাস বৰ্তমান অসম ৰাজ্যিক পৰিবহণ নিগমৰ অধ্যক্ষ পদত অধিষ্ঠিত হৈ আছে।

মিছন ৰঞ্জন দাসৰ সমান্তৰালকৈ ত্ৰিপুৰা বিজেপিৰ সভাপতি ৰাজীৱ ভট্টাচাৰ্যয়েও ৰাজ্যসভাৰ নৱনিৰ্বাচিত সদস্য হিচাপে শপত গ্ৰহণ কৰে। শপত গ্ৰহণ কৰাৰ সময়ত উপ-ৰাষ্ট্ৰপতি গৰাকীয়ে সদস্যসকলক অনুষ্ঠানটোৰ সাংবিধানিক তাৎপৰ্যৰ কথা সোঁৱৰাই দিয়ে। তেওঁ সংবিধানৰ ৯৯ নং অনুচ্ছেদৰ অধীনত নিৰ্ধাৰিত ফৰ্মেট মানি চলাৰ ওপৰত গুৰুত্ব আৰোপ কৰে ।

Hon’ble Vice-President of India and Chairman, Rajya Sabha, Shri Jagdeep Dhankhar administered oath to the elected Members of Rajya Sabha, Shri Mission Ranjan Das ji and Shri Rajib Bhattacharjee ji, in Parliament House today.

“Hon’ble Members, Oath or Affirmation is a… pic.twitter.com/MbloaPh0uh

— Vice-President of India (@VPIndia) September 10, 2024

উল্লেখ্য যে, অসমৰ পৰা বিনা প্ৰতিদ্বন্দ্বিতাৰে ৰাজ্যসভালৈ নিৰ্বাচিত হৈছিল বিজেপিৰ প্ৰাৰ্থী ৰামেশ্বৰ তেলী আৰু মিছন ৰঞ্জন দাস । ডিব্ৰুগড় আৰু কাজিৰঙা সংসদীয় সমষ্টিৰ পৰা ক্ৰমে সৰ্বানন্দ সোণোৱাল আৰু কামাখ্যা প্ৰসাদ তাছা লোকসভালৈ নিৰ্বাচিত হোৱাৰ লগে লগে ৰাজ্যসভাত অসমৰ দুখন আসন খালী হৈ পৰে । এই দুয়োখন আসনৰ বাবে শাসকীয় বিজেপিয়ে প্ৰাৰ্থী প্ৰক্ষেপ কৰিছিল যদিও বিৰোধী দলসমূহে প্ৰাৰ্থী প্ৰক্ষেপ কৰা নাছিল।

ৰামেশ্বৰ তেলী আৰু মিছন ৰঞ্জন দাসক ৰাজ্যৰ দুখন ৰাজ্যসভাৰ আসনৰ বাবে চূড়ান্ত কৰিছিল বিজেপিৰ কেন্দ্ৰীয় নেতৃত্বই । ৰাজ্যসভাৰ প্ৰাৰ্থিত্বৰ সন্দৰ্ভত অসমৰ মুখ্যমন্ত্ৰী ড০ হিমন্ত বিশ্ব শৰ্মা, বিজেপি অসম প্ৰদেশৰ সভাপতি ভৱেশ কলিতাৰে কেন্দ্ৰীয় নেতৃত্বৰ বৈঠক অনুষ্ঠিত হৈছিল । এই বৈঠকত অংশগ্ৰহণ কৰিছিল অমিত শ্বাহ আৰু জে পি নড্ডাই । দিল্লীত আয়োজিত এই বৈঠকতে এই দুয়োগৰাকী প্ৰাৰ্থীৰ নাম চূড়ান্ত কৰা হৈছিল ।