২৬ৰ নিৰ্বাচনৰ পূৰ্বে আমাক জনজাতিকৰণ লাগিব: আক্ৰাছু

ছয় জনগোষ্ঠীৰ জনজাতিকৰণক লৈ উত্তাল হৈ পৰিছে ৰাজ্য। ভিন্ন প্ৰান্তত ক্ৰমাৎ বৃদ্ধি পোৱা আন্দোলনমুখৰ পৰিস্থিতিৰ পিছত এই বিষয়ত একপ্ৰকাৰে ক্ষীপ্ৰ পদক্ষেপ গ্ৰহণৰ বাবে বাধ্য হৈছে অসম চৰকাৰ। ইয়াৰ মাজতে  ছয় জনগোষ্ঠীৰ জনজাতিকৰণ প্ৰসংগত সংবাদমেল সম্বোধন কৰে আক্ৰাছুৰ BTCৰ দ্বিপেন ৰয় আৰু সোণাধৰ ৰায়ে।

সংবাদমেলত কয়, “মন্ত্ৰী গোটৰ প্ৰতিবেদনত কিছু দিশ আৰু আশা থাকি গৈছে। ২৬ৰ নিৰ্বাচনৰ পূৰ্বে জনজাতিৰ মৰ্যাদা কেৱল নিৰ্বাচন কেন্দ্ৰিক হ’বলৈ গৈ আছে। নিৰ্বাচনৰ পূৰ্বে আমি ST মৰ্যাদা লাভ নকৰো বিটিচিৰ NOC লাভ নকৰিলে ST মৰ্যাদা নাপাব সেইবোৰ আগতীয়াকৈ আলোচনা হ’ব লাগিছিল, কিন্তু নহ’ল। ২৬ৰ নিৰ্বাচনৰ পূৰ্বে আমাক জনজাতিকৰণ লাগিব। আমাৰ ধাৰাবাহিক আন্দোলন চলি থাকিব।”

আকৌ কয়,  ৰাজ্যসভাত ST মৰ্যাদাৰ বিষয় সন্দৰ্ভত ইতিমধ্যে এই বিষয় আলোচনা হৈ আছে। অবিভক্ত গোৱালাপাৰা ভিতৰৰ আৰু বাহিৰৰ বুলি বিভক্ত কৰা প্ৰক্ৰিয়া মানি লোৱা নহ’ব। জনজাতিকৰণ যদি কৰিব লগা আছে ST (P) হিচাপে কৰক। কোচ ৰাজবংশী ভাইসকলৰ মাজত বিভক্ত কৰিব নালাগে। BTC এটা আঞ্চলিক ৰাজনৈতিক দল আৰু সংগঠনৰ উচতনিত BTCৰ সচিবালয়ত হিংসাত্মক ঘটনা সৃষ্টি হৈছে।”

৩ ডিচেম্বৰত গণ সমাৱেশ অনুষ্ঠিত হোৱা কথা উল্লেখ কৰি কয়,”যেতিয়ালৈকে জনজাতিকৰণ নহব আমাৰ প্ৰতিবাদ চলি থাকিব ৷ চৰকাৰক সকিয়নী আমাৰ অন্তৰ জ্বলালে, আমি আপোনালোকক জ্বলাম” । জনতা ভৱন জ্বলোৱা হুংকাৰ আক্ৰাছু নেতৃত্বৰ। লগতে কয়, “টুপ- জাপি পিন্ধোৱা চেষ্টা নকৰিব। আমাৰ ভূমি,ৰাজনৈতিক,শিক্ষা অধিকাৰ লাগিবই। কংগ্ৰেছৰ দৰে বিজেপিয়েও আমাক প্ৰতাৰণা কৰি আহিছে। কোনোবাই যদি আমাক ৰঙা চকু দেখুৱাই আমি হাত সাৱতি বহি নাথাকো।  বিজেপিয়ে ভাই-ভাই মাজত সংঘাত লোৱা চেষ্টা কৰিছে। ২৬ৰ আগত জনজাতিকৰণ নকৰিলে আমি বিজেপিক বয়ক’ট কৰিম।”

উল্লেখ্য যে, ছয় জনগোষ্ঠীৰ জনজাতিকৰণৰ বিষয়ত বিবেচনাৰ বাবে ৰণোজ পেগুৰ অধ্যক্ষতাত এক মন্ত্ৰীগোট গঠন কৰা হৈছিল। ভিন্ন বিবাদ তথা প্ৰতিক্ৰিয়াৰ মাজতে শনিবাৰে অসম বিধানসভাৰ শীতকালীন অধিৱেশনৰ অন্তিম দিনটোত তিনিগৰাকী মন্ত্ৰীৰ তত্বাৱধানত প্ৰস্তুত কৰা মন্ত্ৰীগোটৰ এই প্ৰতিবেদন সদনৰ মজিয়াত দাখিল কৰা হয়।

মন্ত্ৰীগোটৰ এই প্ৰতিবেদনত জনজাতিকৰণৰ দাবী তোলা ৬ জনগোষ্ঠীক তিনিটা শ্ৰেণীত ভাগ কৰাৰ পৰামৰ্শ দিয়া হৈছে। সেই অনুসৰি এই জনগোষ্ঠী কেইটাক ST (Plain), ST (Hills) আৰু ST (Valley) অৰ্থাৎ জনজাতি (ভৈয়াম), জনজাতি (পাৰ্বত্য) আৰু জনজাতি (উপত্যকা) হিচাপে শ্ৰেণীভুক্ত কৰাৰ পৰামৰ্শ আগবঢ়োৱা হৈছে।