সামৰিক শাসনৰ দিশে আগবাঢ়িছে নেকি বাংলাদেশ ? ৰাজনীতিত হস্তক্ষেপ নকৰিবলৈ সামৰিক বাহিনীলৈ কঠোৰ বাৰ্তা ইউনুছ চৰকাৰৰ

তেওঁ এজন বিশেষ সহায়ক। বৰ্তমান বাংলাদেশৰ অন্তৱৰ্তীকালীন চৰকাৰৰ দূৰসংযোগ আৰু তথ্য প্ৰযুক্তি মন্ত্ৰালয়ৰ জ্যেষ্ঠ বিষয়া । তেওঁৰ মন্তব্য চৰকাৰে প্ৰেৰণ কৰা বাৰ্তাৰ দৰেই । এতিয়া সেই সহায়ক ফৈজ আহমেদ তৈয়েবে ঘোষণা কৰিছে যে ইউনুছে পদত্যাগ নকৰে । সকলো জল্পনা-কল্পনা আৰু বিতৰ্কৰ অন্ত পেলাই তেওঁ বৰ্তমান বাংলাদেশৰ ৰাজনীতিৰ আটাইতকৈ ডাঙৰ ‘সত্য’ পোহৰলৈ আনিছে ।

শুকুৰবাৰে ফাইজ আহমেদে নিজৰ ফেচবুক ৱালত ইউনুছৰ পদত্যাগৰ তথ্য শ্বেয়াৰ কৰাৰ উপৰিও বাংলাদেশৰ সেনা প্ৰধানগৰাকীক অনুশাসনৰ পাঠো পঢ়ায় । তেওঁৰ মতে সভ্য দেশত সামৰিক বাহিনী ৰাজনীতিত লিপ্ত নহয় । ফৈজে লিখিছে, “আজিৰ পৃথিৱীত কোনো সভ্য দেশৰ সৈন্যই ৰাজনীতিত লিপ্ত নহয় । তাৰোপৰি এই ক্ষেত্ৰত তেওঁলোকে আমনিও নকৰে ।”

কি প্ৰসংগত ফৈজে এই কথা কৈছিল? শেহতীয়াকৈ বাংলাদেশৰ সেনা প্ৰধান ৱাকাৰ-উজ-জামানে স্পষ্ট কৰি দিছে যে “আগতীয়াকৈ ৰাষ্ট্ৰীয় নিৰ্বাচনৰ ব্যৱস্থা কৰা উচিত । লগতে ইউনুছ চৰকাৰে সামৰিক কাম-কাজত হস্তক্ষেপ কৰাটো বন্ধ কৰিব লাগে । অহা ডিচেম্বৰৰ ভিতৰত অন্তৱৰ্তীকালীন চৰকাৰে নিৰ্বাচন আয়োজন কৰিব লাগিব । এই চৰকাৰ গঠনৰ উদ্দেশ্য আছিল নিকা আৰু মুক্ত নিৰ্বাচনৰ আয়োজন কৰা ।”

যোৱা কেইমাহমানৰ পৰা দেশৰ ৰাজনৈতিক শিবিৰত প্ৰচাৰিত হোৱা দাবীসমূহ এতিয়া সেনাধ্যক্ষৰ পৰা শুনা গৈছে । তেওঁ চৰকাৰত আগভাগ ল’বলৈ চেষ্টা কৰিছে নে বাংলাদেশ সামৰিক শাসনৰ দিশে আগবাঢ়িছে ? উত্থাপন হ’বলৈ ধৰিছে এনে কেইবাটাও প্ৰশ্ন । সেনা প্ৰধানৰ মন্তব্যই অতিৰিক্ত অক্সিজেন প্ৰদান কৰিছে বিএনপি আৰু এনচিপিৰ দৰে দলক । চৰকাৰ আৰু সামৰিক বাহিনীৰ মাজত যি বিভাজন গঢ় লৈ উঠিছে কাৰ্যতঃ সেয়াও স্পষ্ট হৈ পৰিছে ।

এতিয়া বিতৰ্কৰ মাজতে ফৈজ আহমেদে সেনা প্ৰধানক অনুশাসনৰ পাঠ পঢ়োৱা দেখাগ’ল । তেওঁ লগতে কয়, “নিৰ্বাচনৰ সন্দৰ্ভত সেনা প্ৰধানগৰাকীৰ মন্তব্যই তেওঁৰ বিচাৰ ক্ষমতাৰ শুদ্ধতাক সুৰক্ষিত কৰাত ব্যৰ্থ হৈছে । সেনাবাহিনীক প্ৰাপ্য সন্মান দেখুৱাব লাগিব আৰু বিশ্বাস কৰিব লাগিব । অন্তৰ্ভুক্তিৰ নামত আৱামি লীগৰ পুনৰ্বাসন বিচাৰিব নোৱাৰি। বাংলাদেশ সেনা আমাৰ গৌৰৱ আৰু আস্থাৰ স্থল, আৰু সেইটো ভংগ কৰাটো কাৰো বাবে বাঞ্ছনীয় নহয়।’’

এই প্ৰতিবেদন লিখাৰ সময়লৈ বিশেষ সহায়কজনে সেনা আৰু ইউনুছৰ পদত্যাগ সম্পৰ্কীয় পোষ্টটো ডিলিট কৰি দিয়ে । এই লেখাটো সম্পূৰ্ণ ব্যক্তিগত মতামত বুলি তেওঁ দাবী কৰে । জ্ঞাত সূত্ৰই কয় যে যদি সঁচাকৈয়ে ব্যক্তিগত মতামত হয় তেন্তে “মুখ্য উপদেষ্টাজনে পদত্যাগ নকৰে” বাক্যাংশটো কিয় ব্যৱহাৰ কৰিলে? নে এই ‘ব্যক্তিগত মতামত’ৰ পোষ্টটো আচলতে ইয়াক ন্যায্যতা প্ৰদান কৰাৰ এক উপায়? কোনো কোনোৱে কয় যে ফাটটোৰ গুৰুত্ব এতিয়াৰ বাবে স্পষ্ট হৈ পৰিছে ।