ভাৰত-অষ্ট্ৰেলিয়াৰ প্ৰথম টি-২০ ত বৰষুণৰ বিধি-পথালি, আধাতেই পৰিত্যক্ত ঘোষণা
পাঁচখনীয়া মেচৰ শৃংখলাটোৰ প্ৰথমখন মেচত টিম ইণ্ডিয়াই প্ৰথমে বেটিং কৰি শক্তিশালী আৰম্ভণি কৰে। কিন্তু বৰষুণে দুবাৰ খেলত বাধা দিয়ে, আৰু দ্বিতীয়বাৰ বৰষুণ বন্ধ হোৱাৰ কোনো লক্ষণ দেখা নগ'ল, যাৰ ফলত মেচখন পৰিত্যাগ কৰিবলগীয়া হয়।
কেনবেৰাত ভাৰত আৰু অষ্ট্ৰেলিয়াৰ মাজত অনুষ্ঠিত হোৱা প্ৰথমখন টি-২০ মেচ বৰষুণৰ বাবে পৰিত্যক্ত ঘোষণা কৰা হয়। বৰষুণে দুবাৰ খেলত বাধা দিয়ে, আৰু দ্বিতীয়বাৰ বৰষুণ বন্ধ হোৱাৰ কোনো লক্ষণ দেখা নগ’ল, যাৰ ফলত মেচখন পৰিত্যাগ কৰিবলগীয়া হয়।
পাঁচখনীয়া মেচৰ শৃংখলাটোৰ প্ৰথমখন মেচত টিম ইণ্ডিয়াই প্ৰথমে বেটিং কৰি শক্তিশালী আৰম্ভণি কৰে। অপেনাৰ অভিষেক শৰ্মা ১৯ ৰানত আউট হয় যদিও অধিনায়ক সূৰ্যকুমাৰ যাদৱ আৰু সহ-অধিনায়ক শুভমন গিলে আকৰ্ষণীয় বেটিঙেৰে ভাৰতীয় অনুৰাগীৰ হৃদয় জয় কৰিছিল।
শুভমন গিলে ১৮৫ ষ্ট্ৰাইক ৰেটেৰে ২০টা বলত ৩৭ ৰান সংগ্ৰহ কৰি খেলি আছিল। আনহাতে সূৰ্যকুমাৰ যাদৱে ১৬২ ষ্ট্ৰাইক ৰেটেৰে ২৪ টা বলত ৩৯ ৰান সংগ্ৰহ কৰি খেলি আছিল। সূৰ্যকুমাৰ যাদৱে দুটা ছয় আৰু তিনিটা চাৰি কোবোৱাৰ বিপৰীতে গিলে ৪ টা চাৰি কোবায়। সূৰ্যকুমাৰ যাদৱ আৰু শুভমন গিল টিম ইণ্ডিয়াৰ বাবে এক ডাঙৰ চিন্তাৰ কাৰণ আছিল। কিয়নো এই দুয়োগৰাকী খেলুৱৈৰ ফৰ্ম ভাল নাছিল। অৱশ্যে কেনবেৰাত তেওঁলোকৰ উৎকৃষ্ট বেটিঙে টিম ইণ্ডিয়াৰ চিন্তা কিছু পৰিমাণে লাঘৱ কৰিছে।
ভাৰত আৰু অষ্ট্ৰেলিয়াৰ পৰৱৰ্তী মেচ এতিয়া মেলবৰ্ণত অনুষ্ঠিত হ’ব। এই খেলখন অহা ৩১ অক্টোবৰত অনুষ্ঠিত হ’ব। চিন্তনীয় কথাটো হ’ল মেলবৰ্ণতো বৰষুণৰ আশংকা কৰা হৈছে। বৰ্তমান মেলবৰ্ণত বৰষুণৰ সম্ভাৱনা ৫০%, আৰু মেচৰ সময়তো বৰষুণ হ’ব পাৰে। আশা কৰা হৈছে যে সেই মেচখনৰ পৰিস্থিতি কেনবেৰাৰ দৰে নহ’ব ৷
অষ্ট্ৰেলিয়াৰ কথা ক’বলৈ গ’লে কেনবেৰাত অনুষ্ঠিত হোৱা খেলখন যদিও বৰষুণৰ বাবে পৰিত্যক্ত হৈ পৰিছিল, তথাপিও মেচখনৰ ৯.৪ অভাৰ অষ্ট্ৰেলিয়াৰ বাবে চিন্তাৰ কাৰণ হৈ পৰিছিল। বাউন্সি কেনবেৰা পিটচত অষ্ট্ৰেলিয়াৰ বলাৰসকলৰ বিৰুদ্ধে ভাৰতে ৯.৪ অভাৰত ৯৭ ৰান সংগ্ৰহ কৰে। হেজলউড, বাৰ্টলেট, নাথান এলিছ, কুহনেমেনৰ দৰে বলাৰসকলে কোনো প্ৰভাৱ পেলাব নোৱাৰিলে। এতিয়া মেলবৰ্ণত অষ্ট্ৰেলিয়াৰ বলাৰসকলে বেলেগ কৌশল ব্যৱহাৰ কৰিব লাগিব।
