সুন্দৰভাৱে চলি আছিল ভাৰত-অষ্ট্ৰেলিয়াৰ অন্তিম টি-২০ মেচ, কিন্তু হঠাতে কিয় বন্ধ কৰি দিয়া হ’ল মেচখন?

ভাৰত আৰু অষ্ট্ৰেলিয়াৰ মাজত অনুষ্ঠিত হোৱা পাঁচখনীয়া টি-২০ শৃংখলাৰ অন্তিমখন খেলৰ সময়ত সংঘটিত হয় এক চাঞ্চল্যকৰ ঘটনা। হঠাতে মেচ বন্ধ কৰাৰ সিদ্ধান্তত আচৰিত হৈ পৰিল সকলো। ব্রীজবেনৰ বিখ্যাত গাব্বা ষ্টেডিয়ামত দুয়োটা দল মুখামুখি হয় অন্তিমখন টি-২০ মেচত ৷ অৱশ্যে ৪.৫ অভাৰৰ অন্তত আম্পায়াৰসকলে খেলখন বন্ধ কৰি দিয়ে। ইয়াৰ পিছত গ্ৰাউণ্ড ষ্টাফে সকলো খেলুৱৈকে ডাগআউট এৰি ড্ৰেছিং ৰুমলৈ যাবলৈ কয়, যাৰ ফলত সকলোৰে মাজত উত্তেজনা বৃদ্ধি পায়।

কিয় হঠাৎ বন্ধ হ’ল ভাৰত-অষ্ট্ৰেলিয়াৰ মেচ?

আচলতে বেয়া বতৰৰ বাবেই মেচ বন্ধ কৰাৰ সিদ্ধান্ত লোৱা হৈছিল। আম্পায়াৰ শ্বাউন ক্ৰেগে ইফালে সিফালে চাই লগে লগে খেলুৱৈসকলক পেভিলিয়নলৈ উভতি যাবলৈ নিৰ্দেশ দিলে। ইয়াৰ মূল কাৰণ আছিল যে বিজুলীৰ পোহৰ দেখা গৈছিল, আৰু বতৰ বিজ্ঞানীৰ প্ৰতিবেদনে সকলোকে সতৰ্ক কৰি দিছিল। গ্ৰাউণ্ড ষ্টাফে ক্ৰীজ কভাৰবোৰ লগাবলৈ লৰালৰিকৈ আহিল। সাংবাদিকসকলে প্ৰকাশ কৰা অনুসৰি প্ৰচণ্ড বৰষুণৰ ডাৱৰ দ্ৰুতগতিত ষ্টেডিয়ামৰ ওপৰত দেখা গৈছিল, ৰাডাৰত গাঢ় ৰঙা ৰঙৰ চিন দেখা গৈছে। প্ৰতিকূল বতৰৰ সতৰ্কবাণীৰ বাবে মাজভাগতে মেচখন বন্ধ কৰি দিয়া হয়।

অনুৰাগীৰ সুৰক্ষাৰ প্ৰতি গুৰুত্ব

খেলুৱৈসকলৰ লগতে ষ্টেডিয়ামত উপস্থিত থকা অনুৰাগীসকলৰো যত্ন লোৱা হৈছিল, আৰু ষ্টেডিয়ামৰ তলৰ অংশসমূহ তৎক্ষণাত খালী কৰা হৈছিল। অনুৰাগীসকলে দ্ৰুতগতিত ওপৰৰ টেৰেচৰ ফালে দৌৰি যায়। ব্রীজবেনৰ বতৰ প্ৰায়ে এনেদৰে সলনি হয়। অষ্ট্ৰেলিয়াত বেয়া বতৰৰ বাবে প্ৰায়ে খেলবোৰ আগতীয়াকৈ বন্ধ কৰি দিয়া হয়, যাতে খেলুৱৈ আৰু অনুৰাগীৰ সুৰক্ষাক অগ্ৰাধিকাৰ দিব পৰা যায়।

টীম ইণ্ডিয়াৰ শক্তিশালী আৰম্ভণি

মেচ বন্ধ হোৱাৰ আগতেই ভাৰতে শক্তিশালী আৰম্ভণি কৰিছিল। শুভমন গিল আৰু অভিষেক শৰ্মাই মাত্ৰ ৪.৫ অভাৰত ৫২ ৰান সংযোজন কৰে। ১৬টা বলত ২৯ ৰান কৰিবলৈ সক্ষম হয় গিলে। অভিষেকেও ১৩টা বলত ২৩ ৰান সংগ্ৰহ কৰে। অভিষেকে এই সময়ছোৱাত দুবাৰ জীৱনদান পাইছিল।

দুয়োটা দলৰ মূল একাদশ

ভাৰত: অভিষেক শৰ্মা, শুভমন গিল, সূৰ্যকুমাৰ যাদৱ (অধিনায়ক), ৰিংকু সিং, জিতেশ শৰ্মা (উইকেটকীপাৰ), ৱাশ্বিংটন সুন্দৰ, শিৱম ডুবে, অক্ষৰ পেটেল, অৰ্শদীপ সিং, বৰুণ চক্ৰৱৰ্তী, যশপ্ৰীত বুমৰাহ

অষ্ট্ৰেলিয়া: মেথিউ শ্বৰ্ট, মিচেল মাৰ্ছ (অধিনায়ক), জোছ ইংলিছ, টিম ডেভিদ, জোছ ফিলিপছ, মাৰ্কাছ ষ্ট’ইনিছ, গ্লেন মেক্সৱেল, জেভিয়াৰ বাৰ্টলেট, বেন ড্ৱাৰ্শ্বুইছ, নাথন এলিছ, এডাম জাম্পা