GT vs LSG Live Score, IPL 2025: ‘শক্তিশালী’ গুজৰাটৰ আত্মসমৰ্পণ! আশাহীন মেচত সান্ত্বনাৰ জয় লক্ষ্ণৌ চুপাৰ জায়েণ্টছৰ

আই পি এল ২০২৫ৰ পৰা বাহিৰ হ’লেও ছিজনত গুজৰাটৰ বিপক্ষে অপৰাজেয় ধাৰা অব্যাহত ৰাখিলে লক্ষ্ণৌ চুপাৰ জায়েণ্টছে। দুয়োটা দলৰ মাজত প্ৰথমখন মেচতো জয়ী হোৱা লক্ষ্ণৌৱে আজি পইণ্ট তালিকাৰ শীৰ্ষস্থানত থকা গুজৰাটক ৩৩ ৰানত সহজে পৰাস্ত কৰে। গুজৰাটৰ ইনিংছৰ অন্তিমটো বলত বাডনিয়ে দখল কৰে ছাই কিশোৰৰ উইকেট। এইদৰে লক্ষ্ণৌৱে ছিজনত আজি ষষ্ঠ জয়ৰ সোৱাদ লাভ কৰে।

গুজৰাটে হেৰুৱাইছে অষ্টমটো উইকেট। অন্তিম অভাৰৰ তৃতীয় বলত কেগিছো ৰাবাডাক বিদায় দিছে আয়ুস বাডনিয়ে।

পৰাজয়ৰ দিশে অগ্ৰসৰ হৈছে গুজৰাট টাইটানছ। দলক জয়ী কৰাব নোৱাৰিলেও এক দৰ্শনীয় ইনিংছ খেলি পেভিলিয়নলৈ উভতিল শ্বাহৰুখ খান। ২৯টা বলত ৫টা চাৰি আৰু ৩টা ছয়েৰে তেওঁ ৫৭ ৰান সংগ্ৰহ কৰে।

জয়ৰ আশা দেখা দিছিল যদিও ক্ৰমাৎ স্থিতি হেৰুৱালে গুজৰাটে। আৰ্শ্বাদ খানৰ ৰূপত আন এটা উইকেট হেৰুৱালে দলটোৱে। আৰ্শ্বাদক বিদায় দিয়ে শ্বাহবাজ আহমেদে।

ব্যৰ্থ হৈ পেভিলিয়নলৈ উভতিছে ৰাহুল তেৱাটীয়া। প্ৰয়োজনীয় সময়ত তেৱাটীয়াই মাত্ৰ ২ ৰান কৰিয়েই অ’ৰ’ৰ্কেৰ বলত আউট হয়।

গুজৰাটক জয়ৰ আশা দেখুৱাই বিস্ফোৰক বেটিঙেৰে ইনিংছ আগুৱাই নিছে শ্বাহৰুখ খানে। মাত্ৰ ২২টা বলতে ৫টা চাৰি আৰু ৩টা ছয়েৰে তেওঁ অৰ্ধশতক সম্পূৰ্ণ কৰে।

শ্বাহৰুখ খানৰ সৈতে এক শক্তিশালী যুটি বন্ধাৰ পিছত বিদায় লৈছে শ্বেৰফানে ৰাডাৰফৰ্ডে। তেওঁক বিদায় দিয়ে অ’ৰ’ৰ্কেই। ৰাডাৰফৰ্ডে সংগ্ৰহ কৰে ২২ বলত ৩৮ ৰান।

শীৰ্ষক্ৰমৰ তিনি বেটাৰক হেৰুৱালেও যুঁজ দিছে গুজৰাটে। ক্ৰীজত থকা দুই বেটাৰ ৰাডাৰফোৰ্ড আৰু শ্বাহৰুখে ক্ৰমাৎ আক্ৰমণাত্মক শৈলী গ্ৰহণ কৰি ১৪.১ অভাৰত দলৰ ইনিংছ ১৫০ৰ পাৰ কৰাইছে।

হাতত আঘাত পোৱাৰ পিছতো চমক দেখুৱাইছে আকাশ সিঙে। এক দৰ্শনীয় ইন চুইঙেৰে তেওঁ বিদায় দিছে বাটলাৰক (৩৩)। এইদৰে শীৰ্ষক্ৰমৰ তিনি বেটাৰক হেৰুৱাই সংকটত পৰিছে গুজৰাট।

আব্দুল ছামাদে আয়ত্ব কৰা এক দৰ্শনীয় কেচৰ ফলত পেভিলিয়নলৈ উভতিব লগা হৈছে শুভমন গিল। আভেশ খানৰ বলত আউট হোৱা গিলে ২০টা বলত ৭টা চাৰিৰে ৩৫ ৰান সংগ্ৰহ কৰে।

গুজৰাটৰ বেটিং বিভাগৰ অন্যতম প্ৰধান শক্তি ছাই সুদৰ্শনে লৈছে বিদায়। দলক এক শক্তিশালী আৰম্ভণিৰ ইংগিত দিছিল যদিও সুদৰ্শনে ১৬টা বলত ২১ ৰান সংগ্ৰহ কৰি বিদায় লয়। তেওঁক বিদায় দিয়ে অ’ৰ’ৰ্কেই।

লক্ষ্ণৌৰ দৰে গুজৰাটৰ ইনিংছো আৰম্ভ হৈছে এটা চাৰিৰে। ইম্পেক্ট চাবৰ ৰূপত ক্ৰীজলৈ অহা ছাই সুদৰ্শনে ইনিংছৰ প্ৰথমটো বলতে এটা চাৰি কোবায়।

আৰম্ভণিৰ পৰাই বিস্ফোৰক বেটিং অব্যাহত ৰাখি লক্ষ্ণৌৱে ইনিংছত সংগ্ৰহ কৰিছে ২৩৫ ৰানৰ বৃহৎ স্ক’ৰ। ছিজনত হতাশাজনক প্ৰদৰ্শনেৰে বাৰে বাৰে ব্যৰ্থ হোৱা লক্ষ্ণৌৰ অধিনায়ক পণ্টে অন্তিম অভাৰত দুটা ছয় কোবায়। এতিয়া ২৩৬ ৰানৰ লক্ষ্য গুজৰাটে অতিক্ৰম কৰিব পাৰে নে নোৱাৰে সেয়া হ’ব লক্ষণীয়।

লক্ষ্ণৌক এক শক্তিশালী স্থিতিত উপনীত কৰাই শতকীয় ইনিংছ খেলি বিদায় ল’লে মিচেল মাৰ্শ্বে। মাত্ৰ ৬৪টা বলত ১০টা চাৰি আৰু ৮টা ছয়েৰে ১১৭ ৰান সংগ্ৰহ কৰি মাৰ্শ্বে ক্ৰীজ এৰে। তেওঁৰ উইকেট দখল কৰে আৰ্শ্বাদ খানে।

আক্ৰমণাত্মক বেটিঙেৰে ছিজনত পঞ্চমটো অৰ্ধশতক সম্পূৰ্ণ কৰিছে নিকোলাচ পুৰাণে। মাত্ৰ ২৩টা বলতে তেওঁ ৪টাকৈ ছয় আৰু চাৰিৰে অৰ্ধশতক সম্পূৰ্ণ কৰে।

নিজ আই পি এল কেৰিয়াৰত প্ৰথমটো শতক অৰ্জন কৰিছে মিচেল মাৰ্শ্বে। আক্ৰমণাত্মক বেটিঙেৰে তেওঁ ৫৬টা বলত ১০টা চাৰি আৰু ৬টা ছয়েৰে শতক সম্পূৰ্ণ কৰে।

আক্ৰমণাত্মক বেটিং অব্যাহত আছে লক্ষ্ণৌৰ। মাৰ্শ্ব আৰু পুৰাণে বিস্ফোৰক বেটিঙেৰে আগবঢ়াই নিছে দলৰ ইনিংছ। এইদৰে ১৪.২ অভাৰত দলৰ স্ক’ৰ ১৫০ৰ পাৰ হৈছে।

এইসময়ত টি-২০ত অন্যতম শ্ৰেষ্ঠ বলাৰ ৰছিদ খানে এই ছিজনত প্ৰত্যাশিত প্ৰদৰ্শন দাঙি ধৰিব পৰা নাই। আজিও নিজৰ প্ৰথমটো অভাৰতে ৰছিদে খৰচ কৰিছে ২৫ ৰান। মাৰ্শ্বে ৰছিদৰ অভাৰটোত কোবায় ৩টা চাৰি আৰু ২টা ছয়।

পুনৰ এবাৰ লক্ষ্ণৌৰ ইনিংছৰ ভেটি গঢ়ি তুলি বিদায় লৈছে মাৰ্ক্ৰামে। ছাই কিশোৰৰ বলত শ্বাহৰুখৰ হাতত কেচ তুলি দি তেওঁ বিদায় লয়। মাৰ্ক্ৰামে ৩টা চাৰি আৰু ২টা ছয়েৰে ২৪টা বলত ৩৬ ৰান সংগ্ৰহ কৰি বিদায় লয়।

ছিজনত ধাৰাবাহিকতা অব্যাহত ৰাখি আন এটা অৰ্ধশতক অৰ্জন কৰিছে মিচেল মাৰ্শ্বে। ছাই কিশোৰৰ বলত এটা ছয় কোবাই মাৰ্শ্বে ৩৩টা বলত নিজৰ অৰ্ধশতক সম্পূৰ্ণ কৰে।

৯ অভাৰৰ সমাপ্তিলৈ লক্ষ্ণৌৱে সংগ্ৰহ কৰিছে ৮৩ ৰান। এইপৰ্যন্ত দলটোৱে হেৰুওৱা নাই এটাও উইকেট। এক কথাত গুজৰাটৰ বলিং শক্তি প্ৰায় নিষ্প্ৰভ হৈ পৰিছে লক্ষ্ণৌৰ দুই অপেনাৰ মাৰ্শ্ব আৰু মাৰ্ক্ৰামৰ সমুখত।

পুনৰ এবাৰ লক্ষ্ণৌক শক্তিশালী আৰম্ভণই প্ৰদান কৰিছে মাৰ্ক্ৰাম আৰু মাৰ্শ্বে। দুয়ো ৫.৩ অভাৰত দলৰ স্ক’ৰ ৫০ৰ পাৰ কৰাইছে। ৰাবাডাৰ বলত দুটাকৈ ছয় কোবায় মাৰ্ক্ৰামে।

সামগ্ৰিকভাৱে দল ব্যৰ্থ হ’লেও প্ৰায় সফল হৈছে লক্ষ্ণৌৰ অপেনাৰদ্বয় মিচেল মাৰ্শ্ব আৰু এইডেন মাৰ্ক্ৰাম। আজিও এই দুই তাৰকাৰ ওপৰত থাকিব গধূৰ দায়িত্ব। আনহাতে গুজৰাটৰ হৈ বলিং মুকলি কৰিছে চিৰাজে। ইনিংছৰ প্ৰথমটো বলতে এটা চাৰি কোবাইছে মাৰ্ক্ৰামে।

আই পি এলত ইতিপূৰ্বে দুয়োটা দল ৬ বাৰ মুখামুখি হৈছে। ইয়াৰে চাৰিবাৰতে জয়ী হৈছে গুজৰাট। আনহাতে লক্ষ্ণৌ জয়ী হৈছে দুখন মেচত। লক্ষণীয়ভাৱে চলিত ছিজনত দুয়োটা দল এখন মেচত মুখামুখি হৈছিল আৰু এই মেচখনত জয়ী হৈছিল লক্ষ্ণৌ।

গুজৰাট টাইটানছৰ মূল একাদশ হ’ব এনেধৰণৰ- শুভমন গিল (অধিনায়ক), জ’ছ বাটলাৰ, শ্বেৰফানে ৰাডাৰফোৰ্ড, শ্বাহৰুখ খান, ৰাহুল তেৱাটিয়া, ৰছিদ খান, আৰ্শ্বাদ খান, ৰবিশ্ৰীনিবাসন চাই কিশোৰ, কেগিছ’ ৰাবাডা, মহম্মদ চিৰাজ, প্ৰসিধ কৃষ্ণ।

লক্ষ্ণৌৰ মূল একাদশত অন্তৰ্ভুক্ত কৰা হৈছে হিম্মত সিং আৰু শ্বাহবাজ আহমেদক। দলটোৰ মূল একাদশ হ’ব এনেধৰণৰ- মিচেল মাৰ্শ্ব, এইডেন মাৰ্ক্ৰাম, নিকোলাছ পুৰাণ, ঋষভ পণ্ট (অধিনায়ক), আয়ুস বাডনি, আব্দুল ছামাদ, হিম্মত সিং, শ্বাহবাজ আহমেদ, আকাশ দীপ, আভেশ খান, উইলিয়াম অ’ৰ’ৰ্কে।

ইতিমধ্যে গুজৰাট টাইটানছ আৰু লক্ষ্ণৌ চুপাৰ জায়েণ্টছৰ অধিনায়কদ্বয়ৰ মাজত টছ হৈ গৈছে। টছত জয়ী হৈ প্ৰথমে বলিং কৰাৰ সিদ্ধান্ত গ্ৰহণ কৰিছে গুজৰাটৰ অধিনায়ক শুভমন গিলে।