শীতকালত কিয় বাঢ়ে গাঁঠিৰ বিষৰ সমস্যা? চিকিৎসাৰ ঘৰুৱা উপায় জানক…

গাঁঠিৰ বিষ

শীতকাল আৰম্ভ হোৱাৰ লগে লগে বহু লোকৰ গাঁঠিৰ বিষ, জঠৰতা, খোজ কঢ়াত অসুবিধা হয়। বিশেষকৈ ৰাতিপুৱা বা এটা অৱস্থাত বহু সময় বহি থকাৰ পিছত এই বিষ বেছি হয়। ঠাণ্ডা বাঢ়ি অহাৰ লগে লগে শৰীৰৰ কাৰ্যকলাপ সীমিত হোৱাৰ ফলত গাঁঠিৰ সমস্যা অধিক স্পষ্ট হৈ পৰে। বহুতে ইয়াক বয়সৰ লগত জড়িত সমস্যা বুলি গণ্য কৰি আওকাণ কৰে যদিও কিছুমানৰ বাবে ই দৈনন্দিন জীৱনত প্ৰভাৱ পেলায়। শীতকালত গাঁঠিৰ বিষ কেৱল বৃদ্ধসকলৰ মাজতে সীমাবদ্ধ নহয়; যুৱক-যুৱতীসকলো আক্ৰান্ত হ’ব পাৰে।

এনে পৰিস্থিতিত ঠাণ্ডা বতৰত গাঁঠিৰ বিষ কিয় বাঢ়ে, কোনে অধিক সতৰ্ক হোৱাৰ প্ৰয়োজন, আৰু ইয়াক কেনেকৈ প্ৰতিৰোধ কৰিব পাৰি সেই বিষয়ে জনা উচিত।

শীতকালত গাঁঠিৰ বিষ কিয় বাঢ়ে?

মেক্স হাস্পতালৰ ডাঃ অখিলেশ যাদৱে বুজাই দিয়ে যে, শীতকালত উষ্ণতা হ্ৰাস পোৱাৰ বাবে পেশী আৰু গাঁঠিবোৰ জঠৰ হৈ পৰে, যাৰ ফলত বিষ আৰু জঠৰতা বৃদ্ধি পায়। মানুহে শাৰীৰিক কাৰ্যকলাপ কমকৈ কৰে। যাৰ ফলত গাঁঠিৰ নমনীয়তাত প্ৰত্যক্ষ প্ৰভাৱ পৰে। তদুপৰি শীতকালত তেজৰ সোঁত লেহেমীয়া হ’ব পাৰে। যাৰ ফলত পৰ্যাপ্ত তাপ আৰু পুষ্টিৰ যোগান গাঁঠিবোৰলৈ যাব নোৱাৰে। বৃদ্ধ, বাতবিষ আৰু অষ্টিঅ’আৰ্থাইটিছ ৰোগী, ইতিমধ্যে গাঁঠিৰ বিষত ভুগি থকাসকলৰ অধিক আশংকা থাকে।

একেটা অৱস্থাতে দীৰ্ঘদিন কাম কৰা আৰু নিয়মিতভাৱে ব্যায়াম নকৰা লোকৰ ক্ষেত্ৰতো এই সমস্যা বৃদ্ধি পাব পাৰে। মহিলাৰ ক্ষেত্ৰত শীতকালত হৰম’নৰ পৰিৱৰ্তন আৰু কেলচিয়াম আৰু ভিটামিন ডিৰ অভাৱৰ বাবে গাঁঠিৰ বিষ বেছি হয়। এই বিষটো যদি অনাদৃত কৰি ৰখা হয়, তেন্তে এই বিষ ক্ৰমান্বয়ে বেছি বেয়া হৈ পৰিব পাৰে আৰু দৈনন্দিন কাম-কাজত বাধাৰ সৃষ্টি কৰিব পাৰে।

কেনেকৈ প্ৰতিৰোধ কৰিব পাৰি?

• শৰীৰ আৰু গাঁঠিবোৰ ঠাণ্ডাত ঢাকি ৰাখক।
• দৈনিক লঘু ব্যায়াম আৰু ষ্ট্ৰেচিং কৰক।
• কুহুমীয়া পানীৰে গা ধুৱ।
• এটা অৱস্থাত দীৰ্ঘ সময় বহি থকাৰ পৰা বিৰত থাকিব।
• কেলচিয়াম আৰু ভিটামিন ডি থকা সুষম খাদ্য গ্ৰহণ কৰক।
• বিষ থাকিলে চিকিৎসকৰ পৰামৰ্শ লওক।