নখত সদায়েই নেইল পলিচ লগায় নেকি? কেনে ক্ষতি হ’ব পাৰে জানেনে আপুনি?

প্ৰতিনিধিত্বমূলক ছবি

সৌন্দৰ্য বৃদ্ধিৰ বাবে বহু যুৱতী-মহিলাই সততে নখত নেইল পলিচ ব্যৱহাৰ কৰে। নেইল পলিচ ব্যৱহাৰে স্বাভাৱিকতেই নখ দেখনীয়াৰ কৰি তুলি মানসিক তৃপ্তি প্ৰদান কৰিব পাৰে, কিন্তু সদায়েই নেইল পলিচ ব্যৱহাৰ কৰাৰ ফলত হ’ব পৰা ক্ষতিও অত্যন্ত চিন্তনীয় হ’ব পাৰে। বিশেষকৈ যদি আপুনি নখৰ যত্ন লোৱা নাই আৰু নেইল পলিচত ক্ষতিকাৰক ৰাসায়নিক পদাৰ্থ থাকে, তেতিয়া ইয়াৰ ক্ষতি অধিক হৈ উঠিব পাৰে। গতিকে সৌন্দৰ্য চৰ্চাৰ সমান্তৰালকৈ নেইল পলিচৰ ক্ষতিৰ দিশৰ প্ৰতিও মন দিব লাগে।

নিয়মিতভাৱে নখত নেইল পলিচ লগালে কি কি ক্ষতি হয়?

নখ শুকান হৈ পৰে

নেইল পলিচ আৰু নেইল পলিচ ৰিমুভাৰত (বিশেষকৈ এচিটন ভিত্তিক ৰিমুভাৰ) থকা ৰাসায়নিক পদাৰ্থই আপোনাৰ নখৰ প্ৰাকৃতিক তেল আৰু আৰ্দ্ৰতা শোষণ কৰে। ফলত আপোনাৰ নখ শুকান, পাতল হৈ পৰে আৰু সহজে ভাঙিব পাৰে।

ৰং সলনি হোৱা বা হালধীয়া ৰঙৰ নখ

যদি আপুনি দীঘলীয়া সময় ধৰি ধাৰাবাহিকভাৱে নেইল পলিচ লগায়, বিশেষকৈ গাঢ় ৰঙৰ নেইল পলিচ ব্যৱহাৰ কৰিলে নখৰ ৰং ম্লান হৈ নখ হালধীয়া হ’ব পাৰে। নখৰ স্বাভাৱিক ৰং ঘূৰি আহিবলৈ কেইবামাহো সময় লাগিব পাৰে।

কেৰাটিন গোট মাৰিব পাৰে

যদি নেইল পলিচে নখ শুকুৱাই পেলায়, তেতিয়া কেৰাটিন গোট খাই বগা দাগ বা সৰু সৰু গোট গঠন কৰিব পাৰে।

সংক্ৰমণৰ সম্ভাৱনা বৃদ্ধি

যদি আপুনি অবিৰতভাৱে নেইল পলিচ লগায়, তেতিয়া নখৰ আৰ্দ্ৰতা ধৰি ৰখা বা দুৰ্বলতাৰ বাবে ভেঁকুৰ বা বেক্টেৰিয়াৰ সংক্ৰমণৰ সম্ভাৱনা কিছু বৃদ্ধি পাব পাৰে।

ছালৰ ছিদ্ৰৰ ক্ষতি

নেইল পলিচত থকা ৰাসায়নিক পদাৰ্থই নখৰ চৌপাশৰ ছাল (নেইল লাইনিং) শুকুৱাই পেলাব পাৰে, যাৰ ফলত এলাৰ্জী হ’ব পাৰে।

ৰাসায়নিক পদাৰ্থৰ ক্ষতিকাৰক প্ৰভাৱ—

নেইল পলিচত থকা কিছুমান ৰাসায়নিক পদাৰ্থ শৰীৰৰ বাবে ক্ষতিকাৰক হ’ব পাৰে। বিশেষকৈ সঘনাই ব্যৱহাৰ কৰিলে এনে ক্ষতি অধিক হ’ব পাৰে। জানো আহক এই বিষয়ে-

এচিটন

নেইল পলিচ ৰিমুভাৰত এচিটন অধিক ঘনত্বত পোৱা যায়। ই অতি সোনকালে নখ শুকুৱাই দুৰ্বল কৰি তোলে।

ফৰ্মেলডিহাইড

নখ কঠিন কৰিবলৈ ব্যৱহাৰ কৰা হয়, কিন্তু দীৰ্ঘদিন ধৰি ব্যৱহাৰ কৰিলে কেঞ্চাৰৰ সম্ভাৱনা বৃদ্ধি পায় আৰু এলাৰ্জী বা ছালৰ বিষ হ’ব পাৰে।

টলুইন

ইয়াৰ ফলত প্ৰজনন তন্ত্ৰ আৰু শ্বাস-প্ৰশ্বাসজনিত সমস্যা, মূৰৰ বিষ বা মূৰ ঘূৰোৱাৰ দৰে সমস্যা হ’ব পাৰে।