বিতৰ্কৰ আঁৰৰ কাৰণ কি? ORS ৰ সন্দৰ্ভত FSSAI ৰ নিৰ্দেশ স্থগিত ৰাখিছে আদালতে

শুকুৰবাৰে দিল্লী উচ্চ ন্যায়ালয়ে জনছন এণ্ড জনছনৰ(Johnson & Johnson) এটা সহযোগী প্ৰতিষ্ঠানক সকাহ প্ৰদান কৰে। ভাৰতীয় খাদ্য সুৰক্ষা আৰু মানদণ্ড কৰ্তৃপক্ষই(FSSAI) JNTLক স্বাস্থ্যসন্মত পানীয় সামগ্ৰীত “ORS” শব্দ ব্যৱহাৰ কৰাত নিষেধাজ্ঞা আৰোপ কৰা নিৰ্দেশ আদালতে স্থগিত ৰাখিছে। শেহতীয়াকৈ FSSAI য়ে উল্লেখ কৰিছিল যে, কোনো কোম্পানীয়ে নিজৰ কোনো সামগ্ৰীৰ পেকেজিঙত “ORS”ৰ কথা উল্লেখ কৰিব নোৱাৰে। যিসকলৰ সামগ্ৰীত ORS লৱণ আৰু সূত্ৰ ব্যৱহাৰ কৰা হয় আৰু বিশ্ব স্বাস্থ্য সংস্থাৰ মানদণ্ড অনুসৰি প্ৰস্তুত কৰা হয় তেওঁলোকেহে কৰিব পাৰে।

বজাৰত বহুতো সামগ্ৰী বিক্ৰী হৈছিল যিবোৰৰ পেকেজিঙত “ORS” বুলি লিখা আছিল, কিন্তু সেইবোৰ আছিল কেৱল সাধাৰণ স্বাস্থ্যকৰ পানীয়। কিন্তু ORS লেবেলৰ বাবে মানুহে সেইবোৰ ক্ৰয় কৰিছিল আৰু শিশুৱে সেইবোৰ খাইছিল। হায়দৰাবাদৰ শিশু চিকিৎসক ডাঃ শিৱৰঞ্জনী সন্তোষে এই প্ৰথাৰ বিৰুদ্ধে মাত মাতিছিল। বছৰ বছৰ ধৰি যুঁজি জয়ী হৈছিল তেওঁ। FSSAI য়ে তেওঁৰ আবেদনৰ পিছতহে এই নিৰ্দেশ জাৰি কৰিছিল। কিন্তু এতিয়া JNTLক কনজিউমাৰ হেল্থ ইণ্ডিয়াৰ গোচৰ চলি থকাৰ সময়তে উচ্চ ন্যায়ালয়ে FSSAI ৰ নিৰ্দেশ সাময়িকভাৱে স্থগিত ৰাখিছে। এই বিষয়ত শুনানি পুনৰ হ’ব।

ORS বিতৰ্কৰ আঁৰৰ কাৰণ কি?

ডাঃ শিৱৰঞ্জনী সন্তোষে কয় যে, বহু কোম্পানীয়ে তেওঁলোকৰ স্বাস্থ্যৰ পানীয়ত ORS লিখে, কিন্তু WHO ৰ দিয়া মানদণ্ডৰ সমান নহয়। ORS লেবেলযুক্ত বহুতো পেকেটত নিৰ্ধাৰিত সীমাতকৈ অধিক চেনি থাকে। কৃত্ৰিম মিঠাইও যোগ কৰা হয়, যিবোৰ স্বাস্থ্যৰ বাবে বিপদজনক।

ডাঃ শিৱৰঞ্জনীৰ এই অভিযোগৰ পিছতে খাদ্য সুৰক্ষা কৰ্তৃপক্ষ আৰু আদালতে এনে সামগ্ৰীৰ বিক্ৰীত নিষেধাজ্ঞা আৰোপ কৰে। সংস্থাটোৱে কয় যে, ORS ৰ উদ্দেশ্য হৈছে পানী আৰু ইলেক্ট্ৰ’লাইট যোগান ধৰা, কিন্তু কিছুমান ব্ৰেণ্ডত চেনিৰ মাত্ৰা অধিক থাকে।

ORS কি?

পানী আৰু ইলেক্ট্ৰ’লাইট পূৰণৰ বাবে ORS সেৱন কৰা হয়। ডায়েৰিয়া বা ডিহাইড্ৰেচনৰ বাবে চিকিৎসকে ORS খোৱাৰ পৰামৰ্শ দিয়ে। কিন্তু চেনিৰ মাত্ৰা বেছি হ’লে শিশু আৰু ডায়েবেটিছ ৰোগীৰ বাবে ক্ষতিকাৰক হ’ব পাৰে। কেৱল WHO ৰ মানদণ্ড অনুসৰি প্ৰস্তুত কৰা ORS সেৱন কৰিব লাগে।

WHOৰ তথ্য অনুসৰি ORS প্ৰস্তুত কৰিবলৈ এক লিটাৰ বিশুদ্ধ পানীত ৫ৰ পৰা ৬ চামুচ চেনি আৰু এক চামুচ নিমখ থাকিব লাগে। ইয়াত ৰং কৰিবলৈ কোনো ধৰণৰ মিঠা বা ৰাসায়নিক পদাৰ্থ থাকিব নালাগে।

উচ্চ চেনিযুক্ত ORS ৰ ক্ষতিকাৰক প্ৰভাৱ

বিশেষকৈ ডায়েবেটিছ ৰোগীৰ তেজৰ চুগাৰ পৰিমাণ বৃদ্ধি পাব পাৰে।

পেটৰ বিষ আৰু বদহজম। উচ্চ চেনিয়ে গেছ আৰু ডায়েৰিয়া বৃদ্ধি কৰিব পাৰে।

মেদবহুলতা আৰু কেলৰি গ্ৰহণ। শিশুৱে সঘনাই সেৱন কৰিলে ওজন বৃদ্ধি হ’ব পাৰে।

এইমছৰ চিকিৎসকে কি কয়

এইমছ দিল্লীৰ শিশু চিকিৎসা বিভাগৰ ডাঃ হিমাংশু ভাদানীয়ে বুজাই দিয়ে যে, বমি আৰু ডায়েৰিয়াৰ ক্ষেত্ৰত শিশুৰ বাবে ORS জীৱন ৰক্ষাকাৰী, কিন্তু সঠিক চেনিৰ মাত্ৰা অতি প্ৰয়োজনীয়। অত্যধিক মিঠা থকা ORS ক্ষতিকাৰক হ’ব পাৰে। সেয়েহে সদায় নিৰ্ভৰযোগ্য আৰু চৰকাৰী মানদণ্ডৰ ORS পেকেট ক্ৰয় কৰাটো প্ৰয়োজনীয়। পেকেটত চেনিৰ পৰিমাণ আৰু মেয়াদ উকলি যোৱাৰ তাৰিখ নিশ্চয়কৈ পৰীক্ষা কৰক।