মুখত শালমইনাৰ সমস্যা কি কি কাৰণত হ’ব পাৰে ? প্ৰতিৰোধৰ উপায় জানক

প্ৰতীকী ফটো

কম বয়সত প্ৰায় সংখ্যক যুৱক-যুৱতীৰ মুখত শালমইনা সমস্যা দেখা যায়। এই শালমইনাবোৰক লৈ যুৱক-যুৱতী আৰু বিশেষকৈ যুৱতীসকল অতিশয় চিন্তিত। মুখখন পৰিষ্কাৰ আৰু শালমইনামুক্ত কৰি ৰাখিবলৈ যুৱক-যুৱতীসকলেও বহু ধৰণৰ প্ৰতিকাৰ ব্যৱহাৰ কৰে । কিন্তু শালমইনাৰ সমস্যা কিয় হয় তাৰ মূল কাৰণবোৰৰ প্ৰতি তেওঁলোকে গুৰুত্ব নিদিয়ে। কিয় শালমইনা হয় আৰু ইয়াক কেনেকৈ মুখৰ পৰা আঁতৰাব পাৰি ? জানোঁ আহক ।

শালমইনা সমস্যা হোৱাৰ মূল কাৰণ হৈছে ছিদ্ৰ বন্ধ হোৱা। বহু কাৰণত এনে হ’ব পাৰে। তেলীয়া ছালৰ বাবে ছিদ্ৰবোৰ প্ৰায়ে বন্ধ হৈ যায়। এনে হ’লে শালমইনা ওলাবলৈ আৰম্ভ কৰে। সাধাৰণতে চিকিৎসা আৰু ছাল পৰিষ্কাৰ কৰাৰ পিছত শালমইনা ভাল হ’বলৈ আৰম্ভ কৰে। কিন্তু, যদি ছিদ্ৰবোৰ বন্ধ হৈ থাকে, তেন্তে পুনৰ এনে সমস্যা হয়।

বিশেষজ্ঞৰ মতে, শালমইনাৰ অন্যতম কাৰণ পেটৰ উত্তাপ। পেটৰ গৰমৰ বাবে ঘাম ওলায়। ঘামৰ লগতে মলি আৰু বেক্টেৰিয়াই মুখৰ ছিদ্ৰবোৰ বন্ধ কৰি দিয়ে। যাৰ ফলত শালমইনা ওলাব পাৰে। পেটৰ উত্তাপ মুখত পিম্পল উঠাৰ অন্যতম কাৰণ যদিও শৰীৰৰ হৰম’নৰ পৰিৱৰ্তনৰ ফলতো এই সমস্যা সৃষ্টি হয়। পেট পৰিষ্কাৰ নোহোৱা আৰু শৰীৰত মলি জমা হোৱাৰ ফলত মুখৰ ছালত শালমইনাৰ সমস্যা হয় । সেইবাবেই কোৱা হয় যে, যিসকলৰ শালমইনা বেছি হয় তেওঁলোকে বাহিৰৰ খাদ্য আৰু যিকোনো ধৰণৰ ফাষ্ট ফুড খাব নালাগে।

পেট শীতল কৰি ৰাখিবলৈ পৰ্যাপ্ত পৰিমাণৰ পানী খাব লাগে আৰু শৰীৰত হাইড্ৰেট কৰি ৰাখিব লাগে। ঠাণ্ডা পানীৰে গা ধুব। টেঙা আৰু চৰ্বিযুক্ত খাদ্য পৰিহাৰ কৰিব লাগে । ছালৰ সঠিক যত্ন লওক। ছাল পৰিষ্কাৰ আৰু শুকান কৰি ৰাখক। মানসিক চাপ কমাই পৰ্যাপ্ত পৰিমাণে টোপনি যাওক। যদি শালমইনা তীব্ৰ হয় বা ভাল নহয় তেন্তে চিকিৎসকৰ পৰামৰ্শ লওক।