RRB: ৰে’লৱে নিযুক্তি ২০২৬ৰ কেলেণ্ডাৰ মুকলি, কোন দিনা কি পৰীক্ষা আছে জানক…

ৰে’লৱে নিযুক্তি পৰীক্ষা

ৰে’লৱেত চাকৰিৰ বাবে সাজু হোৱা যুৱক-যুৱতীসকলৰ বাবে ভাল খবৰ। ২০২৬ চনত অনুষ্ঠিত হ’বলগীয়া বিভিন্ন নিযুক্তি পৰীক্ষাৰ বাবে এক আংশিক পৰীক্ষাৰ কেলেণ্ডাৰ প্ৰকাশ কৰিছে ৰে’লৱে নিযুক্তি ব’ৰ্ডে। এই কেলেণ্ডাৰে পৰীক্ষাৰ্থীসকলক প্ৰতিটো পৰীক্ষা কেতিয়া অনুষ্ঠিত হোৱাৰ সম্ভাৱনা আৰু কেনেদৰে প্ৰস্তুতি চলাব লাগে সেই কথা বুজি পোৱাত সহায় কৰিব।

এই ঘোষণাই দীৰ্ঘদিন ধৰি পৰীক্ষাৰ সময়সূচীৰ বাবে অপেক্ষা কৰি থকা পৰীক্ষাৰ্থীসকলৰ বাবে সকাহ কঢ়িয়াই আনিছে। ইয়াৰ দ্বাৰা তেওঁলোকৰ প্ৰস্তুতিৰ দিশটোহে লাভ কৰাই নহয় নিযুক্তি প্ৰক্ৰিয়াতো স্বচ্ছতা বৃদ্ধি পাব।

চৰকাৰী তথ্য অনুসৰি সকলো জ’নেল ৰে’লৱে আৰু উৎপাদন ইউনিটক নিৰ্দিষ্ট সময়সীমাৰ ভিতৰত খালী পদৰ মূল্যায়ন কৰিবলৈ নিৰ্দেশ দিয়া হৈছে। এই প্ৰক্ৰিয়া অনলাইন ইন্টিগ্ৰেটেড ৰেলৱে মেনেজমেণ্ট চিষ্টেম (OIRMS)ৰ জৰিয়তে সম্পূৰ্ণ কৰা হ’ব। ইয়াৰ ফলত খালী পদৰ তথ্য একক প্লেটফৰ্মত উপলব্ধ হ’ব আৰু নিযুক্তি প্ৰক্ৰিয়া সুশৃংখলিত হ’ব।

২০২৫ চনৰ নিযুক্তিত ডুপ্লিকেচন ৰোধ কৰাৰ নিৰ্দেশনা

২০২৫ চনৰ নিযুক্তি প্ৰক্ৰিয়াত ইতিমধ্যে অন্তৰ্ভুক্ত পদসমূহ পুনৰ সংযোজন কৰিব নালাগে বুলিও ৰে’লৱে ব’ৰ্ডে স্পষ্ট কৰি দিছে। য’ত পূৰ্বৰ বাছনি প্ৰক্ৰিয়া কোনো কাৰণত সম্পূৰ্ণ কৰিব পৰা নগ’ল, তেনে ঠাইত খালী পদৰ সংখ্যা সালসলনি কৰাৰ নিৰ্দেশনা দিয়া হৈছে। ইয়াৰ উদ্দেশ্য হৈছে নতুন নিযুক্তি বৰ্ষৰ বাবে সঠিক আৰু নিৰ্ভৰযোগ্য তথ্য নিশ্চিত কৰা আৰু ডুপ্লিকেচন এৰাই চলা।

ইয়াৰ উপৰিও ২০২৬ চনৰ নিযুক্তিৰ সৈতে জড়িত সকলো সমন্বয়ৰ কামৰ বাবে এটা ন’ডেল আৰ আৰ বি নিৰ্ধাৰণ কৰা হৈছে। আৰ আৰ বি বেংগালুৰুৰ অধ্যক্ষই সকলো জ’নেল ৰে’লৱে, উৎপাদন ইউনিট, আৰু অন্যান্য আৰ আৰ বিলৈ খালী পদৰ মূল্যায়নৰ বাবে বিশদ সময়সূচী প্ৰেৰণ কৰিব। সকলো ইউনিটকে নিৰ্দেশনা অনুসৰি তাৎক্ষণিক ব্যৱস্থা গ্ৰহণ কৰিবলৈ আৰু অগ্ৰগতিৰ প্ৰতিবেদন ভাগ-বতৰা কৰিবলৈ নিৰ্দেশ দিয়া হৈছে।

পৰীক্ষাৰ কেলেণ্ডাৰ প্ৰকাশৰ ফলত টেকনিকেল, নন-টেকনিকেল আৰু অন্যান্য লোকপ্ৰিয় পদৰ বাবে প্ৰস্তুতি চলোৱা লাখ লাখ পৰীক্ষাৰ্থীৰ বাবে ভৱিষ্যতৰ কৌশল সহজ হ’ব। অৱশ্যে প্ৰতিটো পৰীক্ষাৰ বিশদ অধিসূচনা আৰু সঠিক তাৰিখ নিৰ্দিষ্ট সময়ত আৰ আৰ বিয়ে পৃথকে পৃথকে প্ৰকাশ কৰিব।