জুবিন মৃত্যুৰ গোচৰত শ্যামকানু-সিদ্ধাৰ্থসহ ৫ অভিযুক্তক ন্যায়িক জিম্মালৈ প্ৰেৰণ…

আজি CJM আদালতত হাজিৰ কৰাৰ পাছতে শ্যামকানু মহন্ত আৰু সিদ্ধাৰ্থ শৰ্মাক ন্যায়িক জিম্মালৈ প্ৰেৰণ হৈছে। ইয়াৰ লগতে সন্দীপন গাৰ্গ, নন্দেশ্বৰ বৰা, পৰেশ বৈশ্যকো ন্যায়িক জিম্মালৈ প্ৰেৰণ কৰা বুলি জানিব পৰা গৈছে । ১৪ দিনৰ ন্যায়িক জিম্মালৈ কৰা হৈছে আটাইকে। জানিব পৰা মতে, তেওঁলোকে দাখিল নকৰিলে জামিন আবেদন।

আৰক্ষীৰ জিম্মাৰ ম্যাদ শেষ হোৱাৰ পাছতে আজি CJM আদালতত হাজিৰ কৰা হয় শ্যামকানু মহন্তকে ধৰি পাঁচত অভিযুক্তক। ছিংগাপুৰত জুবিন গাৰ্গৰ মৃত্যুৰ গোচৰত অভিযুক্ত এই পাঁচজন ব্যক্তি। চিআইডিয়ে ৫ অভিযুক্তক হাজিৰ কৰি মুখ্য দণ্ডাধীশৰ আদালতত । অভিযুক্ত কেইজন হৈছে-শ্যামকানু মহন্ত, সিদ্ধাৰ্থ শৰ্মা, ভাতৃ সন্দীপন গাৰ্গ আৰু দুই দেহৰক্ষী নন্দেশ্বৰ বৰা আৰু পৰেশ বৈশ্য।

ইফালে, চলি থকা তদন্তৰ অংশ হিচাপে ছিংগাপুৰৰ প্ৰৱাসী অসমীয়া সুস্মিতা গোস্বামী, প্ৰীতম ভূঞাই শেহতীয়াকৈ চিআইডিৰ কাৰ্যালয়ত হাজিৰ হৈছে। ইয়াল লগতে দেৱজ্যোতি হাজৰিকা নামৰ আন এজন আজি হাজিৰ হোৱাৰ কথা আছে বুলি জানিবলৈ দিছে এছআইটিৰ মুৰব্বী মুন্না প্ৰসাদ গুপ্তাই। মুন্না প্ৰসাদ গুপ্তাই কয় যে, সুস্মিতা গোস্বামী, প্ৰীতম ভূঞাক জেৰা চলোৱা হৈছে।

মুন্না প্ৰসাদ গুপ্তাই কয় যে, জুবিনৰ মৃত্যুৰ সময়ত উপস্থিত থকা ছিংগাপুৰৰ ১১ জন প্ৰৱাসী অসমীয়াৰ ভিতৰত ১০ জন চি আই ডিৰ কাৰ্যালয়ত হাজিৰ হয়। আনজন ছিংগাপুৰৰ নাগৰিক হোৱাৰ বাবে তেওঁৰ ক্ষেত্ৰত কথাটো বেলেগ বুলি কয় মুন্না প্ৰসাদ গুপ্তাই। কিন্তু লগতে তেওঁ কয় যে, তেওঁ হাজিৰ হোৱাৰ ইচ্ছা প্ৰকাশ কৰিছে।