ক্ষমা খোজক ৰাহুল গান্ধীয়ে…অসমৰ পৰা ক’লে অমিত শ্বাহে, ভোটাৰ অধিকাৰ যাত্ৰাক ঘুচপেঠীয়া বাচাও যাত্ৰা আখ্যা
গুৱাহাটীৰ পৰা ৰাহুল গান্ধীক তীব্ৰ আক্ৰমণ কেন্দ্ৰীয় গৃহমন্ত্ৰী অমিত শ্বাহৰ। বিহাৰত 'ভোটাৰ অধিকাৰ যাত্ৰা' ৰ সময়ত নৰেন্দ্ৰ মোদী আৰু তেওঁৰ প্ৰয়াত মাতৃক কটু ভাষাৰে সমালোচনা কৰাৰ অভিযোগ। শীঘ্ৰেই ক্ষমা খুজিবলৈ ৰাহুল গান্ধীক আহ্বান অমিত শ্বাহৰ।
দুদিনীয়া সূচীৰে অসমত আছে কেন্দ্ৰীয় গৃহমন্ত্ৰী অমিত শ্বাহ। গুৱাহাটীৰ পৰাই নিজৰ ভাষণত ৰাহুল গান্ধীক তীব্ৰ আক্ৰমণ বিজেপিৰ জ্যেষ্ঠ নেতাগৰাকীৰ। শুকুৰবাৰে কেন্দ্ৰীয় গৃহমন্ত্ৰী অমিত শ্বাহে কয় যে বিহাৰত কংগ্ৰেছৰ ‘ভোটাৰ অধিকাৰ যাত্ৰা’ৰ সময়ত প্ৰধানমন্ত্ৰী নৰেন্দ্ৰ মোদী আৰু তেওঁৰ প্ৰয়াত মাতৃৰ বিৰুদ্ধে কৰা “আক্ৰমণাত্মক মন্তব্য”ৰ বাবে ৰাহুল গান্ধীয়ে ক্ষমা খুজিব লাগে। শ্বাহে দাবী কৰে যে বিহাৰত “ঘুচপেঠীয়া বচাও যাত্ৰা (অনুপ্ৰৱেশকাৰী বচাও যাত্ৰা)”ৰ জৰিয়তে ৰাহুল গান্ধীৰ ৰাজনীতিয়ে “নিম্ন স্তৰ” স্পৰ্শ কৰিছে।
গুৱাহাটীত ৰাজভৱনৰ নতুনকৈ নিৰ্মিত ব্ৰহ্মপুত্ৰ উইং উদ্বোধন কৰাৰ পিছত তেওঁ কয়, ‘‘ৰাহুল গান্ধীৰ যদি লাজ বাকী আছে তেন্তে ক্ষমা খুজিব লাগে। তেওঁৰ আৰু তেওঁৰ দলটোৰ প্ৰতি দেশবাসীৰ বিতৃষ্ণা উপজিছে।’’
ৰাহুল গান্ধী, কংগ্ৰেছৰ সাধাৰণ সম্পাদক প্ৰিয়ংকা গান্ধী ৱাদ্ৰা আৰু আৰজেডি নেতা তেজস্বী যাদৱে মটৰ চাইকেলেৰে মুজাফ্ফৰপুৰলৈ যাত্ৰা কৰাৰ সময়ত এখন মঞ্চৰ পৰা এজন অচিনাক্ত ব্যক্তিয়ে মোদীৰ বিৰুদ্ধে হিন্দী ব্যঞ্জনা ব্যৱহাৰ কৰা এটা কথিত ভিডিঅ’ প্ৰকাশ পায়। তাৰ পিছতেই শ্বাহ আৰু বিজেপিৰ অন্যান্য জ্যেষ্ঠ নেতাসকলে বৃহস্পতিবাৰে লোকসভাত বিৰোধী নেতাক তীব্ৰ সমালোচনা কৰিছিল।
”ঘুচপেঠীয়া বাচাও যাত্ৰা কংগ্ৰেছৰ ভোট বেংকক ৰক্ষা কৰিবলৈ, কিন্তু যিকোনো গণতন্ত্ৰত নিৰ্বাচনেই ইয়াৰ আত্মা। অনুপ্ৰৱেশকাৰীক ব্যৱস্থাটো প্ৰদূষিত কৰিবলৈ দিলে এখন দেশ কেনেকৈ নিৰাপদ হ’ব পাৰে?” শ্বাহে প্ৰশ্ন কৰে।
‘‘কংগ্ৰেছৰ ৰাজনীতি নেতিবাচক… বিহাৰত এই যাত্ৰাৰ মঞ্চৰ পৰা প্ৰধানমন্ত্ৰী আৰু তেওঁৰ প্ৰয়াত মাতৃক গালি-গালাজেৰে কংগ্ৰেছে সকলো সীমা অতিক্ৰম কৰিছে।” গৃহমন্ত্ৰীয়ে কয়। শ্বাহে দৃঢ়তাৰে কয় যে মোদীক সমগ্ৰ বিশ্বতে আদৰণি জনোৱা হয়, আৰু “কোনো আক্ৰমণে পদুম ফুলিবলৈ বাধা দিব নোৱাৰে”।
ইয়াৰ পূৰ্বে শ্বাহে দুদিনীয়া অসম ভ্ৰমণৰ দ্বিতীয় দিনা ইয়াত ৰাজভৱনৰ নৱনিৰ্মিত ব্ৰহ্মপুত্ৰ উইং উদ্বোধন কৰে। ‘নতুন অসম ৰাজভৱন উইঙৰ উদ্বোধনী ঐতিহাসিক, সংগ্ৰামৰ পৰা ‘অষ্টলক্ষ্মী’ৰ ধাৰণালৈকে উত্তৰ-পূৰ্বাঞ্চলৰ যাত্ৰাক প্ৰতিফলিত কৰিছে।’
তেওঁ ৰাজভৱন চৌহদৰ পৰা ৪৫ কোটি টকা ব্যয় সাপেক্ষে স্থাপন কৰা দেৰগাঁৱৰ লাচিত বৰফুকন পুলিচ একাডেমীত উত্তৰ পূৰ্বাঞ্চলৰ প্ৰথমটো ৰাষ্ট্ৰীয় চাইবাৰ ফৰেনছিক লেবৰেটৰী ভাৰ্চুৱেলি শুভাৰম্ভ কৰে। আৱাস কমপ্লেক্স, বেৰেক, চিকিৎসালয়কে ধৰি আই টি বি পি, এছ এছ বি আৰু অসম ৰাইফলছৰ বিভিন্ন উন্নয়নমূলক প্ৰকল্পৰ শুভাৰম্ভ আৰু শিলান্যাস কৰে শ্বাহে।
বৈদিক মন্ত্ৰোচ্চাৰণৰ মাজতে তেওঁ ৰাজভৱনৰ ভিতৰৰ মন্দিৰত প্ৰাৰ্থনা কৰাৰ লগতে ‘গো পূজন’ আৰু ‘সেন্দূৰ’ গছৰ পুলি ৰোপণ কৰে। সভাস্থলীত তেওঁক আদৰণি জনায় ৰাজ্যপাল লক্ষ্মণ প্ৰসাদ আচাৰ্য আৰু মুখ্যমন্ত্ৰী হিমন্ত বিশ্ব শৰ্মাই।
