সামাজিক আৰু শৈক্ষিকভাৱে পিছপৰা শ্ৰেণীৰ মৰ্যাদা পাব অসমৰ কিন্নৰসকলে, ৰাজ্যিক কেবিনেটৰ গুৰুত্বপূৰ্ণ সিদ্ধান্ত

ৰে’লত, বাছ ষ্টপত বা ব্যস্ত নগৰ-চহৰৰ কেতবোৰ স্থানত তেওঁলোকক প্ৰায়ে দেখা যায়। হাতৰ তালিটোৱেই তেওঁলোকৰ চিনাকি। তালি বজায় সামান্য সহায়ৰ বাবে তেওঁলোকে হাত পাতে আনৰ ওচৰত। কোনোৱে টকা-সিকি এটা দিলে, আশীৰ্বাদ কৰি যায়। অসমৰ বাহিৰত প্ৰধানতঃ উত্তৰ ভাৰতত কোনো মাংগলিক অনুষ্ঠানতো তেওঁলোকক আশীৰ্বাদ প্ৰদানৰ বাবে নিমন্ত্ৰণ জনোৱা দেখা যায়। নৃত্য-গীত কৰি তেওঁলোকে আশীৰ্বাদ দিয়ে, বিনিময়ত গৃহস্থই আগবঢ়াই মাননি।

আমি কৈছোঁ তৃতীয় লিংগৰ ব্যক্তিসকলৰ কথা। এতিয়াও কিন্তু তেওঁলোকক সমাজৰ একাংশই পৃথক দৃষ্টিৰে চাই বা তেওঁলোকৰ পৰা দূৰৈত থাকিব বিচাৰে। কিন্তু তেওঁলোকৰো আছে জীয়াই থকাৰ, সমাজৰ আন মানুহে লাভ কৰা সুবিধা লাভৰ সম্পূৰ্ণ অধিকাৰ।

অসম চৰকাৰৰ কেবিনেটে দেওবাৰৰ বৈঠকত গ্ৰহণ কৰিছে এক বিশেষ পদক্ষেপ। সেই অনুসৰি আনুষ্ঠানিকভাৱে কিন্নৰ বা তৃতীয় লিংগ বুলি পৰিচয় দিয়া ব্যক্তিক সামাজিক আৰু শৈক্ষিকভাৱে পিছপৰা শ্ৰেণীৰ মৰ্যাদা প্ৰদান কৰা হ’ব। নালছা বনাম ভাৰতীয় সংঘ গোচৰত ২০১৪ চনৰ উচ্চতম ন্যায়ালয়ৰ গুৰুত্বপূৰ্ণ ৰায়দানৰ মূলতে এই সিদ্ধান্ত দেওবাৰে ৰাজ্যিক কেবিনেট বৈঠকৰ পিছত মুখ্যমন্ত্ৰী হিমন্ত বিশ্ব শৰ্মাই ঘোষণা কৰে।

সংবাদ মাধ্যমক সম্বোধন কৰি মুখ্যমন্ত্ৰী শৰ্মাই কয়, ‘‘অসমৰ বাবে এয়া এক ঐতিহাসিক পদক্ষেপ। উচ্চতম ন্যায়ালয়ৰ নিৰ্দেশ পালন কৰি ৰাজ্যৰ কিন্নৰসকলক এতিয়া সামাজিক আৰু শৈক্ষিকভাৱে পিছপৰা শ্ৰেণীৰ মৰ্যাদা প্ৰদান কৰিব।” তেওঁ লগতে কয় যে ইয়াৰ দ্বাৰা তেওঁলোকক উন্নয়ন আৰু জনকল্যাণৰ মূলসুঁতিত একত্ৰিত কৰাত সহায়ক হ’ব।

অৱশ্যে এই বিধানৰ অধীনত সুবিধাসমূহ অসমৰ স্থায়ী বাসিন্দাসকলৰ মাজতে সীমাবদ্ধ থাকিব বুলি মুখ্যমন্ত্ৰীয়ে স্পষ্ট কৰি দিয়ে। তেওঁ কয়, ‘‘এই আঁচনিখন কেৱল থলুৱা কিন্নৰ ব্যক্তিৰ বাবেহে। যিসকলে কৰ্ম, শিক্ষা বা অন্যান্য কাৰণত অন্য ৰাজ্যৰ পৰা প্ৰব্ৰজন কৰিছে তেওঁলোক ইয়াৰ বাবে যোগ্য নহ’ব।‘‘

এই পদক্ষেপৰ লক্ষ্য হৈছে শিক্ষা, নিয়োগ, আৰু সমাজ কল্যাণৰ ক্ষেত্ৰত সঁহাৰিমূলক কাৰ্যৰ সুবিধাসমূহ দীৰ্ঘদিন ধৰি নীতিগত বক্তৃতাত সীমাবদ্ধ থকা এটা সম্প্ৰদায়লৈ সম্প্ৰসাৰিত কৰা। কিন্নৰ সম্প্ৰদায়ক আনুষ্ঠানিকভাৱে SEBC শ্ৰেণীৰ অংশ হিচাপে স্বীকৃতি দি অসমে উচ্চতম ন্যায়ালয়ৰ প্ৰগতিশীল দৃষ্টিভংগীক প্ৰশাসনিক কাৰ্যলৈ ৰূপান্তৰিত কৰা ৰাজ্যসমূহৰ এক নিৰ্বাচিত গোটত যোগদান কৰে।

২০১৪ চনৰ নালছাৰ ৰায়দানত কেন্দ্ৰ আৰু ৰাজ্য চৰকাৰ উভয়কে কিন্নৰক তৃতীয় লিংগ হিচাপে গণ্য কৰি প্ৰান্তীয় সম্প্ৰদায়ক উন্নীত কৰাৰ লক্ষ্যৰে ৰাজহুৱা আঁচনি আৰু নীতিত অন্তৰ্ভুক্ত কৰিবলৈ বাধ্যতামূলক কৰা হৈছিল।