অসম বিধানসভাৰ বাজেট অধিৱেশনৰ দিন ঘোষণা, কোন তাৰিখে দাখিল কৰা হ’ব বাজেট ?

ঘোষণা কৰা হৈছে অসম বিধানসভাৰ বাজেট অধিৱেশনৰ দিন। অসম বিধানসভা সচিবালয়ে জাৰি কৰা এক অধিসূচনা মতে, ২০২৬ চনৰ ১৬ ফেব্ৰুৱাৰীৰ পৰা অসম বিধানসভাৰ বাজেট অধিৱেশন আৰম্ভ হ’ব। অধিসূচনাখনত উল্লেখ কৰা হৈছে যে,সংবিধানৰ ১৭৪(১) অনুচ্ছেদৰ অধীনত ক্ষমতা প্ৰয়োগ কৰি ৰাজ্যপাল লক্ষ্মণ প্ৰসাদ আচাৰ্যই দিছপুৰৰ বিধানসভা চেম্বাৰত পুৱা ৯:৩০ বজাত অধিৱেশন আহ্বান কৰিছে।

অধিৱেশনৰ প্ৰথম দিনাই ৰাজ্যপালগৰাকীয়ে অংশগ্ৰহণ কৰাৰ সম্ভাৱনা আছে আৰু ১৭ ফেব্ৰুৱাৰীত ৰাজ্যৰ বাজেট দাখিল কৰাৰ সম্ভাৱনা আছে যদিও ব্যৱসায়িক পৰামৰ্শদাতা সমিতিৰ বৈঠকত এই কথা নিশ্চিত কৰা হ’ব।

ইফালে, ৰাষ্ট্ৰীয় পৰ্যায়ত কেন্দ্ৰীয় সংসদীয় পৰিক্ৰমা মন্ত্ৰী কিৰেন ৰিজিজুৱে ২৭ জানুৱাৰীত সংসদৰ দুয়োটা সদনৰ মজিয়া নেতাৰ সৰ্বদলীয় বৈঠক আহ্বান কৰিব। সংসদৰ মূল সমিতি কক্ষত অনুষ্ঠিত হ’বলগীয়া এই বৈঠকত আগন্তুক বাজেট অধিবেশনৰ বাবে নিৰ্ধাৰিত গুৰুত্বপূৰ্ণ ৰাষ্ট্ৰীয় বিষয় আৰু বিধানসভাৰ ব্যৱসায়ৰ ওপৰত আলোচনা কৰা হ’ব।

২৮ জানুৱাৰীৰ পৰা ২ এপ্ৰিললৈ চলিব সংসদীয় বাজেট অধিবেশন। প্ৰথম পৰ্যায় ২৮ জানুৱাৰীৰ পৰা ১৩ ফেব্ৰুৱাৰীলৈ, আৰু দ্বিতীয় পৰ্যায় ৯ মাৰ্চৰ পৰা ২ এপ্ৰিললৈ, মুঠ ৩০খন বৈঠক অনুষ্ঠিত হোৱাৰ সম্ভাৱনা আছে। ১ ফেব্ৰুৱাৰী, দেওবাৰে কেন্দ্ৰীয় বাজেট ২০২৬-২৭ দাখিল কৰা হ’ব। অধিৱেশনখন আনুষ্ঠানিকভাৱে আৰম্ভ হ’ব আৰু ৰাষ্ট্ৰপতি দ্ৰৌপদী মুৰ্মুৱে লোকসভা আৰু ৰাজ্যসভা উভয়ৰে সদস্যসকলক সম্বোধন কৰিব।

২৭ জানুৱাৰীত অনুষ্ঠিত হ’বলগীয়া সৰ্বদলীয় বৈঠকে কাৰ্যসূচী নিৰ্ধাৰণ কৰি আগন্তুক সংসদৰ অধিৱেশনৰ মসৃণ কাৰ্য্যবিধি নিশ্চিত কৰাৰ সম্ভাৱনা আছে।