৩ ঘণ্টা ধৰি বৈঠকত মিলিত ট্ৰাম্প-পুটিন, যুদ্ধ বিৰতিৰ সমাধান নোলালেও নতুন চিন্তাৰ উন্মেষ

আলোচনাত মিলিত ট্ৰাম্প-পুটিন

আমেৰিকাৰ ৰাষ্ট্ৰপতি ড’নাল্ড ট্ৰাম্প আৰু ৰাছিয়াৰ ৰাষ্ট্ৰপতি ভ্লাদিমিৰ পুটিনৰ বৈঠকৰ অন্ত পৰিল যদিও বহু বিষয়ত এতিয়াও আলোচনা চলি আছে। এই বৈঠকক আৰু অধিক ঐতিহাসিক বুলি গণ্য কৰা হৈছিল, কাৰণ পুটিনে দহ বছৰৰ পাছত আমেৰিকা ভ্ৰমণ কৰিছে। কিন্তু এই বৈঠকৰ ফলাফল যিমান আশা কৰা হৈছিল, তাতকৈও বেছি হতাশাজনক প্ৰমাণিত হয়।

প্ৰায় তিনি ঘণ্টাৰ আলোচনাৰ অন্ততো ইউক্ৰেইন যুদ্ধৰ ওপৰত কোনো সুনিৰ্দিষ্ট চুক্তিত উপনীত নহ’ল দুই নেতা। তদুপৰি সংবাদ মাধ্যমৰ প্ৰশ্নৰ উত্তৰ নিদিয়াকৈ ১২ মিনিটত সংবাদমেল সমাপ্ত কৰে দুয়োগৰাকী নেতাই। ট্ৰাম্প-পুটিনৰ আলোচনাত স্পষ্ট হৈ পৰিল যে আলোচনা প্ৰয়োজনীয়, কিন্তু কঠিন। সামগ্ৰিকভাৱে এই বৈঠকে আশাৰ সঞ্চাৰ কৰাৰ লগতে নতুন চিন্তাৰো উন্মেষ ঘটাইছে। ধনাত্মক আৰু ঋণাত্মক দুয়োটা দিশ পোহৰলৈ আহিছে এই বৈঠকৰ পাচত।

ধনাত্মক দিশ

প্ৰথম: বিশ্ব মঞ্চলৈ পুটিনৰ প্ৰত্যাৱৰ্তন

আলাস্কাৰ এই বৈঠকৰ আটাইতকৈ ডাঙৰ আলোকপাত আছিল যে ভ্লাদিমিৰ পুটিনক আকৌ এবাৰ আন্তঃৰাষ্ট্ৰীয় মঞ্চত আধিপত্য বিস্তাৰ কৰা দেখা গ’ল। ২০২২ চনৰ ফেব্ৰুৱাৰী মাহত ইউক্ৰেইন আক্ৰমণৰ পিছত পশ্চিমীয়া দেশসমূহে ৰাছিয়াক সম্পূৰ্ণৰূপে পৃথক কৰি ৰাখিছিল, কঠোৰ নিষেধাজ্ঞা আৰোপ কৰা হৈছিল। কিন্তু এতিয়া তেওঁ পোনপটীয়াকৈ বিশ্বৰ আটাইতকৈ শক্তিশালী ব্যক্তি আমেৰিকাৰ ৰাষ্ট্ৰপতি ড’নাল্ড ট্ৰাম্পৰ সৈতে মিলিত হৈছে। ট্ৰাম্পে কেৱল ৰেড কাৰ্পেট পাৰি নহয়, হাতচাপৰি আৰু হাঁহিৰে পুটিনক আদৰণি জনায়। এই আদৰণিয়ে পুটিনক বহুদিনৰ পৰা বিচৰা মুহূৰ্তটো দিলে।

দ্বিতীয়: ট্ৰাম্পে পুনৰ পুটিনৰ হৈ বেটিং কৰিব

ট্ৰাম্পে পুটিনক আদৰণি জনাই তেওঁৰ বাবে কূটনৈতিক বেটিং কৰিবলৈ সাজু বুলি ইংগিত দিয়ে। আমেৰিকাৰ পৰম্পৰাগত মিত্ৰ ইউৰোপীয় দেশসমূহৰ মাজত এই বাৰ্তা বিয়পি পৰিছিল যে পশ্চিমীয়া সংহতিৰ ওপৰত হেঁচা প্ৰয়োগ কৰিলেও ৰাছিয়াক আলোচনাৰ টেবুলত ৰখাটোৱেই ট্ৰাম্পৰ অগ্ৰাধিকাৰ।

তৃতীয়: ভাৰতৰ ভূমিকা আৰু ট্ৰাম্পৰ বাজি

এই বৈঠকৰ ৰাজনৈতিক আৰু কূটনৈতিক সংকেত ভাৰতৰ বাবেও গুৰুত্বপূৰ্ণ, কাৰণ আলোচনাৰ পূৰ্বে ট্ৰাম্পে ৰাছিয়াৰ পৰা ভাৰতৰ তেল আমদানিক লক্ষ্য কৰি এক বিবৃতি দিছিল। ৰেডিঅ’ সাক্ষাৎকাৰত ট্ৰাম্পে দাবী কৰে যে ভাৰতৰ ওপৰত আৰোপ কৰা আমেৰিকাই শুল্ক আৰোপ কৰাৰ কাৰণেই পুটিনে আলোচনাত সন্মতি প্ৰকাশ কৰিছে। বিশেষজ্ঞসকলৰ মতে এই হেঁচা ভাৰতৰ জৰিয়তে ৰাছিয়ালৈ বাৰ্তা প্ৰেৰণৰ বাবে ট্ৰাম্পৰ কৌশলৰ অংশ। যিহেতু বৈঠকৰ পৰা কোনো সুনিৰ্দিষ্ট একো ওলোৱা নাই, গতিকে এই পৰিস্থিতিত আমেৰিকাই ভাৰতক পুনৰ লক্ষ্য কৰি ল’ব নোৱাৰে।

ঋণাত্মক দিশ

প্ৰথম: তিনি বছৰ ধৰি চলি থকা যুদ্ধ শেষ নহ’ব

নেতিবাচক দিশৰ কথা ক’বলৈ গ’লে প্ৰথম চিন্তা হৈছে যে আলোচনা চলি থকাৰ পিছতো যুদ্ধ অব্যাহত থাকিব। কোনো চুক্তি নহ’লে পৰিস্থিতি একেই থাকিব আৰু সাধাৰণ জনতাৰ দুখ-কষ্ট বাঢ়িব। ৰাছিয়াৰ ৰাষ্ট্ৰপতি পুটিনে নিজৰ চৰ্তত ইউক্ৰেইনৰ সৈতে যুদ্ধৰ অন্ত পেলাব বিচাৰিছে। যুদ্ধৰ অন্ত পেলোৱাৰ দিশত আলাস্কাৰ বৈঠকত কোনো একমতত উপনীত হ’ব নোৱাৰাৰ অন্যতম কাৰণ এইটোৱেই হ’ব পাৰে।

দ্বিতীয়: ইউৰোপ আৰু আমেৰিকাৰ ওপৰত আস্থাৰ অভাৱ

দ্বিতীয়টো ডাঙৰ চিন্তা হৈছে ইউৰোপ আৰু আমেৰিকাৰ মিত্ৰ দেশসমূহৰ আস্থা হ্ৰাস পাব। যদি আমেৰিকাই ৰাছিয়াৰ প্ৰতি নম্ৰতা প্ৰদৰ্শন কৰে, তেন্তে ইউৰোপীয় ৰাষ্ট্ৰসমূহে অনুভৱ কৰিব পাৰে যে তেওঁলোকৰ নিৰাপত্তাৰ স্বাৰ্থক আওকাণ কৰা হৈছে। এই বৈঠকৰ পূৰ্বেও ইউৰোপত ইউক্ৰেইনৰ মিত্ৰ দেশসমূহে জোৰ দিছিল যে ৰাছিয়াৰ সৈতে যিকোনো ধৰণৰ শান্তি আলোচনাত ইউক্ৰেইনক অন্তৰ্ভুক্ত কৰা উচিত।

তৃতীয়: আমেৰিকাৰ বাবে ভাৰসাম্য ৰক্ষাৰ প্ৰত্যাহ্বান

আমেৰিকাৰ বাবে তৃতীয়টো গুৰুত্বপূৰ্ণ প্ৰত্যাহ্বান হ’ল ৰাছিয়া আৰু ইউৰোপৰ মাজত ভাৰসাম্য ৰক্ষা কৰা। এফালে ট্ৰাম্পে পুটিনৰ সৈতে সম্পৰ্ক উন্নত কৰিব বিচাৰে, আনফালে নাটো দেশৰ আশাক আওকাণ কৰিব নিবিচাৰে। এই ভাৰসাম্য ৰক্ষাৰ কাৰ্য আমেৰিকাৰ বৈদেশিক নীতিৰ বাবে এক কঠিন পথত পৰিণত হ’ব পাৰে।