কৰুণ! চলন্ত ৰে’লৰ ওপৰত ভাঙি পৰিল ক্ৰেন, ২২ জন যাত্ৰীৰ মৃত্যু…

ভয়ংকৰ ৰে'ল দুৰ্ঘটনা

থাইলেণ্ডত সংঘটিত হৈছে এক বৃহৎ ৰে’ল দুৰ্ঘটনা। য’ত কমেও ২২ জন লোকৰ মৃত্যু হৈছে। এ এফ পি সংবাদ সংস্থাই প্ৰকাশ কৰা অনুসৰি এখন ক্ৰেন ভাঙি ৰে’লখন লাইনচ্যুত হয়। থাইলেণ্ডৰ ৰাজধানীৰ পৰা দেশৰ উত্তৰ-পূব অংশলৈ গৈ আছিল ৰে’লখন। বিষয়াসকলে জনোৱা মতে, বুধবাৰে স্থানীয় সময় অনুসৰি পুৱা প্ৰায় ৯ বজাত বেংককৰ পৰা ২৩০ কিলোমিটাৰ উত্তৰ-পূবৰ ৰাটচাচিমা প্ৰদেশৰ ছিখিঅ’ জিলাত সংঘটিত হয় এই দুৰ্ঘটনা। স্থানীয় আৰক্ষী আৰু উদ্ধাৰকাৰী দলে উদ্ধাৰ অভিযানত নিয়োজিত হৈ আছে।

এজন আৰক্ষী বিষয়াই জনোৱা মতে, দুৰ্ঘটনাস্থলীত তীব্ৰবেগী ৰে’ল লাইন নিৰ্মাণৰ কাম চলি আছে। বেংককৰ পৰা ৰে’লখন আহি পোৱাৰ লগে লগে নিৰ্মাণ ক্ৰেনখন ৰে’লৰ ওপৰত পৰে। ক্ৰেনখন ভাঙি পৰাৰ ফলত ৰে’লখন লাইনচ্যুত হয় আৰু কেইবাটাও বগীত জুই লাগে। আৰক্ষীয়ে জনোৱা মতে, অগ্নিকাণ্ড নিয়ন্ত্ৰণ কৰি উদ্ধাৰ অভিযান অব্যাহত আছে।

এই সন্দৰ্ভত এক্সৰত এক বিবৃতি প্ৰকাশ কৰি দুৰ্ঘটনাটোৰ বিশদ বিৱৰণ দিয়ে থাইলেণ্ড চৰকাৰে। ইয়াত উল্লেখ কৰা হৈছে, “আজি পুৱা (১৪ জানুৱাৰী) পুৱা ৯:০৫ বজাত ছিখিউত তীব্ৰবেগী ৰে’ল দলঙৰ বাবে ব্যৱহাৰ কৰা এখন নিৰ্মাণ ক্ৰেন নাখোন ৰাটচাচিমা এখন চলন্ত যাত্ৰীবাহী ৰে’লৰ ওপৰত পৰে। যাৰ ফলত ৰে’লখন লাইনচ্যুত হয় আৰু জুই লাগে। ৩০ জনতকৈ অধিক যাত্ৰী আহত হয়, বহুকেইজন লোক গাড়ীৰ ভিতৰত আবদ্ধ হৈ পৰে। কেইবাটাও উদ্ধাৰকাৰী দল ঘটনাস্থলীলৈ স্থানলৈ প্ৰেৰণ কৰা হৈছে।”

দুৰ্ঘটনাত আহত ৭৯ জন লোক

থাইলেণ্ড আৰক্ষীয়ে এক বিবৃতিযোগে ২২ জন লোকৰ মৃত্যু হোৱা বুলি নিশ্চিত কৰিছে। এই দুৰ্ঘটনাত ৭৯ জন লোক আহত হোৱাৰ বিপৰীতে আহত ৮ জনৰ অৱস্থা সংকটজনক। থাইলেণ্ড ৰে’লৱেই প্ৰকাশ কৰা অনুসৰি ৰে’লখনত ১৯৫ জন লোক আছিল। এই সংখ্যা আসনৰ পৰিকল্পনাৰ ওপৰত ভিত্তি কৰি তৈয়াৰ কৰা হৈছে। প্ৰকৃত সংখ্যা বেলেগ হ’ব পাৰে। থাইলেণ্ডৰ উপ-প্ৰধানমন্ত্ৰী তথা পৰিবহণ মন্ত্ৰী পিপট ৰাটচকিতপ্ৰকৰ্ণে এই দুৰ্ঘটনাৰ কাৰণৰ সম্পূৰ্ণ আৰু ব্যাপক তদন্তৰ নিৰ্দেশ দিছে।

লগতে পঢ়ক: অধিক ভয়াৱহ হৈছে পৰিস্থিতি! ইৰাণত চৰকাৰ বিৰোধী প্ৰতিবাদত ২ হাজাৰৰো অধিক লোকৰ মৃত্যু…