এনে স্থানত মুক্তহস্তে ধন দিয়া মানেই জীৱনলৈ ভুগিব আপুনি, চাণক্যই দি গৈছে উপদেশ

অনুসৰণ কৰক চাণক্যৰ এই নীতি

জীৱনৰ দৈনন্দিন প্ৰয়োজনীয়তা, সুখ-সমৃদ্ধিৰ বাবে সকলোকে প্ৰয়োজন ধনৰ। ধন উপাৰ্জনৰ বাবে সকলোৱে নিজ জীৱনত ভিন্ন ধৰণে পৰিশ্ৰম কৰে। পিছে ধন উপাৰ্জন কৰিলেই নহ’ব, উপাৰ্জিত ধন সঠিক মাত্ৰাত খৰচ আৰু সঠিক স্থানত বিনিয়োগ কৰাটোও গুৰুত্বপূৰ্ণ। যদি আপুনি উপাৰ্জিত ধনৰ ক্ষেত্ৰত সঠিক সিদ্ধান্ত নলয়, তেতিয়া জীৱন হৈ পৰিব পাৰিব দুৰ্বিষহ। এনে এক কথাই কেইবাশ বছৰৰ পূৰ্বে কৈ গৈছে আচাৰ্য চাণক্যই। আচাৰ্য চাণক্যক নৈতিকতা আৰু অৰ্থনীতিৰ পণ্ডিত হিচাপে গণ্য কৰা হয়। সেয়ে তেওঁৰ নীতি বৰ্তমান সময়তো প্ৰাসঙ্গিক হৈ আছে।

আচাৰ্য চাণক্যই দিয়া উপদেশ মতে, যদি আপুনি ভুল স্থানত ধন বিনিয়োগ কৰে বা খৰচ কৰে, তেতিয়া আপুনি গোটেই জীৱন অনুশোচনাত দগ্ধ হ’ব লাগিব। চাণক্যই উল্লেখ কৰা এই ভুল স্থানসমূহ পিছে কি কি, চাওঁ আহক এই বিষয়ে-

দায়িত্বহীন লোকক নিদিব ধন

আচাৰ্য চাণক্যৰ পৰামৰ্শ মতে যিসকল লোক দায়বদ্ধ নহয়, তেনে লোকক টকা দিলে সেয়া ঘূৰাই পোৱাৰ আশা ক্ষীণ। এনে লোকে ধন সঠিকভাৱে ব্যৱহাৰ নকৰে, সেয়েহে তেওঁলোকে টকা ঘূৰাই দিব নোৱাৰে।

ভুল ঠাইত বিনিয়োগ কৰা

চাণক্যই কয় যে যি ব্যৱসায়িক ক্ষেত্ৰৰ বিষয়ে সঠিক জ্ঞান নাথাকে, সেই ব্যৱসায়ত প্ৰৱেশ কৰাটো উচিত নহয়। আনৰ পৰামৰ্শৰ ভিত্তিত এনে ব্যৱসায়ত বিনিয়োগ কৰাটো একেবাৰেই সঠিক নহয়।

চখ পূৰণৰ বাবে খৰচ

ধন লাভ কৰাৰ লগে লগে অধিক লোকে বিলাসী সামগ্ৰী আৰু দামী গেজেটত খৰচ কৰিবলৈ আৰম্ভ কৰে। চাণক্যই কয় যে এনে কৰিলে ভৱিষ্যতে আৰ্থিক সংকটে দেখা দিব পাৰে।

ঋণ দিয়া

আচাৰ্য চাণক্যই কয় যে ঋণ পৰিশোধ কৰিব নোৱাৰা ব্যক্তিক ধন ধাৰে দিয়াটো মূৰ্খামি। তেনে লোকক ধন দিলে পিছত অনুশোচনাত ভুগিবলগা হয়।

দেখুৱাব নালাগে

বিবাহ বা যিকোনো অনুষ্ঠানৰ বাবে অত্যধিক খৰচৰ ফলত ব্যক্তি আৰ্থিক পতনৰ সন্মুখীন হয়। চাণক্যই কয় যে দেখুৱাবলৈ টকা অপচয় কৰাটো উচিত নহয়।

লোভ ত্যাগ

স্বাভাৱিকতেই মানুহে সোনকালে ধনী হ’ব বিচাৰে। পিছে চাণক্যই স্পষ্ট ভাষাত এনে লোভৰ পৰা আঁতৰি থকাৰ উপদেশ দিছে। কাৰণ সোনকালে ধনী হোৱাৰ লোভ প্ৰায়ে প্ৰৱঞ্চনাৰ সৈতে জড়িত।