কৰ্কট ৰোগৰ চিকিৎসাৰ সময়ত দেখুৱাব লাগিব ধূমপানৰ ইতিহাস, গৱেষণাত প্ৰকাশ…

কৰ্কট ৰোগৰ চিকিৎসাৰ সময়ত দেখুৱাব লাগিব ধূমপানৰ ইতিহাস

কৰ্কট ৰোগৰ চিকিৎসা অতি কঠিন আৰু ব্যয়বহুল। এই কাৰণেই বেছিভাগ মানুহেই ইয়াৰ সঠিক চিকিৎসা কৰিবলৈ সক্ষম নহয়। এইমছ দিল্লী, কানাডাস্থিত মেকমাষ্টাৰ বিশ্ববিদ্যালয় আৰু ফ্ৰান্সস্থিত আন্তঃৰাষ্ট্ৰীয় কৰ্কট গৱেষণা সংস্থাৰ বিশেষজ্ঞসকলে এই কৰ্কট ৰোগ সন্দৰ্ভত এক ডাঙৰ তথ্য প্ৰকাশ কৰিছে। তেওঁলোকৰ গৱেষণাত প্ৰকাশ পাইছে যে ধূমপানে চিকিৎসাৰ কাৰ্যকাৰিতা আৰু ৰোগীৰ জীয়াই থকাৰ হাৰ হ্ৰাস কৰিছে। সেইবাবেই ধূমপানৰ অৱস্থা লিপিবদ্ধ কৰাৰ প্ৰয়োজনীয়তাৰ ওপৰত গুৰুত্ব আৰোপ কৰা হৈছে। এইটো স্পষ্ট যে যদি আপোনাৰ কেন্সাৰ হৈছে আৰু আপুনি চিগাৰেট খায়, তেন্তে আপোনাক সেই অনুসৰি চিকিৎসা কৰা হ’ব।

বিশেষজ্ঞসকলে তেওঁলোকৰ গৱেষণাত বিচাৰি উলিয়াইছে যে ধূমপান কৰাসকলৰ ওপৰত চিকিৎসাৰ প্ৰভাৱ কমকৈ পৰে। কেতিয়াবা চিকিৎসাই কাম কৰিলেও দীৰ্ঘদিনলৈ ফলপ্ৰসূ নহয়। ইয়াৰ বাবেই ৰোগীৰ জীয়াই থকাৰ হাৰ ক্ৰমাগতভাৱে হ্ৰাস পাইছে। বিশেষজ্ঞসকলে তেওঁলোকৰ গৱেষণাৰ অন্তত পৰামৰ্শ দিছে যে ধূমপানৰ তথ্য লিপিবদ্ধ কৰিব লাগে আৰু ইয়াৰ তথ্য কৰ্কট ৰোগৰ চিকিৎসাৰ সময়ত ৰাখিব লাগে। যাতে সেই অনুসৰি চিকিৎসা কৰিব পৰা যায়।

ধঁপাত অবিৰত সেৱনে চিকিৎসাৰ ওপৰত প্ৰভাৱ পেলায়

গৱেষণাৰ অন্তত বিশেষজ্ঞই স্পষ্ট কৰি দিয়ে যে ধূমপান বা ধঁপাত সেৱনে চিকিৎসাৰ ওপৰত প্ৰত্যক্ষ প্ৰভাৱ পেলায়। লগতে গুৰুত্ব আৰোপ কৰে যে চিকিৎসা আৰম্ভ হোৱাৰ আগতে ধূমপানৰ তথ্য ৰাখিব লাগে। চলিত মাহতে এই প্ৰতিবেদন প্ৰকাশ কৰিছে লেন্সেট অংক’লজীয়ে। ইয়াৰ লগতে কোৱা হৈছিল যে ইয়াৰ ফলত পৰীক্ষা ব্যৱস্থাৰ উন্নতি হ’ব আৰু চিকিৎসাৰ প্ৰভাৱ বৃদ্ধি পাব। যদি এনেকুৱা হয় তেন্তে মানুহৰ জীয়াই থকাৰ সম্ভাৱনা অধিক হ’ব।

এই গৱেষণাত এইমছ দিল্লীৰ ডাঃ অভিষেক শংকৰকে ধৰি ৭ জন বিশেষজ্ঞই কয় যে চিকিৎসাৰ সময়ত ধূমপানৰ অৱস্থাৰ বিষয়ে লাভ কৰা তথ্যই চিকিৎসাৰ সিদ্ধান্তত প্ৰভাৱ পেলাব পাৰে। তেওঁলোকে যুক্তি দিছিল যে ধঁপাত সেৱনৰ মূল্যায়নৰ সমস্যাসমূহ অতিক্ৰম কৰি আৰু অংক’লজী গৱেষণা প্ৰট’কলত ধূমপান বন্ধ কৰাৰ পদক্ষেপসমূহ অন্তৰ্ভুক্ত কৰিলে পৰীক্ষাসমূহৰ ফলাফল উন্নত হ’ব।

ঔষধৰ মাত্ৰা দুগুণ হ’ব

গৱেষণাৰ পৰা দেখা গৈছে যে চিকিৎসাৰ সময়ত ধূমপান অব্যাহত ৰখা ৰোগীৰ বাবে এৰল’টিনিবৰ মাত্ৰা দুগুণ কৰিব লাগিব। যদি কোনো ৰোগীক প্ৰতিদিনে ১৫০ মিলিগ্ৰাম ড’জ দিয়া হৈছে, তেন্তে তেওঁৰ ড’জ ৩০০ মিলিগ্ৰামলৈ বৃদ্ধি কৰিব লাগিব। এনে কৰিলে চিকিৎসা ভাল হ’ব আৰু ৰোগ হ্ৰাস হ’ব।

গতিকে কেন্সাৰ চিকিৎসাৰ সময়ত ধূমপানৰ অৱস্থা লিপিবদ্ধ কৰাটো এতিয়া কেৱল বিকল্প নহয়, কেন্সাৰ গৱেষণাৰ এক অপৰিহাৰ্য উপাদান বুলি গণ্য কৰা উচিত। চিকিৎসকসকলে তেওঁলোকৰ গৱেষণাত স্পষ্ট কৰি দিছিল যে তথ্যৰ অভাৱত চিকিৎসাৰ ওপৰত প্ৰভাৱ পৰে। লগতে বহু ৰিপৰ্টৰ তথ্যও সলনি হয়।