RSS ৰ মঞ্চত প্ৰধানমন্ত্ৰী নৰেন্দ্ৰ মোদী, উন্মোচন কৰিলে ১০০ টকীয়া মুদ্ৰা আৰু ডাক টিকট…

নৰেন্দ্ৰ মোদী

RSSৰ শতবাৰ্ষিকী উপলক্ষে বুধবাৰে প্ৰধানমন্ত্ৰী নৰেন্দ্ৰ মোদীয়ে উন্মোচন কৰিলে বিশেষ মুদ্ৰা আৰু ডাক টিকট। আৰ এছ এছৰ শতবাৰ্ষিকী অনুষ্ঠানত মুখ্য অতিথি হিচাপে অংশ গ্ৰহণ কৰে মোদীয়ে। এই সময়চোৱাতে তেওঁ ১০০ টকীয়া মুদ্ৰা আৰু ডাক টিকট উন্মোচন কৰে।

১০০ টকীয়া এই মুদ্ৰাটোৰ এফালে জাতীয় প্ৰতীক, আনটো ফালে সিংহৰ সৈতে ভাৰত মাতাৰ প্ৰতিচ্ছবি আৰু শ্ৰদ্ধাৰে প্ৰণাম কৰা নিষ্ঠাবান স্বেচ্ছাসেৱকক স্থান দিয়া হৈছে। মোদীয়ে কয় যে, সম্ভৱতঃ স্বাধীন ভাৰতৰ ইতিহাসত প্ৰথমবাৰৰ বাবে ভাৰত মাতাৰ ভাবমূৰ্তি ভাৰতীয় মুদ্ৰাৰ ওপৰত দেখুওৱা হৈছে। এই বিশেষ মুদ্ৰাটোত আৰ এছ এছৰ মন্ত্ৰ, “ৰাষ্ট্ৰ সাহা, ইদাম ৰাষ্ট্ৰ, ইদাম না মম” অৰ্থাৎ “দেশৰ বাবে সকলো ত্যাগ কৰক, সকলো দেশৰ, একো মোৰ নহয়” বুলি উল্লেখ আছে।

মোদীয়ে কয় যে, আজি বিশেষ ডাক টিকট এটাও মুকলি কৰা হৈছে। আমি সকলোৱে জানো যে, ১৯৬৩ চনত আৰ এছ এছৰ স্বেচ্ছাসেৱকসকলে ২৬ জানুৱাৰীত ৰাষ্ট্ৰীয় পেৰেডত অংশগ্ৰহণ কৰি গৌৰৱেৰে সমদল উলিয়াইছিল। এই ডাকটিকটটোৱে সেই ঐতিহাসিক মুহূৰ্তটোক স্মৰণ কৰে। জাতিৰ সেৱাৰ বাবে উৎসৰ্গিত আৰ এছ এছৰ স্বেচ্ছাসেৱকসকলো ডাকটিকটত প্ৰতিফলিত হৈছে। এই বিশেষ সময়চোৱাত মোদীয়ে সকলোকে অভিনন্দন জ্ঞাপন কৰে।

মোদীয়ে কয় যে, “সংঘই কেৱল নিজৰ নহয় আনৰো পৰীক্ষা কৰে। সংঘত সাধাৰণ মানুহে একত্ৰিত হৈ অসাধাৰণ কাম কৰে। সংঘ শাখা এনে এক প্ৰেৰণাৰ ভূমি য’ত অহংকাৰৰ পৰা মোহলৈ যাত্ৰা আৰম্ভ হয়”। মোদীয়ে আৰু কয়, ”শাখাই শাৰীৰিক আৰু মানসিক বিকাশৰ পোষকতা কৰে। সংঘৰ বাবে জাতিটোৱেই প্ৰথম। স্বাধীনতা আন্দোলনত সংঘই অংশগ্ৰহণ কৰিছিল। ১৯৪২ চনত ব্ৰিটিছ বিৰোধী আন্দোলনৰ সময়ত স্বেচ্ছাসেৱকসকলে অত্যাচাৰ সহ্য কৰিছিল। সংঘই অগণন ত্যাগ কৰিছে। সংঘৰ বিৰুদ্ধে বিভিন্ন ষড়যন্ত্ৰ চলিছিল, স্বাধীনতাৰ পাছত সংঘক বহু অত্যাচাৰ কৰা হৈছিল। কিন্তু সংঘৰ লক্ষ্য হৈছে এক ভাৰত, এক মহান ভাৰত’।

উল্লেখ্য যে,  সাংস্কৃতিক মন্ত্ৰালয়ৰ উদ্যোগত এই অনুষ্ঠানৰ আয়োজন কৰা হয়। প্ৰধানমন্ত্ৰী মোদীৰ লগতে এই অনুষ্ঠানত আৰ এছ এছৰ সাধাৰণ সম্পাদক দত্তত্ৰেয় হোছাবালে, দিল্লীৰ মুখ্যমন্ত্ৰী ৰেখা গুপ্তা আৰু সাংস্কৃতিক মন্ত্ৰী গজেন্দ্ৰ সিং শ্বেখাৱাটও উপস্থিত থাকে।

অন্য খবৰ পঢ়কঃ ব্যৱহাৰ কৰিছিল ক’লা ধন হিচাপে! এতিয়াও মানুহৰ হাতত আছে ৫,৮৮৪ কোটি টকাৰ ২০০০ টকীয়া নোট…