‘আমাৰেই ভাতৃ, এদিন ঘূৰি আহিব…’ POK সন্দৰ্ভত দৃঢ়তা প্ৰকাশ ৰাজনাথ সিঙৰ

ৰাজনাথ সিং

ভাৰতীয় উদ্যোগ সংঘ চমুকৈ চি আই আইৰ বাৰ্ষিক ব্যৱসায় সন্মিলন-২০২৫ৰ উদ্বোধনী অনুষ্ঠানত অংশ গ্ৰহণ কৰে প্ৰতিৰক্ষা মন্ত্ৰী ৰাজনাথ সিঙে । এই অনুষ্ঠানত ভাষণ প্ৰদান কৰি তেওঁ PoK ত বসবাস কৰা লোকসকলৰ বিষয়ে উল্লেখ কৰে । সিঙে কয় যে তেওঁলোক নিশ্চিতভাৱে কোনোবা এদিন ভাৰতৰ মূলসুঁতিলৈ ঘূৰি আহিব । “মই জানো যে তাত থকা বেছিভাগ মানুহেই ভাৰতৰ সৈতে সম্পৰ্ক অনুভৱ কৰে, কিন্তু কিছুমানক বিপথে পৰিচালিত কৰা হৈছে ।”

ৰাজনাথ সিঙে আৰু কয়, “PoK ত বসবাস কৰা আমাৰ ভাইসকলৰ অৱস্থা সাহসী যোদ্ধা মহাৰাণা প্ৰতাপৰ কনিষ্ঠ ভাতৃ শক্তি সিঙৰ দৰেই । সৰু ভায়েক বিচ্ছেদ হোৱাৰ পিছতো ডাঙৰ ভায়েকৰ তেওঁৰ ওপৰত থকা বিশ্বাস অক্ষুণ্ণ আছিল । ৰাণাই ভায়েকৰ কথা কৈছিল, ভুল পথ এৰি নিজেই সঠিক পথত আহিব, সি মোৰ ভাই, মোৰ পৰা কেনেকৈ আঁতৰি যাব।”

“নিজেই উভতি আহি ক’ব যে তেওঁ ভাৰত”

ৰাজনাথ সিঙে আৰু কয়, “ভাৰতে সদায় সুহৃদয়েৰে সংযোগ কৰাৰ কথা কয় । আমাৰ নিজৰ অংশৰ PoK ঘূৰি আহি ক’ব যে তেওঁ ভাৰত, ঘূৰি আহিছে । ভাৰতৰ সৈতে PoK ৰ একত্ৰীকৰণ এই দেশৰ সাংস্কৃতিক, সামাজিক আৰু অৰ্থনৈতিক সমৃদ্ধিৰ ওপৰত নিৰ্ভৰশীল ।”

ৰাজনাথ সিঙে লগতে কয়, “মোৰ বিশ্বাস যে পাকিস্তানে দখল কৰা কাশ্মীৰ (POK)ৰ জনসাধাৰণ আমাৰ নিজৰ, আমাৰ পৰিয়ালৰ এটা অংশ । আমি এক ভাৰত শ্ৰেষ্ঠ ভাৰতৰ সংকল্পৰ প্ৰতি দায়বদ্ধ আৰু আমাৰ সম্পূৰ্ণ বিশ্বাস আছে যে আজি ভৌগোলিক আৰু ৰাজনৈতিকভাৱে আমাৰ পৰা বিচ্ছিন্ন হৈ থকা আমাৰ ভাইসকলো কোনোবাদিনা নিজৰ আত্মসন্মান আৰু স্বেচ্ছাই ভাৰতৰ মূলসুঁতিলৈ ঘূৰি আহিব ।”

“প্ৰতিৰক্ষা খণ্ড নতুন উচ্চতাত উপনীত হৈছে”

এই সন্দৰ্ভত ৰাজনাথ সিঙে কয়, “এজন প্ৰতিৰক্ষা মন্ত্ৰী হিচাপে মই অতি সুখী যে প্ৰথমবাৰৰ বাবে ভাৰতৰ যাত্ৰাত দেশৰ প্ৰতিৰক্ষা খণ্ডইও গুৰুত্বপূৰ্ণ ভূমিকা পালন কৰিছে । যোৱা দশকত চৰকাৰৰ বহু পদক্ষেপৰ বাবে ভাৰতৰ প্ৰতিৰক্ষা খণ্ডই নতুন উচ্চতা লাভ কৰিছে ।”

তেওঁ কয়, “১০-১১ বছৰ পূৰ্বে আমাৰ প্ৰতিৰক্ষা উৎপাদন ৪৩,৭৪৬ কোটি টকা আছিল যদিও আজি ই ১,৪৬,০০০ কোটি টকাৰ অভিলেখ সৃষ্টি কৰিছে । ইয়াত ব্যক্তিগত খণ্ডই ৩২,০০০ কোটিতকৈ অধিক ধন আগবঢ়োৱাটো গৌৰৱৰ বিষয় ।”

তেওঁ আৰু কয়, “ইয়াৰ লগে লগে আমাৰ প্ৰতিৰক্ষা ৰপ্তানি, যিটো ১০ বছৰৰ আগতে হাজাৰ কোটি টকাতকৈও কম আছিল, আজি ২৩,৫০০ কোটি টকাৰ অভিলেখ সৃষ্টি কৰিছে । আজি কেৱল অস্ত্ৰ-শস্ত্ৰই নহয়, আমাৰ ব্যৱস্থা, উপ-ব্যৱস্থা, উপাদান আৰু সেৱাও বিশ্বৰ ১০০ খনতকৈও অধিক দেশত উপনীত হৈছে ।”

প্ৰতিৰক্ষা মন্ত্ৰীগৰাকীয়ে কয়, “আজি দেশৰ প্ৰতিৰক্ষা খণ্ডৰ সৈতে ১৬ হাজাৰৰো অধিক এমএছএমই জড়িত হৈ আছে । এই সৰু সৰু কোম্পানীবোৰ আমাৰ যোগান শৃংখলৰ মেৰুদণ্ড হৈ পৰিছে । আমাৰ আত্মনিৰ্ভৰশীলতাৰ যাত্ৰাক শক্তিশালী কৰাই নহয়, লাখ লাখ লোকক কৰ্মসংস্থাপনো প্ৰদান কৰিছে ।”

অপাৰেচন সেন্দূৰ

অপাৰেচন সেন্দূৰৰ কথা উল্লেখ কৰি তেওঁ কয়, “আজি আমি কেৱল যুঁজাৰু বিমান বা মিছাইল ব্যৱস্থা নিৰ্মাণ কৰাই নহয়, নিউ এজ ৱাৰফেয়াৰ টেকন’লজিৰ বাবেও সাজু হৈছো । আমাৰ ঘৰতে উৎপাদিত ব্যৱস্থাই আজি সমগ্ৰ বিশ্বক আচৰিত কৰি তুলিছে, অপাৰেচন সেন্দূৰে প্ৰমাণ কৰিছে যে শত্ৰুৰ যিকোনো কৱচত সোমাই যোৱাৰ শক্তি আমাৰ আছে ।”

ৰাজনাথ সিঙে কয়, “অপাৰেচন সেন্দূৰৰ সময়ত আপোনালোকে দেখিছিল যে আমি প্ৰথমে সন্ত্ৰাসবাদীৰ আত্মগোপন স্থান আৰু তাৰ পিছত শত্ৰুৰ সামৰিক ঘাটি, বিমান ঘাটি কেনেকৈ ধ্বংস কৰিলোঁ । আমি আৰু বহুত কৰিব পাৰিলোহেঁতেন, কিন্তু আমি ক্ষমতা আৰু সংযমৰ মাজত সমন্বয়ৰ এক ডাঙৰ উদাহৰণ বিশ্বৰ আগত দাঙি ধৰিলোঁ । আত্মনিৰ্ভৰশীলতাৰ বেনাৰত আমি Critical আৰু frontier প্ৰযুক্তিৰ ওপৰতো নিৰন্তৰ সফলতা অৰ্জন কৰি আছো । এআই, চাইবাৰ ডিফেন্স, আনমেনড চিষ্টেম, আৰু স্পেচ বেছড ছিকিউৰিটিৰ ক্ষেত্ৰত ভাৰতৰ দখল এতিয়া বিশ্বৰ মঞ্চত সুদৃঢ়ভাৱে প্ৰতিষ্ঠিত হৈছে ।”