খালেদা জিয়াৰ শেষকৃত্য অনুষ্ঠানত উপস্থিত থাকিব ভাৰতৰ বিদেশ মন্ত্ৰী এছ জয়শংকৰ

এছ জয়শংকৰ

বৈদেশিক পৰিক্ৰমা মন্ত্ৰালয়ৰ এক বিবৃতি অনুসৰি বুধবাৰে বাংলাদেশৰ প্ৰথমগৰাকী মহিলা প্ৰধানমন্ত্ৰী খালেদা জিয়াৰ অন্ত্যেষ্টিক্ৰিয়াত অংশগ্ৰহণ কৰিব বৈদেশিক পৰিক্ৰমা মন্ত্ৰী এছ জয়শংকৰে। বিবৃতিটোত কোৱা হৈছে যে, “বাংলাদেশৰ প্ৰাক্তন প্ৰধানমন্ত্ৰী তথা বাংলাদেশ জাতীয়তাবাদী পাৰ্টিৰ অধ্যক্ষ বেগম খালেদা জিয়াৰ অন্ত্যেষ্টিক্ৰিয়াত বৈদেশিক পৰিক্ৰমা মন্ত্ৰী ড° এছ জয়শংকৰে ভাৰত চৰকাৰ আৰু জনসাধাৰণক প্ৰতিনিধিত্ব কৰিব। সেই অনুসৰি তেওঁ ৩১ ডিচেম্বৰত ঢাকা ভ্ৰমণ কৰিব।”

ঢাকাৰ এভাৰকেয়াৰ হাস্পতালত চিকিৎসাধীন অৱস্থাত আজি পুৱা ৮০ বছৰ বয়সত বেগম খালেদা জিয়াৰ মৃত্যু হয়। ফেচবুকত বিএনপিৰ এক বিবৃতি অনুসৰি, ফজৰৰ নামাজৰ কিছু সময়ৰ পিছতে পুৱা প্ৰায় ৬ বজাত (স্থানীয় সময় অনুসৰি) খালেদা জিয়াৰ মৃত্যু হয়। “খালেদা জিয়াৰ মৃত্যু হয় পুৱা প্ৰায় ৬:০০ বজাত, ঠিক ফজৰৰ নামাজৰ পিছত,” বিএনপিৰ বিবৃতিটোত কোৱা হৈছে। ইয়াত লগতে কোৱা হৈছে, “আমি তেওঁৰ আত্মাৰ চিৰশান্তিৰ বাবে প্ৰাৰ্থনা কৰিছোঁ আৰু সকলোকে তেওঁৰ বিদেহ আত্মাৰ বাবে প্ৰাৰ্থনা কৰিবলৈ অনুৰোধ কৰিছো।”

যোৱা ২৩ নৱেম্বৰত হাওঁফাওঁৰ সংক্ৰমণৰ বাবে খালেদা জিয়াক ৰাজধানী ঢাকাৰ এভাৰকেয়াৰ হাস্পতালত ভৰ্তি কৰোৱা হৈছিল। দীৰ্ঘদিন ধৰি হৃদৰোগ, ডায়েবেটিছ, বাতবিষ, লিভাৰ চিৰ’ছিছ, বৃক্কৰ জটিলতাকে ধৰি বিভিন্ন শাৰীৰিক ৰোগত আক্ৰান্ত হৈ থকা প্ৰাক্তন প্ৰধানমন্ত্ৰীগৰাকীক চলিত মাহৰ আৰম্ভণিতে তেওঁৰ উন্নত চিকিৎসাৰ বাবে লণ্ডনলৈ প্ৰেৰণ কৰা হৈছিল।

ইয়াৰ পূৰ্বে প্ৰধানমন্ত্ৰী নৰেন্দ্ৰ মোদীয়ে বাংলাদেশৰ প্ৰাক্তন প্ৰধানমন্ত্ৰী তথা বিএনপিৰ অধ্যক্ষ গৰাকীৰ মৃত্যুত গভীৰ শোক প্ৰকাশ কৰি তেওঁৰ পৰিয়াল আৰু বাংলাদেশবাসীলৈ সমবেদনা জ্ঞাপন কৰে। এক্সত এটা পোষ্টত প্ৰধানমন্ত্ৰী মোদীয়ে কয় যে ৮০ বছৰ বয়সত মৃত্যু হোৱা খালেদা জিয়াৰ মৃত্যুৰ কথা জানিবলৈ পাই তেওঁ “গভীৰভাৱে দুঃখিত” অনুভৱ কৰিছে আৰু এই শোক সহ্য কৰিবলৈ পৰিয়ালক শক্তিৰ দিয়াৰ বাবে ঈশ্বৰক প্ৰাৰ্থনা কৰিছে।

প্ৰধানমন্ত্ৰীয়ে কয়, “প্ৰাক্তন প্ৰধানমন্ত্ৰী তথা বিএনপিৰ অধ্যক্ষ বেগম খালেদা জিয়াৰ ঢাকাত বিয়োগ হোৱাত গভীৰ শোক প্ৰকাশ কৰিছো। তেখেতৰ পৰিয়াল আৰু বাংলাদেশৰ সকলো জনসাধাৰণলৈ আমাৰ আন্তৰিক সমবেদনা জ্ঞাপন কৰিছো। সৰ্বশক্তিমানে তেখেতৰ পৰিয়ালক এই কৰুণ ক্ষতি সহ্য কৰাৰ ধৈৰ্য্য প্ৰদান কৰক।”

বাংলাদেশৰ প্ৰাক্তন প্ৰধানমন্ত্ৰী তথা বিএনপিৰ অধ্যক্ষ বেগম খালেদা জিয়াক নিজৰ দেশৰ এগৰাকী উচ্চ গণতান্ত্ৰিক নেত্ৰী হিচাপে স্মৰণ কৰি মঙলবাৰেও শোক প্ৰকাশ অব্যাহত ৰখা হৈছে দেশখনত।

নেপালৰ অন্তৱৰ্তীকালীন প্ৰধানমন্ত্ৰী সুশীলা কাৰ্কীয়ে খালেদা জিয়াৰ মৃত্যুত “গভীৰ দুখী” বুলি কয় আৰু নেপাল চৰকাৰ আৰু জনসাধাৰণৰ হৈ তেওঁৰ পৰিয়াল আৰু বাংলাদেশৰ জনসাধাৰণৰ প্ৰতি সমবেদনা জ্ঞাপন কৰে।

“বেগম জিয়াই আজীৱন জনসেৱাৰ উত্তৰাধিকাৰ এৰি থৈ গৈছে, তেওঁৰ চিৰস্থায়ী নেতৃত্বই তেওঁৰ দেশৰ গণতান্ত্ৰিক যাত্ৰাৰ এক ঐতিহাসিক অধ্যায় হিচাপে চিহ্নিত কৰিছে” বুলি কাৰ্কিয়ে এক্সত এক পোষ্টত কয়। নেপাল-বাংলাদেশৰ সম্পৰ্ক শক্তিশালী কৰাৰ ক্ষেত্ৰত তেওঁৰ ভূমিকাক স্মৰণ কৰি খালেদা জিয়াক “নেপালৰ প্ৰকৃত বন্ধু” বুলিও অভিহিত কৰে কাৰ্কীয়ে।