আজি প্ৰধানমন্ত্ৰী মোদীৰ জন্মদিন, শুভেচ্ছা জনালে আমেৰিকাৰ ৰাষ্ট্ৰপতি ট্ৰাম্পে…

প্ৰধানমন্ত্ৰী মোদী-আমেৰিকাৰ ৰাষ্ট্ৰপতি

আমেৰিকাৰ ৰাষ্ট্ৰপতি ড’নাল্ড ট্ৰাম্পে প্ৰধানমন্ত্ৰী নৰেন্দ্ৰ মোদীক ফোন কৰি ৭৫ সংখ্যক জন্মদিনৰ শুভেচ্ছা জনায়। ইয়াৰ বাবে প্ৰধানমন্ত্ৰী মোদীয়ে ৰাষ্ট্ৰপতি ট্ৰাম্পৰ প্ৰতি কৃতজ্ঞতা প্ৰকাশ কৰিছে। প্ৰধানমন্ত্ৰী মোদীয়ে এক্স হেণ্ডেলত এটা পোষ্ট শ্বেয়াৰ কৰি কয়, “ধন্যবাদ মোৰ বন্ধু, মোৰ ৭৫ সংখ্যক জন্মদিনত আপোনাৰ ফোন আৰু শুভেচ্ছাৰ বাবে ধন্যবাদ। আপোনাৰ দৰে মইও ভাৰত-আমেৰিকাৰ বিশ্বব্যাপী অংশীদাৰিত্বক নতুন উচ্চতালৈ লৈ যোৱাৰ বাবে সম্পূৰ্ণ প্ৰতিশ্ৰুতিবদ্ধ। ইউক্ৰেইন সংঘাতৰ শান্তিপূৰ্ণ সমাধানৰ দিশত আপোনাৰ পদক্ষেপক আমি সমৰ্থন কৰোঁ।”

ট্ৰাম্প শুল্কৰ পিছত ভাৰত আৰু আমেৰিকাৰ সম্পৰ্কত কিছু ব্যৱধান দেখা গৈছিল যদিও এতিয়া এই ব্যৱধান লাহে লাহে নাইকীয়া হ’বলৈ আৰম্ভ কৰিছে। মঙলবাৰে ভাৰত আৰু আমেৰিকাৰ মাজত বাণিজ্যিক চুক্তিৰ বিষয়ে আলোচনা হয়। আলোচনাৰ অন্তত এই সন্দৰ্ভত ভাৰতে প্ৰতিক্ৰিয়া প্ৰকাশ কৰিলে। ভাৰতে কয় যে, সকলো ইতিবাচক। ভাৰতৰ সৈতে হোৱা চুক্তিত কোনো বাধা নাথাকিব বুলি আশ্বাস দিয়ে আমেৰিকাৰ মুখ্য আলোচনাপন্থী ব্ৰেণ্ডন লিঞ্চে।

বৈঠকত বাণিজ্যিক অংশীদাৰিত্ব আৰু দ্বিপাক্ষিক বাণিজ্য চুক্তিৰ সৈতে জড়িত গুৰুত্বপূৰ্ণ বিষয়সমূহৰ ওপৰত আলোচনা কৰা হয়। মঙলবাৰে অনুষ্ঠিত এই বৈঠকত দুয়োপক্ষই নৱেম্বৰৰ ভিতৰত দ্বিপাক্ষিক বাণিজ্য চুক্তি (বিটিএ)ৰ প্ৰথম পৰ্যায় সম্পূৰ্ণ কৰাৰ ওপৰত আলোচনা কৰে। ইয়াৰ সমান্তৰালকৈ ষষ্ঠ ৰাউণ্ডৰ আলোচনা কেতিয়াৰ পৰা আৰম্ভ হ’ব আৰু কোনবোৰ বিষয়ৰ ওপৰত আলোচনা কৰা হ’ব, সেই বিষয়েও সিদ্ধান্ত লোৱা হ’ল।

৫০% শুল্কৰ পিছত সম্পৰ্ক ব্যৱধান বাঢ়িল

ভাৰতৰ ওপৰত আৰোপ কৰা ৫০ শতাংশ শুল্কৰ পিছত দুয়োখন দেশৰ সম্পৰ্কৰ অৱনতি ঘটিছিল। ইয়াৰ আঁৰত আছিল ৰাছিয়া। আচলতে আমেৰিকাই নিবিচাৰে ভাৰতে ৰাছিয়াৰ পৰা তেল ক্ৰয় কৰক। শেহতীয়াকৈ ইয়াৰ ওপৰত আপত্তি আছিল। আমেৰিকাই কৈছিল যে, ভাৰতে ৰাছিয়াৰ পৰা সস্তীয়া তেল ক্ৰয় কৰি ইয়াৰ পৰা বিপুল লাভ কৰিছে। এই সন্দৰ্ভত ভাৰতে তীব্ৰ প্ৰতিক্ৰিয়া প্ৰকাশ কৰিছিল। ইয়াৰ পিছত কিছুদিনৰ পৰা দুয়োখন দেশৰ মাজত উত্তেজনা বৃদ্ধি পাইছিল।

প্ৰধানমন্ত্ৰী মোদীৰ জন্মদিন

৭৫ সংখ্যক জন্মদিনত মধ্যপ্ৰদেশৰ ধৰত উপস্থিত হ’ব প্ৰধানমন্ত্ৰী মোদী। ইয়াৰ মাজতে তেওঁ দেশৰ প্ৰথমখন পি এম মিত্ৰ পাৰ্কৰ আধাৰশিলা স্থাপন কৰাৰ লগতে ‘Sewa Pakhwada’ উন্মোচন কৰিব। ধৰৰ ভৈনসোলা গাঁৱতো তেওঁ ‘Swasth Nari, Sashakt Parivar’ অভিযান আৰম্ভ কৰিব।