সাংবাদিকক ধমক দিলে অভিনেত্ৰী কাজলে, কিন্তু হঠাৎ কি হ’ল?

অভিনেত্ৰী কাজলৰ খং

সামাজিক মাধ্যমত হঠাৎ বলীউডৰ অভিনেত্ৰী কাজলৰ এটি ভিডিঅ’ই বিতৰ্কৰ সৃষ্টি হৈছে। সেই বিতৰ্কৰ জুইত ঘি দিয়াৰ দৰে কাম কৰিছে দিল্লী আৰক্ষীয়ে বাংলা ভাষাক বাংলাদেশী ভাষা আখ্যা দিয়াৰ ঘটনাই। কাজল জন্মসূত্ৰে বঙালী পৰিয়ালৰ জীয়ৰী। বলীউডৰ অভিনেত্ৰীগৰাকীয়ে এটা অনুষ্ঠানত হিন্দীৰ সলনি মাৰাঠী ভাষাত কথা কোৱাৰ বাবে ছ’চিয়েল মিডিয়াত ভাইৰেল হৈ পৰে।

শেহতীয়াকৈ কাজলে এটা অনুষ্ঠানলৈ গৈছিল। তাতেই কাজলে সাংবাদিকৰ লগত মাৰাঠী ভাষাত কথা পাতিবলৈ ধৰিলে। এগৰাকী সাংবাদিকে কাজলক হিন্দীত ক’বলৈ অনুৰোধ জনায়। তেতিয়াই কাজলৰ খং উঠে আৰু সাংবাদিকজনৰ ওপৰত জাঙোৰ খাই উঠে। অভিনেত্ৰীগৰাকীয়ে সাংবাদিকক স্পষ্টকৈ ক’লে, “মই কি এতিয়া হিন্দীতহে কথা ক’ব লাগিব? প্ৰয়োজন নাই, বুজি পোৱা সকলে বুজিব।”

কাজলৰ এই মন্তব্যৰ ভিডিঅ’ এতিয়া ভাইৰেল হৈ পৰিছে ছ’চিয়েল মিডিয়াত। অৱশ্যে কাজলৰ এই আচৰণত অতিশয় ক্ষুব্ধ হৈ পৰিছে ছ’চিয়েল মিডিয়াৰ একাংশ লোক। বহুজনে ছ’চিয়েল মিডিয়াত লিখিছে, ‘হিন্দী চিনেমাৰ পৰা জনপ্ৰিয় হৈছে আৰু হিন্দী ক’বলৈ টান পায়।’