Owner of Premium Trains: বন্দে ভাৰত, ৰাজধানীৰ দৰে প্ৰিমিয়াম ৰে’লসমূহৰ মালিক কোন? উত্তৰ জানি আচৰিত হ’ব আপুনি

বন্দে ভাৰত

ক্ৰমান্বয়ে শক্তিশালী হৈ আহিছে ভাৰতীয় ৰে’লৱে নেটৱৰ্ক । দেশৰ প্ৰায় চুকে-কোণে নিজৰ পৰিসৰ বিস্তাৰ কৰিছে ভাৰতীয় ৰে’লৱেই । যোৱা দশকত ৰে’লপথ সম্প্ৰসাৰণ হোৱাৰ লগে লগে কেইবাখনো প্ৰিমিয়াম ৰে’লৰ সংযোজন কৰা হৈছে । ইয়াৰ ভিতৰত আছে বন্দে ভাৰত, অমৃত ভাৰত, ডুৰাণ্ট এক্সপ্ৰেছ, শতাব্দী এক্সপ্ৰেছ, ৰাজধানী এক্সপ্ৰেছ প্ৰিমিয়াম ৰে’ল । কিন্তু আপুনি জানেনে এই প্ৰিমিয়াম ৰে’লবোৰৰ মালিক কোন ?

জানিব পৰা মতে, বন্দে ভাৰত, শতাব্দী এক্সপ্ৰেছৰ দৰে প্ৰিমিয়াম ৰে’লসমূহ প্ৰকৃততে ভাৰতীয় ৰে’লৱে বিত্ত নিগম বা আইআৰএফচিৰ মালিকানাধীন । অৱশ্যে বহুতে ভাবে যে এই ৰে’লবোৰ আইআৰচিটিচিৰ দ্বাৰা পৰিচালিত হয় । কিন্তু আইআৰএফচিয়ে প্ৰিমিয়াম ৰে’ল চলোৱাৰ দায়িত্ব লয় । যিয়ে ভাৰতীয় ৰে’লৱেৰ সকলো খৰচ বহন কৰে । এই কোম্পানীয়ে ঘৰুৱা আৰু বিদেশী বজাৰৰ পৰা বিত্তীয় পুঁজি সংগ্ৰহ কৰে । ডাঙৰ ডাঙৰ ৰে’ল প্ৰকল্পৰ খৰচো এই সংস্থাটোৰ পৰাই আহে ।

১৯৮৬ চনত এই প্ৰতিষ্ঠান আৰম্ভ কৰা হৈছিল । শেহতীয়াকৈ এই কোম্পানীটোক নৱৰত্ন কোম্পানীৰ মৰ্যাদা দিয়া হৈছে । ফলত সংগঠনটোৰ হাতলৈ আহিছে অধিক ক্ষমতা । এই কোম্পানীৰ হাতত আছে বিত্তীয় স্বাধীনতাৰ পৰা আৰম্ভ কৰি গুৰুত্বপূৰ্ণ সিদ্ধান্ত লোৱাৰ অধিকাৰ । ভাৰতীয় ৰে’লৱেই ব্যৱহাৰ কৰা ইঞ্জিন, ৱেগন আৰু ডবাৰ প্ৰকৃত মালিক হ’ল আইআৰএফচি ।

ভাৰতীয় ৰে’লৱেক ৩০ বছৰৰ বাবে লিজত দিয়া হৈছে । ভাৰতীয় ৰে’লৱেৰ যাত্ৰী আৰু মালবাহী ৰে’লৰ ৮০ শতাংশ মালিকীস্বত্ব আছে আইআৰএফচিৰ অধীনত ।