কিয় গ্ৰাউণ্ড কৰা হৈছে A320 বিমান? আপোনাৰ বিমানযাত্ৰাত কেনে প্ৰভাৱ পৰিব? সম্পূৰ্ণ তথ্য জানি লওক

প্ৰতীকী ছবি

উৰণৰ সুৰক্ষাৰ সৈতে প্ৰত্যক্ষভাৱে জড়িত বিশ্বৰ সৰ্বাধিক উৰণ কৰা এয়াৰবাছ এ৩২০ ছিৰিজৰ বিমানত এটা ডাঙৰ কাৰিকৰী ত্ৰুটি আৱিষ্কাৰ হৈছে। সৌৰ বিকিৰণ বা সূৰ্যৰ পৰা অহা তীব্ৰ ৰশ্মিয়ে বিমানখনৰ উৰণ নিয়ন্ত্ৰণ ব্যৱস্থাত প্ৰভাৱ পেলোৱাৰ আশংকা সৃষ্টি কৰে। ইয়াৰ পিছতে এয়াৰবাছে বিশ্বজুৰি বিমান সংস্থাসমূহক তৎক্ষণাত নিজৰ ছফ্টৱেৰ আপডেট কৰিবলৈ নিৰ্দেশ দিছে।

আদেশত এইটোও কোৱা হৈছে যে প্ৰয়োজন হ’লে হাৰ্ডৱেৰ সলনি কৰিব লাগে আৰু উন্নয়ন সম্পূৰ্ণ নোহোৱালৈকে সাৱধানতা অৱলম্বন কৰিব লাগে। এয়াৰবাছৰ ৫৫ বছৰীয়া ইতিহাসত এইটোৱেই আটাইতকৈ ডাঙৰ ৰিকাল বুলি কোৱা হৈছে। প্ৰায় ৬ হাজাৰ বিমান প্ৰত্যক্ষভাৱে প্ৰভাৱিত হ’ব। ইয়াৰ প্ৰভাৱ ইতিমধ্যে ভাৰতত অনুভৱ কৰা হৈছে। ইণ্ডিগ’, এয়াৰ ইণ্ডিয়া, এয়াৰ ইণ্ডিয়া এক্সপ্ৰেছৰ দ্বাৰা পৰিচালিত বিমান সেৱাত পলম হৈছে।

এয়াৰবাছ এ৩২০ৰ কি হ’ল, আৰু সমস্যাটো কেনেকৈ ধৰা পৰিল?

এয়াৰবাছ এ৩২০ বিশ্বৰ সৰ্বাধিক ব্যৱহৃত বিমান। কিন্তু এতিয়া এটা গুৰুতৰ সমস্যাৰ আৱিষ্কাৰ হৈছে। সৌৰ বিকিৰণে উৰণ নিয়ন্ত্ৰণৰ তথ্যত ব্যাঘাত জন্মাব পাৰে। এই সমস্যাটো প্ৰথমবাৰৰ বাবে লক্ষ্য কৰা হৈছিল ২০২৫ চনৰ ৩০ অক্টোবৰত। নেৱাৰ্ক অভিমুখী এখন এ৩২০ বিমান হঠাতে তললৈ হেলনীয়া হ’বলৈ ধৰিলে। ৰিপৰ্ট কৰা হৈছিল যে কণ্ট্ৰল চুইচ সলনি কৰাৰ সময়ত বিমান নিয়ন্ত্ৰণ কম্পিউটাৰে ভুল তথ্য লাভ কৰিছিল।

লগে লগে বিমানখন টাম্পা বিমানবন্দৰলৈ ডাইভাৰ্ট কৰিবলগীয়া হৈছিল। আহত একাংশ যাত্ৰীক চিকিৎসালয়লৈ লৈ যোৱা হয়। এক সম্যক তদন্তৰ অন্তত এয়াৰবাছে স্বীকাৰ কৰে যে তীব্ৰ সৌৰ বিকিৰণে উৰণ নিয়ন্ত্ৰণৰ তথ্য বিশেষকৈ উচ্চতা, দিশ আৰু স্থিৰতাৰ সৈতে জড়িত তথ্যত ব্যাঘাত জন্মাব পাৰে।

সৌৰ বিকিৰণে কেনেকৈ উৰণত ব্যাঘাত জন্মায়?

সূৰ্যই কেতিয়াবা দ্ৰুতগতিত প্লাজমা আৰু আধানযুক্ত কণা মহাকাশলৈ নিৰ্গত কৰে। ইয়াক ক’ৰ’নেল মাছ ইজেকচন (CME) বোলা হয়। এই কণাবোৰে পৃথিৱীৰ বায়ুমণ্ডলত প্ৰৱেশ কৰিলে ২৮,০০০ ফুট পৰ্যন্ত উচ্চতাত উপগ্ৰহ ব্যৱস্থা, নেভিগেচন, উৰণ নিয়ন্ত্ৰণ ইলেক্ট্ৰনিকছ আদিত প্ৰভাৱ পেলাব পাৰে। ২০০৩ চনত একেধৰণৰ কাণ্ড সংঘটিত হৈছিল, যেতিয়া এল এ-নিউয়ৰ্ক পথত বিমান চলাচলৰ সমস্যাৰ সন্মুখীন হৈছিল।

কিমান প্ৰভাৱিত হ’ব ভাৰত?

বিশেষকৈ বিশ্বৰ সৰ্ববৃহৎ A320 অপাৰেটৰ ইণ্ডিগ’ই ভাৰতত সৰ্বাধিক A320 ছিৰিজৰ বিমান ব্যৱহাৰ কৰে। এয়াৰ ইণ্ডিয়া আৰু এয়াৰ ইণ্ডিয়া এক্সপ্ৰেছতো প্ৰভাৱ পৰিব। পিটিআইৰ তথ্য অনুসৰি এতিয়ালৈকে কোনো বিমান বাতিল হোৱা নাই যদিও বহু বিমানত ৬০ৰ পৰা ৯০ মিনিট পলম হৈছে।

ইণ্ডিগ’ই এক বিবৃতি প্ৰকাশ কৰি কয় যে তেওঁলোকে সকলো সুৰক্ষা প্ৰট’কল মানি চলিছে। সতৰ্কতামূলক আপডেট জাৰি কৰা হৈছে। কিছুমান বিমানৰ সময়সূচী অলপ সলনি হ’ব পাৰে। এয়াৰ ইণ্ডিয়াই এক বিবৃতিত কয় যে যাত্ৰীৰ সুৰক্ষা তেওঁলোকৰ সৰ্বোচ্চ অগ্ৰাধিকাৰ। আমাৰ ৪০% বিমান উন্নীত কৰা হৈছে। কোনো বিমান সেৱা বাতিল কৰা হোৱা নাই যদিও পলম হোৱাৰ সম্ভাৱনা আছে।

ইয়াৰ ফলত আপোনাৰ ওপৰত কিমান প্ৰভাৱ পৰিব?

• ইয়াৰ ফলত অহা ২৩ দিনত ভ্ৰমণকাৰীসকল প্ৰভাৱিত হ’ব পাৰে
• বিমান পলম হোৱাৰ সম্ভাৱনা আছে
• বহু বিমান চফটৱেৰ আপডেটৰ বাবে গ্ৰাউণ্ড কৰা হ’ব
• সূচী সলনি হ’ব পাৰে
• আপোনাৰ বিমানৰ সময় পিছলৈ ঠেলি দিয়া হ’ব পাৰে
• ভাৰত সৰ্বাধিক প্ৰভাৱিত হ’ব কাৰণ ইণ্ডিগ’ আৰু এয়াৰ ইণ্ডিয়াৰ বৃহৎ সংখ্যক এ৩২০ বিমান আছে
• বিমানবন্দৰলৈ যোৱাৰ আগতে বিমানৰ অৱস্থা নিশ্চয়কৈ পৰীক্ষা কৰক
• হঠাৎ পৰিৱৰ্তনৰ পৰা হাত সাৰিবলৈ যোৱাৰ আগতে মোবাইল ফোনত বিমানৰ সময় পুনৰ পৰীক্ষা কৰাটো ভাল