Zubeen Garg Death Live Updates: আজি প্ৰকৃতিত বিলীন হ’ব প্ৰাণৰ শিল্পী জুবিন গাৰ্গঃ মৰণোত্তৰ পৰীক্ষা সম্পন্ন

মৰণোত্তৰ পৰীক্ষা সম্পন্ন হোৱাৰ পিছত গুৱাহাটী চিকিৎসা মহাবিদ্যালয় হাস্পতালৰ পৰা পুনৰ সৰুসজাইলৈ জুবিন গাৰ্গৰ নশ্বৰ দেহ কঢ়িয়াই নিছে পুষ্প সজ্জিত বাহনে। বাহনৰ চৌদিশে অসংখ্য লোকে সন্মানেৰে আগুৱাই নিছে প্ৰাণৰ শিল্পীগৰাকীক। ‘জয় জুবিন দা’, ‘মায়াবিনী’ৰ ধ্বনিৰে আন্দোলিত হৈ উঠিছে আকাশ বতাহ।

গুৱাহাটী চিকিৎসা মহাবিদ্যালয়ত সম্পন্ন হৈছে জুবিন গাৰ্গৰ মৰণোত্তৰ পৰীক্ষা। এতিয়া তেওঁৰ নশ্বৰ দেহ পুনৰ সৰুসজাইলৈ লৈ যোৱা হ’ব। ইয়াৰ পিছত তেওঁৰ দেহ অন্ত্যেষ্টিক্ৰিয়াৰ বাবে সোণাপুৰৰ কমাৰকুছিলৈ লৈ যোৱা হ’ব।

কেন্দ্ৰীয় মন্ত্ৰী কিৰেন ৰিজিজু আজি জুবিন গাৰ্গৰ শেষকৃত্য অনুস্থানত উপস্থিত থাকিব পাৰে। মুখ্যমন্ত্ৰী হিমন্ত বিশ্ব শৰ্মাই সোমবাৰে এই বিষয়ে সংবাদ মাধ্যমত আগত প্ৰকাশ কৰিছিল। লগতে মেঘালয় চৰকাৰৰ প্ৰতিনিধিও এই সময়ছোৱাত উপস্থিত থাকিব।

সম্পূৰ্ণ ৰাজ্যিক মৰ্যাদাৰে জাতীয় জীৱনৰ এক মহানায়ক হিচাপে পৰিগণিত হৈ পৰা প্ৰাণৰ শিল্পী জুবিন গাৰ্গৰ অন্ত্যেষ্টিক্ৰিয়া আজি সোণাপুৰৰ কমাৰকুছিত সম্পন্ন হ’ব। ইতিমধ্যে প্ৰায় সাজু হৈ উঠিছে কমাৰকুছিৰ অন্ত্যেষ্টিক্ৰিয়া স্থলী। মুখ্যমন্ত্ৰী হিমন্ত বিশ্ব শৰ্মাই বাৰে বাৰে এই স্থানত উপস্থিত হৈ সমগ্ৰ ব্যৱস্থাপনাৰ বুজ লৈছে।

ইতিমধ্যে জুবিন গাৰ্গৰ নশ্বৰ দেহ গুৱাহাটী চিকিৎসা মহাবিদ্যালয় হাস্পতাললৈ লৈ যোৱা হৈছে। কিছু সময়ৰ পিছতে AIIMSৰ চিকিৎসকৰ তত্বাৱধানত জুবিন গাৰ্গৰ মৰণোত্তৰ পৰীক্ষা সম্পন্ন হ’ব। মৰণোত্তৰ পৰীক্ষাৰ পিছতে তেওঁক পুনৰ সৰুসজাই ষ্টেডিয়ামলৈ লৈ যোৱা হ’ব। তাৰ পিছতহে সোণাপুৰৰ অন্ত্যেষ্টিক্ৰিয়া স্থলীলৈ জুবিন গাৰ্গক লৈ যোৱা হ’ব।