উমৰাংছুৰ কয়লাখনি ট্ৰেজেডীৰ তদন্তৰ বাবে এজনীয়া সমিতি গঠন, এতিয়াও সন্ধান নোলাল কেবাজনো শ্ৰমিকৰ!
বিগত বৰ্ষত ডিমা হাছাও জিলাৰ উমৰাংছুত সংঘটিত এক শোকাৱহ ঘটনাত কয়লাখনিত আৱদ্ধ হৈ পৰিছিল বহু কেইজন শ্ৰমিক। বহু প্ৰচেষ্টাৰ অন্তত চাৰিজন শ্ৰমিকৰ মৃতদেহ উদ্ধাৰ কৰা হয় যদিও আন কেবাজনো শ্ৰমিকৰ কোনো সন্ধান পোৱা নগ'ল। এই ঘটনাৰ বাবে তদন্ত সমিতি ঘোষণা চৰকাৰৰ।
উমৰাছুৰ কয়লা খনিত সংঘটিত শোকাৱহ শ্ৰমিকৰ মৃত্যুৰ ঘটনাৰ বাবে এজনীয়া তদন্ত কমিটী গঠন। গুৱাহাটী উচ্চ ন্য়ায়ালয়ৰ প্ৰাক্তন ন্যায়াধীশ(অৱসৰপ্ৰাপ্ত) অনিমা হাজৰিকাৰ নেতৃত্বত গঠন কৰা হৈছে এই এজনীয়া তদন্ত সমিতি।
বিগত বৰ্ষত ডিমা হাছাও জিলাৰ উমৰাংছুত সংঘটিত এক শোকাৱহ ঘটনাত কয়লাখনিত আৱদ্ধ হৈ পৰিছিল বহু কেইজন শ্ৰমিক। বহু প্ৰচেষ্টাৰ অন্তত চাৰিজন শ্ৰমিকৰ মৃতদেহ উদ্ধাৰ কৰা হয় যদিও আন কেবাজনো শ্ৰমিকৰ কোনো সন্ধান পোৱা নগ’ল। তাৰ পাছতেই অবৈধ কলয়া খনিক লৈ ৰাজ্যজুৰি ব্যাপক বিতৰ্কৰ সূত্ৰপাত ঘটে।
২০২৫ চনৰ ২৪ জানুৱাৰীত ৰাজনৈতিক (ক) বিভাগে জাৰি কৰা এক অধিসূচনা অনুসৰি এই কাণ্ডৰ তথ্য আৰু কাৰণসমূহ নিৰ্ণয় কৰা, অঞ্চলটোত অবৈধ ৰেট হোল মাইনিঙৰ বাবে দায়বদ্ধ ব্যক্তি বা সংগঠনসমূহ চিনাক্ত কৰা আৰু কৰ্তৃপক্ষৰ দ্বাৰা হেমাহী হ’লে দায়িত্ব নিৰ্ধাৰণ কৰাৰ দায়িত্ব আয়োগক দিয়া হৈছে। ইয়াৰ উপৰিও ভৱিষ্যতে এনেধৰণৰ ঘটনা ৰোধৰ ব্যৱস্থাৰ পৰামৰ্শ দিব এই সমিতিয়ে।
আয়োগে ২০২৫ চনৰ ৯ আৰু ১১ ছেপ্টেম্বৰত পুৱা ১০:৩০ বজাৰ পৰা বিয়লি ৪:০০ বজালৈ ৰাজহুৱা শুনানি অনুষ্ঠিত কৰিব। গুৱাহাটীৰ খানাপাৰাৰ অসম প্ৰশাসনিক কৰ্মচাৰী মহাবিদ্যালয়ৰ ২১২ নং কোঠাত হ’ব এই ৰাজহুৱা শুনানি।
ভুক্তভোগীৰ পৰিয়ালৰ সদস্য, ব্যক্তি, সংগঠন বা এই ঘটনা সম্পৰ্কে তথ্য থকা যিকোনো ব্যক্তিক আয়োগৰ সন্মুখত মৌখিক বা বস্তুগত প্ৰমাণ দাখিল কৰিবলৈ আমন্ত্ৰণ জনোৱা হৈছে। আয়োগৰ সচিব কুলেন শৰ্মাই আনুষ্ঠানিকভাৱে ৰাজহুৱা জাননী জাৰি কৰি তদন্তত অংশগ্ৰহণৰ বাবে আমন্ত্ৰণ জনাইছে।
উল্লেখ্য যে পাহাৰীয়া জিলাখনত বিভিন্ন স্থানত অবৈধভাৱে কয়লা খনন চলি থকাৰ অভিযোগ বহু পুৰণি। আইনী নিশেষধাজ্ঞাৰ পাছতো এই খনন চলি থকাৰ কথা পোহৰলৈ আহিছিল উমৰাংছুৰ ঘটনাৰ পাছত। অবৈধ কয়লা খননৰ ঘটনাত নাম সাঙোৰ খাইছিল উত্তৰ কাছাৰ স্বায়ত্তশাসিত পৰিষদৰ মুখ্য কাৰ্যবাহী দেৱলাল গাৰ্লোচাৰ পত্নী কণিকা হোজাইৰ নাম। ৰাজনৈতিক আশিসপুষ্ট এটা চক্ৰই এই খনন চলাই থকা বুলি অভিযোগ তুলিছিল একাংশ লোকে।
