মই মাটিৰ নিচাত আসক্ত, অসমৰ প্ৰতি ইঞ্চি ভূমি বেদখলমুক্ত কৰা হ’বঃ হিমন্ত বিশ্ব শৰ্মা

খিলঞ্জীয়াৰ ভূমি বেদখলমুক্ত কৰাৰ অৰ্থে অসমৰ চৰকাৰে ৰাজ্যৰ বিভিন্ন ঠাইত উচ্ছেদ অভিযান চলাই গৈছে। অবৈধ ভূমি দখল কৰা সন্দৰ্ভত চৰকাৰী স্থিতি পুনৰ প্ৰকাশ কৰি মুখ্যমন্ত্ৰী হিমন্ত বিশ্ব শৰ্মাই কয় যে, “খিলঞ্জীয়াৰ পৰা বেদখল কৰা প্ৰতিটো ইঞ্চি মাটি পুনৰ উদ্ধাৰ কৰা হ’ব”। ইয়াৰোপৰি তেওঁ কয় যে,খিলঞ্জীয়াৰ মাটি-বাৰী সুৰক্ষা কৰাৰ বাবে তেওঁ আসক্ত। কেতিয়াও উচ্ছেদৰ ক্ষেত্ৰত আপোচ কৰা নহয়।

বুধবাৰে সাংবাদিকৰ সৈতে হোৱা কথা বতৰাত শৰ্মাই কয় যে, “মই মাটিৰ নিচাত আসক্ত হৈ আছো। অসমীয়াৰ প্ৰতি টুকুৰা মাটি পুনৰ উদ্ধাৰ কৰিব লাগে। বনাঞ্চল আৰু জলাশয়ৰ মাটি দখল কৰি ৰাখিছে। সেইসমূহ মাটি উদ্ধাৰ কৰি অসমীয়াক ঘূৰাই দিয়াৰ নিচাত মই আসক্ত। সেই নিচা মোৰ লাগি আছে। গতিকে অহা এমাহত আৰু কেইবাটাও উচ্ছেদ হ’ব। ইয়াক লৈ কোনো কম্প্ৰমাইজ নহয়। অসমৰ ইতিহাসত বিষ্ণুৰাম মেধিৰ পাছত আটাইতকৈ ডাঙৰ মাটি উদ্ধাৰ কৰা মইয়ে একমাত্ৰ মুখ্যমন্ত্ৰী”।

উল্লেখ্য যে, বিগত সময়চোৱাত অসমৰ বিভিন্ন ঠাইত চৰকাৰে উচ্ছেদ অভিযান চলায়। শেহতীয়াকৈ গোৱলপাৰাৰ হাচিলা বিলত উচ্ছেদ চলাই অসম চৰকাৰে বহু মাটি বেদখলমুক্ত কৰে। তাৰ পাছতে হাচিলা বিল পৰিদৰ্শন কৰি শৰ্মাই কয় যে,  গোৱালপাৰাত চিকিৎসা মহাবিদ্যালয় স্থাপন হ’ব আৰু বহু ডাঙৰ প্ৰজেক্ট আহিব। ইয়াৰোপৰি বেদখলকাৰীসকলক শৰ্মাই নিজৰ নিজৰ ঠাইলৈ ঘূৰি যাবলৈ আহ্বান জনায়।

সমান্তৰালকৈ ৰাজ্যত অব্যাহত আছে অনুপ্ৰৱেশকাৰী চিনাক্তকৰণৰ প্ৰক্ৰিয়া।  তথ্য় অনুসৰি, যোৱা এমাহত কেৱল কাছাৰ জিলাত ৮৮ বাংলাদেশী আৰু ৰোহিংগিয়াত আটক কৰি বাংলাদেশলৈ ঘূৰাই পঠিওৱা হৈছে।