কৰিব লাগে কিবা, কৰি আছে কিবা, কিনো কথাবোৰত লাগি আছে মানুহজন, কাক এইদৰে ক’লে ভূপেন বৰাই?

ভূপেন কুমাৰ বৰা

সাধাৰণ নাগৰিকক অস্ত্ৰৰ অনুজ্ঞাপত্ৰ প্ৰদানৰ বাবে অসম কেবিনেটে গ্ৰহণ কৰা সিদ্ধান্তক সমালোচনা কৰিছে অসম প্ৰদেশ কংগ্ৰেছ কমিটীৰ প্ৰাক্তন সভাপতি ভূপেন বৰাই । অসমৰ হিংসাত্মক অতীতক সোঁৱৰাই দি ৰাজ্য চৰকাৰৰ বিৰুদ্ধে শংকাৰ দিনবোৰ পুনৰুজ্জীৱিত কৰাৰ অভিযোগ উত্থাপন কৰে বৰাই । অসম কেবিনেটে শেহতীয়াকৈ ৰাজ্যৰ নিৰ্দিষ্ট অস্ত্ৰ অনুজ্ঞাপত্ৰ নীতি প্ৰৱৰ্তনৰ সিদ্ধান্ত গ্ৰহণ কৰা কাৰ্যক লৈ সৰৱ হৈ পৰা দেখা গৈছে ভূপেন বৰাক ।

বৃহস্পতিবাৰে সংবাদ মাধ্যমক সম্বোধন কৰি বৰাই বন্দুকৰ হিংসাৰ ফলত হোৱা আঘাতৰ ওপৰত আলোকপাত কৰি অসমৰ ইতিহাসৰ এক অশান্ত অধ্যায়ৰ দুখজনক স্মৃতিৰ কথা উল্লেখ কৰে । বৰাই কয়, ‘‘আমি এটা দশক পাৰ কৰিলোঁ যেতিয়া এটা বন্দুকৰ গুলীৰ শব্দই আমাক গোটেই ৰাতিটো শুবলৈ দিয়া নাছিল । যুৱ কংগ্ৰেছৰ তেতিয়াৰ নেতা হিচাপে মই মাৰ্ঘেৰিটাৰ বেনু চেতিয়া আৰু গোলাঘাটৰ নগেন নেওগৰ মৃতদেহৰ ওচৰত থিয় দিছিলোঁ ।”

বৰাই লগতে স্মৰণ কৰি কয় যে ২০১৪ চনৰ লোকসভা নিৰ্বাচনৰ সময়ত নিজৰ সুৰক্ষাৰ প্ৰতি থকা ভাবুকিয়ে অসম আৰক্ষীক তেওঁক বুলেটপ্ৰুফ বাহন, জেকেট, হেলমেট যোগান ধৰিবলৈ বাধ্য কৰাইছিল । তেওঁ দৃঢ়তাৰে কয়, ‘‘তেতিয়া অসমে বন্দুক সংস্কৃতিৰ কবলৰ পৰা মুক্ত হ’বলৈ হাহাকাৰ কৰিছিল । আজি আমি উন্নত স্থানত আছো । সেই অন্ধকাৰ সময়ছোৱাই আমাক আৰু সংজ্ঞায়িত কৰা নাই ।’’

তেওঁ আৰু জোৰ দি কয় যে অস্ত্ৰৰ অনুজ্ঞাপত্ৰ প্ৰদান ৰাষ্ট্ৰীয় আইন অনুসৰি পৰিচালিত হয় আৰু কোনো ৰাজ্যিক মন্ত্ৰীসভাৰ পৰিসৰৰ ভিতৰত নহয় । বৰাই কয়, “আনকি মোৰ হাতত অনুজ্ঞাপত্ৰ থকা আগ্নেয়াস্ত্ৰ আছে । মোৰ জীৱনৰ প্ৰতি নিৰাপত্তাৰ ভাবুকি অহাত মই ইয়াৰ বাবে আবেদন কৰিছিলো । সঠিক তদন্তৰ পিছত কৰ্তৃপক্ষই অনুজ্ঞাপত্ৰ প্ৰদান কৰিছিল ।”

মুখ্যমন্ত্ৰী হিমন্ত বিশ্ব শৰ্মাক সমালোচনা কৰি বৰাই অভিযোগ কৰে যে ৰাজ্যিক পৰ্যায়ত অস্ত্ৰ অনুজ্ঞাপত্ৰ নীতি ৰূপায়ণৰ এই পদক্ষেপ আমেৰিকাত প্ৰচলিত বন্দুক সংস্কৃতিৰ অনুকৰণৰ প্ৰয়াস। তেওঁ সকীয়াই দিয়ে যে আমি এনে এখন সমাজ নিবিচাৰো য’ত বন্দুকক খেলনাৰ দৰে ব্যৱহাৰ কৰা হয় আৰু আনকি শিশুৱেও হাতত লৈ ফুৰা দেখা যায়।

মুখ্যমন্ত্ৰীগৰাকী “বিভাজনকাৰী ৰাজনীতি”ত লিপ্ত হোৱাৰ অভিযোগ উত্থাপন কৰি বৰাই শেষত সমাজখনক পুনৰবাৰ মেৰুকৰণ কৰি জনসাধাৰণৰ সুৰক্ষা বিপন্ন কৰিব পৰা ব্যৱস্থাৰ বিৰুদ্ধে সকীয়াই দিয়ে ।