নিজ দেশতে নিন্দিত ট্ৰাম্প! শুল্ক নীতিক অবৈধ আখ্যা দিলে মাৰ্কিন আদালতে

মাৰ্কিন ৰাষ্ট্ৰপতি ড’নাল্ড ট্ৰাম্পৰ শুল্ক নীতিক কেন্দ্ৰ কৰি বিশ্ব ৰাজনীতিত এতিয়া ব্যাপক চৰ্চা। এই শুল্ক নীতিৰ স্পষ্ট প্ৰভাৱ দেখা গৈছে আন্তঃৰাষ্ট্ৰীয় ৰাজনীতিতো। বিশেষকৈ ভাৰতৰ ওপৰত ট্ৰাম্পৰ ৫ শতাংশ শুল্ক আৰোপৰ সিদ্ধান্তক লৈ ভাৰততো যথেষ্ট আলোচনাৰ সূত্ৰপাত হৈছে। পিছে এই শুল্ক নীতিৰ সিদ্ধান্তৰ বাবে এতিয়া নিজ দেশতে নিন্দিত হ’বলগা হৈছে ড’নাল্ড ট্ৰাম্প। আমেৰিকাৰ আপিল আদালতে ৰাষ্ট্ৰপতি ট্ৰাম্পে বিভিন্ন দেশৰ ওপৰত শুল্ক আৰোপ কৰাৰ এই প্ৰকৃতিক অবৈধ আখ্যা দিয়ে।

শুকুৰবাৰে মাৰ্কিন আপিল আদালতে ট্ৰাম্পৰ শুল্ক নীতি সন্দৰ্ভত এই পৰ্যবেক্ষণ কৰে। আদালতে এই মন্তব্য কৰিলেও অৱশ্যে বৰ্তমানলৈকে শুল্ক নীতি বাতিল কৰা হোৱা নাই। ৰাষ্ট্ৰপতি ড’নাল্ড ট্ৰাম্পক দেশৰ শীৰ্ষ ন্যায়ালয়ত এই বিষয়ত যুঁজিবলৈ সুযোগ দিয়া হৈছে। আদালতৰ এই পৰ্যবেক্ষণ সন্দৰ্ভত ইতিমধ্যে ৰাষ্ট্ৰপতিগৰাকীয়ে প্ৰতিক্ৰিয়া প্ৰকাশ কৰিছে।

আমেৰিকাৰ আপিল আদালতে শুকুৰবাৰে ৰায় দিয়ে যে বিশ্ব বাণিজ্যত প্ৰভাৱ পেলোৱা ট্ৰাম্পৰ বহু শুল্ক নীতি অবৈধ। আদালতে কয় যে ট্ৰাম্পে জৰুৰীকালীন অৰ্থনৈতিক শক্তিৰ অতিমাত্ৰা ব্যৱহাৰ কৰি বিভিন্ন দেশৰ ওপৰত শুল্ক আৰোপ কৰিছে। মাৰ্কিন ৰাষ্ট্ৰপতিগৰাকীৰ হাতত এনে কোনো আইনী অধিকাৰ নাই বুলি আদালতে লগতে কয়।

অৱশ্যে ১৪ অক্টোবৰলৈকে সকলো দেশতে আমেৰিকাৰ শুল্ক প্ৰযোজ্য হৈ থাকিব। এই সময়ছোৱাত ৰাষ্ট্ৰপতি ট্ৰাম্প দেশৰ শীৰ্ষ ন্যায়ালয়ৰ কাষ চাপিব পাৰিব। ইফালে আদালতৰ ৰায়ৰ প্ৰতিক্ৰিয়া প্ৰকাশ কৰি ৰাষ্ট্ৰপতি ট্ৰাম্পে তেওঁৰ ছ’চিয়েল মিডিয়া একাউণ্ট ট্ৰুথ ছ’চিয়েলত সকলো শুল্কই প্ৰযোজ্য বুলি দাবী কৰে।

আপিল আদালতৰ মতক ভুল বুলি দাবী কৰি ট্ৰাম্পে লগতে এই শুল্ক উঠাই দিলে দেশখনৰ বাবে দুৰ্যোগ হ’ব বুলিও মন্তব্য কৰে। লগতে এনে পদক্ষেপে আমেৰিকাক আৰ্থিকভাৱে দুৰ্বল কৰি তুলিব বুলি ট্ৰাম্পে দাবী কৰে। ‘আমি শক্তিশালী হ’ব লাগিব’ বুলিও পোষ্টটোত লগতে লিখিছে মাৰ্কিন ৰাষ্ট্ৰপতিগৰাকীয়ে।

ট্ৰাম্পে লগতে লিখিছে, “আমেৰিকাই আৰু বৃহৎ বাণিজ্যিক ঘাটি সহ্য নকৰে। অন্য দেশে আৰোপ কৰা অন্যায় শুল্ক মুক্ত বাণিজ্যৰ নিয়ম মানি নলয়, সেয়া বন্ধুৱেই হওক বা শত্ৰুৱেই হওক। মেড ইন আমেৰিকাৰ সামগ্ৰী নিৰ্মাণ কৰা শ্ৰমিক আৰু কোম্পানীসমূহক সহায় কৰাৰ বাবে শুল্কই সৰ্বোত্তম উপায় বুলিও আমেৰিকাৰ ৰাষ্ট্ৰপতিগৰাকীয়ে যুক্তি দিয়ে।