বৈধ মাৰণাস্ত্ৰও লগত লৈ ফুৰিব নোৱাৰিব কোকৰাঝাৰত, কিয় এই নিৰ্দেশনা?
ভাৰতীয় নাগৰিক সুৰক্ষা সংহিতা ১৯৭৩ ৰ ধাৰা ১৬৩ অনুসৰি আগষ্ট মাহৰ ২৮ তাৰিখে এই নিৰ্দেশনা জাৰী কৰা হৈছিল। ইয়াৰ দ্বাৰা কোকৰাঝাৰত অনুজ্ঞাপত্ৰ থকা মাৰণাস্ত্ৰও লগত কঢ়িয়াব নোৱাৰিব কোনো লোকে।
ঘোষণা হ’ল বিটিচি নিৰ্বাচনৰ দিন। তাৰ পাছতেই কোকৰাঝাৰ জিলা প্ৰশাসনে জাৰি কৰিছে এক নিৰ্দেশনা। কোকৰাঝাৰ জিলাত অনুজ্ঞাপত্ৰ থকা মাৰণাস্ত্ৰ কঢ়িওৱাত নিষেধাজ্ঞা আৰোপ কৰা হৈছে। জিলা দণ্ডাধীশে জাৰী কৰিছে এই নিশেধাজ্ঞা।
ভাৰতীয় নাগৰিক সুৰক্ষা সংহিতা ১৯৭৩ ৰ ধাৰা ১৬৩ অনুসৰি আগষ্ট মাহৰ ২৮ তাৰিখে এই নিৰ্দেশনা জাৰী কৰা হৈছিল। এই নিৰ্দেশনা অনুসৰি নিৰ্বাচনী কৰ্তব্যত থকা আৰক্ষী জোৱান, সেনা আৰু অৰ্ধসামৰিক বাহিনী, আৰু নেশ্যনেল ৰাইফল এছ’চিয়েশ্যনৰ সৈতে জড়িত ক্ৰীড়াবিদসকল, যাক ক্ৰীড়াৰ উদ্দেশ্যে ৰাইফলৰ প্ৰয়োজন হয়, এই নিষেধাজ্ঞাৰ পৰা ৰেহাই দিয়া হৈছে, যদিহে তেওঁলোকে বৈধ নথি-পত্ৰ প্ৰদান কৰে।
আইন-শৃংখলা বজাই ৰখা, শান্তি নিশ্চিত কৰা, বিটিচিৰ নিৰ্বাচন সুচাৰুৰূপে পৰিচালনা কৰাৰ নিশ্চয়তাৰ প্ৰয়োজনীয়তাৰ কথা উল্লেখ কৰি এই আদেশ জাৰি কৰা হয়। জিলা দণ্ডাধীশে আৰু কয় যে এই আদেশৰ দ্বাৰা ক্ষতিগ্ৰস্ত যিকোনো ব্যক্তিয়ে ইয়াক বলবৎ কৰাৰ সময়ত বাতিল, পৰিৱৰ্তন বা ৰেহাই বিচাৰিব পাৰে।
উল্লেখ্য যে অহা ২২ ছেপ্টেম্বৰত অনুষ্ঠিত হ’ব বিটিচি নিৰ্বাচনৰ ভোটগ্ৰহণ। যদি পুনৰ ভোটগ্ৰহণৰ প্ৰয়োজন হয় তেন্তে ২৪ ছেপ্টেম্বৰত অনুষ্ঠিত কৰা হ’ব। ভোটগণনা আৰু নিৰ্বাচনৰ ফলাফল ঘোষণা হ’ব ২৬ ছেপ্টেম্বৰত। ভোটগ্ৰহণ পুৱা ৭ বজাৰ পৰা বিয়লি ৪ বজালৈ অনুষ্ঠিত হ’ব। ভোটগণনা আৰম্ভ হ’ব পুৱা ৮ বজাত।
তাৰোপৰি মনোনয়ন দাখিলৰ অন্তিম তাৰিখ ২ ছেপ্টেম্বৰ। মনোনয়ন পৰীক্ষণৰ তাৰিখ ৪ ছেপ্টেম্বৰ। যোগ্য মনোনীত প্ৰাৰ্থীৰ তালিকা প্ৰকাশৰ তাৰিখ ৪ ছেপ্টেম্বৰ। প্ৰাৰ্থিত্ব প্ৰত্যাহাৰৰ তাৰিখ অন্তিম তাৰিখ ৬ ছেপ্টেম্বৰ। নিৰ্বাচনত প্ৰতিদ্বনন্দ্বিতা কৰিবলগীয়া প্ৰাৰ্থীৰ চূড়ান্ত তালিকা প্ৰকাশৰ তাৰিখ ৬ ছেপ্টেম্বৰ।
