Russia Ukraine War: ৰাছিয়া-ইউক্ৰেইনৰ যুদ্ধবিৰতি আসন্ন, জেলেনস্কিৰ সৈতে পোনপটীয়া আলোচনাত বহিব পুটিন

বছৰ ধৰি চলি থকা ৰাছিয়া-ইউক্ৰেইনৰ যুদ্ধ অন্ত পেলাই যুদ্ধবিৰতি অনাৰ প্ৰচেষ্টাই যেন আকৌ এবাৰ নতুন আশা লাভ কৰিছে। ৰাছিয়াৰ চৰকাৰী টেলিভিছন ষ্টেচন আৰ টি নিউজৰ তথ্য অনুসৰি ক্ৰেমলিনে ঘোষণা কৰিছে যে বিশেষজ্ঞ পৰ্যায়ত কাম সম্পূৰ্ণ হোৱাৰ পিছত ভ্লাদিমিৰ পুটিনে ইউক্ৰেইনৰ ৰাষ্ট্ৰপতি ভল’ডিমিৰ জেলেনস্কিৰ সৈতে আলোচনা কৰিবলৈ সাজু হৈছে।

যোৱা সপ্তাহত আমেৰিকাৰ ৰাষ্ট্ৰপতিয়ে ৰাছিয়াৰ বিৰুদ্ধে পাৰমাণৱিক চাবমেৰিন নিয়োগ কৰাৰ নিৰ্দেশ দিছিল। এই নিৰ্দেশৰ তিনিদিন পিছতে পুটিনৰ এই পদক্ষেপে ইংগিত দিয়ে যে ট্ৰাম্পে পাৰমাণৱিক ছাবমেৰিন নিয়োগ কৰাৰ প্ৰভাৱ এয়া নহয়।

কিন্তু ট্ৰাম্পৰ এই পদক্ষেপক লৈ ৰাছিয়াই তীব্ৰ প্ৰতিক্ৰিয়া প্ৰকাশ কৰিছিল । লগতে আমেৰিকাক নিজৰ নৌসেনাৰ শক্তিৰ কথা সোঁৱৰাই দিছিল আৰু কৈছিল যে ইয়াৰ ফলাফল আমেৰিকাৰ বাবে বিপৰ্যয়জনক হ’ব পাৰে।

আমেৰিকাৰ চাপ বৃদ্ধি

ইউক্ৰেইনৰ বিৰুদ্ধে যুদ্ধবিৰতিৰ বাবে সন্মতি দিবলৈ আৰু যুদ্ধৰ অন্ত পেলোৱাৰ বাবে আলোচনা কৰিবলৈ আমেৰিকাৰ ৰাষ্ট্ৰপতি ড’নাল্ড ট্ৰাম্পৰ হেঁচাত পৰিছে পুটিন। এতিয়ালৈকে ট্ৰাম্পে কমেও তিনিটা যুদ্ধবিৰতিৰ প্ৰস্তাৱ দাখিল কৰিছে। ইউক্ৰেইনে এই সকলোবোৰ মানি লৈছে, আনহাতে পুটিনে এই সকলোবোৰ নাকচ কৰিছে।

জেলেনস্কিয়ে প্ৰত্যক্ষ আলোচনাৰ কথা কৈছে

দুয়োখন দেশৰ প্ৰতিনিধি দলে কেইবাবাৰো আলোচনাত মিলিত হৈছে যদিও তাৰ পৰা একো সমাধান ওলোৱা নাই। কেইবা সপ্তাহ ধৰি জেলেনস্কিয়ে ট্ৰাম্পৰ উপস্থিতিত পুটিনৰ সৈতে পোনপটীয়া বৈঠকৰ দাবী জনাই আহিছে।

পুটিনে এতিয়ালৈকে এনে প্ৰস্তাৱ নাকচ কৰিছে, কাৰণ জেলেনস্কিৰ সন্মুখত বহিলে তেওঁক ইউক্ৰেইনৰ নেতা হিচাপে বৈধতা প্ৰদান কৰা হ’ব আৰু তেওঁৰ যুদ্ধৰ এটা ডাঙৰ ভিত্তি শেষ হ’ব। পুটিনে ইউক্ৰেইনক স্বাধীন, সাৰ্বভৌম ৰাষ্ট্ৰ হিচাপে নস্যাৎ কৰিছে আৰু সেয়েহে জেলেনস্কিক বৈধ ৰাষ্ট্ৰপতি বুলি গণ্য নকৰে।