Nobel Prize 2025: ২০২৫ বৰ্ষৰ পদাৰ্থ বিজ্ঞানৰ ন’বেল বঁটা ঘোষণা

২০২৫ বৰ্ষৰ পদাৰ্থ বিজ্ঞানৰ ন'বেল বঁটা ঘোষণা

বিজ্ঞানী জন ক্লাৰ্ক, মিচেল এইচ ডেভ’ৰেট, জন এম মাৰ্টিনিছক আগবঢ়োৱা হ’ব ২০২৫ চনৰ পদাৰ্থ বিজ্ঞানৰ ন’বেল বঁটা। বৈদ্যুতিক বৰ্তনীত মেক্ৰস্কোপিক কোৱাণ্টাম মেকানিকেল টানেলিং আৰু শক্তি কোৱাণ্টাইজেচনৰ আৱিষ্কাৰৰ বাবে  এই তিনিজন বিজ্ঞানীক এই বঁটা প্ৰদান কৰাৰ সিদ্ধান্ত লৈছে ৰয়েল ছুইডিছ একাডেমী অৱ চাইন্সে।

দৰাচলতে এই বিজ্ঞানীসকলে হাতত ধৰিব পৰাকৈ ডাঙৰ বৈদ্যুতিক বৰ্তনীত কোৱাণ্টাম প্ৰভাৱ প্ৰদৰ্শন কৰিছিল। এই আৱিষ্কাৰটো কোৱাণ্টাম কম্পিউটিং, ক্ৰিপ্টোগ্ৰাফী, চেন্সৰৰ দৰে নতুন প্ৰযুক্তিৰ বিকাশৰ বাবে গুৰুত্বপূৰ্ণ।

উল্লেখ্য যে,  ২০২৪ চনৰ পদাৰ্থ বিজ্ঞানৰ ন’বেল বঁটা জন জে হপফিল্ড আৰু জিঅ’ফ্ৰে হিণ্টনক যৌথভাৱে কৃত্ৰিম স্নায়ু নেটৱৰ্কৰ জৰিয়তে মেচিন লাৰ্নিং সক্ষম কৰা মৌলিক আৱিষ্কাৰ আৰু উদ্ভাৱনৰ বাবে প্ৰদান কৰা হৈছিল। ২০২৪ চনৰ ৮ অক্টোবৰত ৰয়েল ছুইডিছ একাডেমী অৱ চাইন্সে এই বঁটা ঘোষণা কৰে।

হপফিল্ডে তথ্যত আৰ্হি সংৰক্ষণ আৰু পুনৰ্গঠন কৰিব পৰা এছ’চিয়েটিভ মেমৰি চিষ্টেম বিকশিত কৰিছিল, আনহাতে হিণ্টনে বল্টজমেন মেচিনসমূহক অনুকূল কৰি মেচিন লাৰ্নিঙৰ ভেটি স্থাপন কৰিছিল। এই বঁটাৰ জৰিয়তে এআই আৰু স্নায়ু নেটৱৰ্কৰ বিকাশৰ ক্ষেত্ৰত তেওঁলোকৰ অৱদানক স্বীকৃতি দিয়া হয়।

ন’বেল বঁটা কি?

২০২৫ চনৰ ১০ ডিচেম্বৰত এই বঁটাসমূহৰ প্ৰতিষ্ঠাপক আলফ্ৰেড ন’বেলৰ মৃত্যু বাৰ্ষিকীত এইবাৰৰ নোবেল বঁটা প্ৰদান অনুষ্ঠান অনুষ্ঠিত হ’ব। ন’বেল আছিল ছুইডেনৰ এজন ধনী উদ্যোগপতি আৰু ডাইনামাইটৰ উদ্ভাৱক। ১৮৯৬ চনৰ এই দিনটোতে তেওঁৰ মৃত্যু হয়।মৃত্যুৰ পূৰ্বে ১৮৯৫ চনৰ উইলত ন’বেল এই বাৰ্ষিক বঁটাসমূহৰ বাবে ধনৰ বাবে নিজৰ সম্পত্তিৰ এক বৃহৎ অংশ এৰি থৈ যায়।

১৯০১ চনত পদাৰ্থ বিজ্ঞান, ৰসায়ন বিজ্ঞান, চিকিৎসা বিজ্ঞান, সাহিত্য, শান্তিৰ ক্ষেত্ৰত অসাধাৰণ কৃতিত্বৰ বাবে প্ৰথম ন’বেল বঁটা প্ৰদান কৰা হয়। ইয়াৰ পিছত ১৯৬৮ চনত ছুইডেনৰ কেন্দ্ৰীয় বেংক স্বেৰিজেছ ৰিক্সবেংকে আলফ্ৰেড নোবেলৰ স্মৃতিত অৰ্থনৈতিক বিজ্ঞানৰ ন’বেল বঁটা ঘোষণা কৰে আৰু ইয়াৰ শিতানসমূহ ছটালৈ সম্প্ৰসাৰিত কৰে।