কামৰ মাজতে চাহ খাবলৈ গৈছিল ! ১১ কোটি টকা জৰিমনা ভৰিলে দুজন চিকিৎসকে

প্ৰতীকী ফটো

কামৰ মাজতে প্ৰতিগৰাকী কৰ্মচাৰীয়ে বিৰতি লাভ কৰে । কিছুমান কাৰ্যালয়ত বিৰতিৰ সময় নিৰ্ধাৰণ কৰা থাকে আৰু কিছুমানত সুবিধা অনুসৰি কৰ্মচাৰীয়ে বিৰতি লয় । কিন্তু এই ধৰণৰ বিৰতিৰ বাবেই দুগৰাকী কৰ্মচাৰীয়ে জৰিমনা ভৰিল ১১ কোটি টকা । শুনাত আচৰিত লাগিলেও প্ৰকৃতে এই ঘটনা সত্য । বিশেষকৈ দুগৰাকী চিকিৎসকৰ সৈতে এই ঘটনা সংঘটিত হৈছে । কামৰ মাজত চাহ খাবলৈ যোৱাৰ বাবে শাস্তি হিচাপে ১১ কোটি টকা জৰিমনা ভৰিব লাগিব চিকিৎসক দুজনে ।

এই ঘটনা মালয়েছিয়াৰ। সেই দেশৰ আদালতে চিকিৎসালয়ত এগৰাকী গৰ্ভৱতী মহিলাৰ মৃত্যুৰ গোচৰত দুগৰাকী চিকিৎসকক শাস্তি প্ৰদান কৰে। ২০১৯ চনত সংঘটিত হৈছিল এই ঘটনা। চিকিৎসালয়ত দ্বিতীয় সন্তান জন্ম দিওঁতে মৃত্যু হয় এগৰাকী মাতৃৰ। প্ৰাথমিক অনুসন্ধানত জানিব পৰা মতে, শৰীৰৰ পৰা অত্যধিক ৰক্তক্ষৰণৰ বাবেই তেওঁৰ মৃত্যু হয়।

আৰক্ষীৰ সূত্ৰ অনুসৰি, তেওঁ যেতিয়া চিকিৎসালয়ত মৃত্যুৰ যন্ত্ৰণাত ভুগি আছিল, সেই সময়ত তেওঁৰ ৱাৰ্ডত কোনো চিকিৎসক উপস্থিত নাছিল। মাত্ৰ কেইগৰাকীমান নাৰ্ছ আছিল। কিন্তু, এনে ভয়ানক পৰিস্থিতি হাতে হাত ধৰি চম্ভালিবলৈ নাৰ্ছসকল একেবাৰে সক্ষম নাছিল। কপাহেৰে ৰক্তক্ষৰণ বন্ধ কৰিবলৈ চেষ্টা কৰিছিল যদিও শেষত তেওঁৰ জীৱন ৰক্ষা কৰাত ব্যৰ্থ হৈছিল। মাতৃৰ গৰাকীৰ মৃত্যু হয়।

ইফালে মালয়েছিয়াৰ আদালতে এই গোচৰত শুনানি গ্ৰহণ কৰে। চিকিৎসক দুজনক মুঠ ১১ কোটি টকাৰ জৰিমনা বিহিছে ন্যায়াধীশে। ন্যায়াধীশে কয় যে, মাতৃ গৰাকীয়ে মৃত্যু সৈতে যুঁজি থকাৰ সময়ত ৱাৰ্ডত চিকিৎসক দুজনৰ কোনো এজনো উপস্থিত নাছিল। যাৰ বাবে তেজ ওলোৱাৰ বিষৰ বাবে মাতৃ গৰাকীৰ মৃত্যু হয়। ৱাৰ্ডত কৰ্মৰত নাৰ্ছসকলে মাতৃ গৰাকীৰ জীৱন বচাবলৈ চেষ্টা কৰিছিল, কিন্তু চিকিৎসকৰ অভাৱত তেওঁলোক ব্যৰ্থ হয়।