ইৰাণত মৃত্যু ভয়, পাৰমাণৱিক ঘাটিত হৈছে বিকিৰণৰ দাবী

নেতান্যাহু আৰু খামেনেই

ইৰাণৰ পাৰমাণৱিক কেন্দ্ৰত ইজৰাইলৰ শক্তিশালী আক্ৰমণৰ পিছত প্ৰতি মুহূৰ্ততে দেশখনৰ দুৱাৰত টোকৰ মাৰিছে মৃত্যুৱে। যদিও ইৰাণে পাৰমাণৱিক বিকিৰণৰ ঘটনাক অস্বীকাৰ কৰিছে, তথাপিও আন্তঃৰাষ্ট্ৰীয় পাৰমাণৱিক শক্তি সংস্থাই ৰাষ্ট্ৰসংঘক দিয়া তথ্যই ভয়ংকৰ বিপদৰ আগজাননী বহন কৰিছে।

ইজৰাইলে এদিন পূৰ্বে ইৰাণৰ নাটাঞ্জ পাৰমাণৱিক কেন্দ্ৰত আক্ৰমণ চলাইছিল। ইৰাণে কৈছিল যে এই আক্ৰমণ কেৱল উপৰিভাগতহে হৈছে আৰু ইয়াৰ বাবে পাৰমাণৱিক বিকিৰণ হোৱাৰ কোনো সম্ভাৱনা নাই। কিন্তু এতিয়া আন্তঃৰাষ্ট্ৰীয় পাৰমাণৱিক শক্তি সংস্থাৰ মুৰব্বী ৰাফেল গ্ৰ’ছিয়ে ইৰাণৰ এই মিছা দাবী উদঙাই দিছে। তেওঁ ৰাষ্ট্ৰসংঘক জনাইছে যে ইৰাণৰ পাৰমাণৱিক কেন্দ্ৰটোত ইজৰাইলে আক্ৰমণ কৰাৰ পিছত বাহ্যিকভাৱে নহ’লেও আভ্যন্তৰীণভাৱে পাৰমাণৱিক বিকিৰণ ঘটিছে।

আই এ ই এৰ মুৰব্বী গ্ৰ’ছিয়ে কি ক’লে?
আই এ ই এৰ মুৰব্বী গ্ৰ’ছিয়ে কয় যে ইজৰাইলে ইৰাণৰ নাটাঞ্জ পাৰমাণৱিক কেন্দ্ৰত আক্ৰমণ কৰি ইয়াৰ ওপৰৰ অংশ ধ্বংস কৰিছে। এই আক্ৰমণে মাটিৰ তলত জমা হৈ থকা ইউৰেনিয়াম সম্ভাৰৰ কোনো ক্ষতি কৰাৰ সম্ভাৱনা নাই যদিও সেই স্থানত পাৰমাণৱিক বিকিৰণ আৰম্ভ হৈছে। তেওঁৰ মতে, এই আক্ৰমণত বিদ্যুৎ যোগান প্ৰভাৱিত হৈছে, চেণ্ট্ৰিফিউজসমূহ প্ৰভাৱিত হোৱাটো সম্ভৱ আৰু সেইবাবেই লিকেজ হৈছে।

বিকিৰণ নিয়ন্ত্ৰণ কৰিব পাৰিব
আই এ ই এয়ে কয় যে এই বিকিৰণ এতিয়াও নাটাঞ্জ পাৰমাণৱিক কেন্দ্ৰৰ বাহিৰলৈ যোৱা নাই যদিও আভ্যন্তৰীণভাৱে ই ক্ৰমাগতভাৱে বৃদ্ধি পাইছে। অৱশ্যে গ্ৰ’ছিয়ে কয় যে যদি এতিয়াই উপযুক্ত ব্যৱস্থা কৰা হয়, তেন্তে ইয়াৰ বিপদৰ পৰা হাত সাৰিব পৰা যাব। তেওঁ আই এ ই এৰ ব’ৰ্ড অৱ গৱৰ্ণৰক কয় যে তেওঁ সকলো পক্ষকে সংযম হ’বলৈ কৈছে। গ্ৰ’ছিয়ে কয় যে যদি এনে কাৰ্য অব্যাহত থাকে তেন্তে ইৰাণৰ বাবে ইয়াৰ গুৰুতৰ পৰিণতি হ’ব পাৰে।

ইজৰাইলে আৰম্ভ কৰিছিল ৰাইজিং লায়ন অভিযান
ইৰাণৰ পাৰমাণৱিক প্লাণ্ট ধ্বংস কৰিবলৈ ইজৰাইলে ৰাইজিং লায়ন অভিযান আৰম্ভ কৰিছিল। এই অভিযানৰ উদ্দেশ্য হৈছে ইৰাণৰ পাৰমাণৱিক কাৰ্যসূচীক গতিপথৰ পৰা নমাই অনা। এই অভিযানৰ অধীনত ইৰাণৰ বহু পাৰমাণৱিক আৰু সামৰিক স্থানত আক্ৰমণ কৰা হয়। ইজৰাইল সেনাৰ তথ্য অনুসৰি এই আক্ৰমণ সংঘটিত কৰিবলৈ ২০০ৰো অধিক যুদ্ধ বিমান নিয়োগ কৰা হৈছিল। এই আক্ৰমণত আই আৰ জি চিৰ কমাণ্ডাৰ হুছেইন চালামী আৰু খামেনেইৰ মুখ্য উপদেষ্টা আলী ছামখানীও নিহত হয়।

ইৰাণৰ পাৰমাণৱিক শক্তি সংস্থাই কোনো ধৰণৰ লিকেজ হোৱা নাই বুলি দাবী কৰিছে, ইৰাণৰ মুখপাত্ৰ বেহৰুজ কামালভাণ্ডীয়ে কয় যে সকলো ঠিকেই আছে আৰু অতি সোনকালে ইয়াৰ কাৰ্যকলাপ পুনৰ আৰম্ভ হ’ব। অৱশ্যে গ্ৰ’ছিয়ে কয় যে ইৰাণৰ বিষয়াসকলে বহু পাৰমাণৱিক কেন্দ্ৰ ক্ষতিগ্ৰস্ত হোৱাৰ বাতৰি প্ৰকাশ কৰিছে। লগতে এই ঘটনা অতি চিন্তনীয় বুলিও তেওঁ কয়। কোনো কাৰণতে কোনো দেশৰ পাৰমাণৱিক সুবিধাসমূহক লক্ষ্য কৰি লোৱা উচিত নহয়।