চীনৰ সৈতে হাত মিলোৱাৰ চেষ্টা! ঢাকাই বিনিয়োগ কৰিব বিচাৰিছে ৬০০ কোটি টকা

ঢাকাত নিৰ্মাণ হ’ব ড্ৰ’ন কাৰখানা। বেইজিঙৰ সৈতে চুক্তি স্বাক্ষৰ কৰিব বিচাৰিছে। এইবাৰ ইউনুছৰ অন্তৱৰ্তীকালীন চৰকাৰে নিজৰ বায়ু প্ৰতিৰক্ষাৰ স্বাৰ্থত এই পদক্ষেপ ল’বলৈ ওলাইছে। প্ৰথম পাকিস্তান, এতিয়া চীন। এই দুখন দেশ ঢাকাৰ দুটা স্তম্ভ হৈ পৰিছে। অৱশ্যে নিৰ্বাচনৰ পূৰ্বে এই চুক্তি স্বাক্ষৰিত হ’ব নে নহয় সেয়া এতিয়াও জানিব পৰা হোৱা নাই।

বাংলাদেশৰ সংবাদ মাধ্যম দ্য বিজনেছ ষ্টেণ্ডাৰ্ডত প্ৰকাশিত এক বাতৰি অনুসৰি, বাংলাদেশৰ ভিতৰতে সামৰিক ড্ৰ’ন কাৰখানা স্থাপনৰ বাবে চীনৰ সৈতে চৰকাৰৰ পৰা চৰকাৰলৈ (জি টু জি) চুক্তি স্বাক্ষৰ কৰাৰ পৰিকল্পনা কৰিছে ঢাকাই। চুক্তিখন আনুষ্ঠানিকভাৱে স্বাক্ষৰ কৰাৰ পূৰ্বে ৬ জানুৱাৰীত বাংলাদেশৰ বিত্ত মন্ত্ৰালয়ে এই প্ৰকল্পৰ প্ৰস্তাৱত অনুমোদন জনায়।

অন্তৱৰ্তীকালীন চৰকাৰৰ নীতি অনুসৰি বিত্ত মন্ত্ৰালয়ৰ অনুমোদনৰ পিছত চুক্তিৰ প্ৰস্তাৱত মুখ্য উপদেষ্টা মহম্মদ ইউনুছে অনুমোদন দিব লাগিব। কিন্তু এতিয়ালৈকে তেওঁ অনুমোদন দিছে নে নাই সেয়া জানিব পৰা হোৱা নাই। জানিব পৰা মতে, ইউনুছৰ অন্তৱৰ্তীকালীন চৰকাৰে এই প্ৰকল্পৰ বাবে মুঠ ৬০৮ কোটি ৮ লাখ টকা আবণ্টন দিছে। ইয়াৰে অন্তৱৰ্তীকালীন চৰকাৰে ড্ৰ’ন প্ৰযুক্তি আমদানি আৰু এটা কাৰখানা নিৰ্মাণৰ বাবে মুঠ ৫৭০ কোটি টকা ব্যয় কৰিব।

বাকী ৩৭ কোটি টকা কাৰখানা খোলাৰ চাৰ্জ, ভেট আৰু ছুইফ্ট চাৰ্জত ব্যয় কৰা হ’ব। শনিবাৰে বিত্ত উপদেষ্টা চালাহুদ্দিন আহমেদক এই নতুন কাৰখানা প্ৰকল্পৰ বিষয়ে সোধা হৈছিল। কিন্তু এই প্ৰসংগত উপদেষ্টাগৰাকীয়ে চীনৰ কথা উল্লেখ কৰা নাছিল। তেওঁৰ মতে, ‘নতুন প্ৰযুক্তি আৰু ড্ৰ’ন আমদানি কৰাৰ চিন্তা-চৰ্চা চলি আছে। যুদ্ধ বিমান ক্ৰয়ৰ ক্ষেত্ৰতো আলোচনা চলি আছে। কিন্তু কোনখন দেশৰ পৰা কিনিব আৰু কিমান কিনিব সেই সন্দৰ্ভত কোনো চূড়ান্ত সিদ্ধান্ত লোৱা হোৱা নাই।’