গাজাত শান্তি স্থাপনৰ বাবে প্ৰধানমন্ত্ৰী মোদীক নিমন্ত্ৰণ ট্ৰাম্পৰ, যোগদান কৰিব নে ভাৰতে?

প্ৰধানমন্ত্ৰী মোদীক নিমন্ত্ৰণ ট্ৰাম্পৰ

মার্কিন ৰাষ্ট্রপতি ড’নাল্ড ট্রাম্পে প্রধানমন্ত্রী নৰেন্দ্র মোদীক গাজাৰ বাবে প্রতিষ্ঠিত আন্তর্জাতিক সংস্থা ব’র্ড অফ পিচ ফৰ গাজাত যোগদান কৰিবলৈ আমন্ত্রণ জনাইছে ৷ ব’ৰ্ডৰ উদ্দেশ্য হৈছে গাজাত শান্তি, পুনৰ্গঠন, আৰু নতুন শাসন ব্যৱস্থাক আগুৱাই নিয়া। ট্ৰাম্পৰ ২০ দফীয়া শান্তি পৰিকল্পনাৰ দ্বিতীয় পৰ্যায়ৰ অংশ হিচাপে ১৫ জানুৱাৰীত এই ব’ৰ্ড ঘোষণা কৰা হৈছিল।

ব’ৰ্ডৰ প্ৰধান কাম হৈছে গাজাক অস্ত্ৰমুক্ত কৰা, মানৱীয় সাহায্য প্ৰদান কৰা, ধ্বংসপ্ৰাপ্ত আন্তঃগাঁথনি পুনৰ নিৰ্মাণ কৰা আৰু কাৰিকৰী পেলেষ্টাইন প্ৰশাসন স্থাপন কৰা। এই প্ৰশাসনৰ তদাৰক কৰিব NCAG (National Committee for the Administration of Gaza)-এ। যাৰ নেতৃত্বত থাকিব পেলেষ্টাইনৰ প্ৰাক্তন বিষয়া আলী শ্বাথে।

এইখনেই এতিয়ালৈকে সৰ্বশ্ৰেষ্ঠ ব’ৰ্ড: ট্ৰাম্প

ট্ৰাম্পে ইয়াক এতিয়ালৈকে সৰ্বশ্ৰেষ্ঠ আৰু প্ৰতিষ্ঠিত ব’ৰ্ড বুলি অভিহিত কৰে। ব’ৰ্ডৰ প্ৰতিষ্ঠাপক কাৰ্যবাহী সমিতিৰ ভিতৰত আছে আমেৰিকাৰ বিদেশ মন্ত্ৰী মাৰ্কো ৰুবিঅ’, ব্ৰিটিছৰ প্ৰাক্তন প্ৰধানমন্ত্ৰী টনি ব্লেয়াৰ, ট্ৰাম্পৰ জোঁৱাই আৰু উপদেষ্টা জেৰেড কুছনাৰ, ট্ৰাম্পৰ বিশেষ দূত ষ্টিভ উইটকফ, বিশ্ব বেংকৰ সভাপতি অজয় ​​বাংগা, কোটিপতি ব্যৱসায়ী মাৰ্ক ৰ’ৱান, উপদেষ্টা ৰবাৰ্ট গেব্ৰিয়েল। ট্ৰাম্পৰ মতে, এই ব’ৰ্ডখন নতুন আন্তঃৰাষ্ট্ৰীয় সংস্থা আৰু সংক্ৰমণকালীন চৰকাৰ হিচাপে গঠন কৰা হ’ব। ইয়াৰ প্ৰধান কাম হ’ব শাসন ব্যৱস্থা উন্নত কৰা, গাজা পুনৰ নিৰ্মাণ কৰা আৰু অৰ্থনৈতিক বিনিয়োগৰ জৰিয়তে শান্তি অনা।

এই সপ্তাহত ঘোষণা কৰা হ’ব ব’ৰ্ডৰ সদস্য

আমেৰিকাৰ দূতাবাসৰ এজন বিষয়াই ১৬ জানুৱাৰীত প্ৰকাশ কৰিছিল যে ট্ৰাম্পে NCAG গঠনৰ কথা ঘোষণা কৰিছে। তেওঁ লগতে কয় যে অনাগত সপ্তাহত কাৰ্যবাহী ব’ৰ্ড আৰু গাজাৰ কাৰ্যবাহী ব’ৰ্ডৰ অতিৰিক্ত সদস্য ঘোষণা কৰা হ’ব।

গাজাৰ উচ্চ প্ৰতিনিধি হিচাপে নিযুক্তি পোৱা ব’ৰ্ডখনৰ অধ্যক্ষ হ’ব ৰাষ্ট্ৰসংঘৰ মধ্যপ্ৰাচ্যৰ প্ৰাক্তন দূত নিকোলাই ম্লাডেনৱে। গাজাৰ এখন সুকীয়া কাৰ্যবাহী ব’ৰ্ডো গঠন কৰা হৈছে। ইয়াৰ ভিতৰত আছে তুৰ্কীৰ বৈদেশিক মন্ত্ৰী হাকান ফিডান, ইউ এ ইৰ মন্ত্ৰী ৰিম আল হাছিমি, কাটাৰৰ কূটনীতিবিদ আলী আল থাৱাদী, আৰু অন্যান্য আঞ্চলিক প্ৰতিনিধি। ইয়াৰ দ্বাৰা আমেৰিকাৰ নেতৃত্বৰ প্ৰতি আৰব দেশসমূহৰ দায়বদ্ধতাও প্ৰমাণিত হৈছে।

 কোন কোন নেতাক নিমন্ত্ৰণ কৰা হৈছে?

গাজা ব’ৰ্ড অৱ পিছলৈ বিশ্বৰ কেইবাজনো নেতাক আমন্ত্ৰণ জনাইছে ট্ৰাম্পে। আৰ্জেণ্টিনাৰ ৰাষ্ট্ৰপতি জেভিয়াৰ মিলীয়ে ৰাজহুৱাভাৱে এই আমন্ত্ৰণ গ্ৰহণ কৰি ইয়াক সন্মান বুলি অভিহিত কৰে। কানাডাৰ প্ৰধানমন্ত্ৰী মাৰ্ক কাৰ্নি, তুৰ্কীৰ ৰাষ্ট্ৰপতি ৰেচেপ টাইপ এৰদোগান, ইজিপ্তৰ ৰাষ্ট্ৰপতি আব্দেল ফাত্তাহ আল চিছিকো আমন্ত্ৰণ জনোৱা হৈছে। পাকিস্তানৰ বৈদেশিক মন্ত্ৰালয়ে প্ৰকাশ কৰিছে যে প্ৰধানমন্ত্ৰী শ্বাহবাজেও ইয়াৰ বাবে নিমন্ত্ৰণ লাভ কৰিছে। এই সপ্তাহত অনুষ্ঠিত হ’বলগীয়া বিশ্ব অৰ্থনৈতিক মঞ্চতো গাজা শান্তি ব’ৰ্ডৰ ওপৰত গুৰুত্বপূৰ্ণ আলোচনা হ’ব বুলি আশা কৰা হৈছে।