কোন এই আলেকজেণ্ডাৰ ৱাং? যাক ১.১৬ লাখ কোটি টকাত নিয়োগ কৰিছে Meta ই

শেহতীয়াকৈ Meta ৰ চিইঅ’ মাৰ্ক জুকাৰবাৰ্গে ২৮ বছৰীয়া কোটিপতি আলেকজেণ্ডাৰ ৱাঙক কোম্পানীটোৰ নতুন AI চীফ হিচাপে নিযুক্তি দিছে। Meta ই তেওঁৰ ষ্টাৰ্টআপত প্ৰায় ১৪ বিলিয়ন ডলাৰ (১.১৬ লাখ কোটি টকা) বিনিয়োগ কৰাৰ পিছত এই নিযুক্তি দিয়া হৈছে। এতিয়া ৱাঙে Metaৰ সৰ্ববৃহৎ AI প্ৰজেক্ট ছুপাৰ ইণ্টেলিজেন্স লেবছৰ নেতৃত্ব দিব, যাৰ লক্ষ্য হৈছে মানুহৰ দৰে বুদ্ধিমত্তাৰে ব্যৱস্থা সৃষ্টি কৰা।

Metaৰ নতুন AI চীফ আলেকজেণ্ডাৰ ৱাং

নিউ মেক্সিকোৰ নাগৰিক আলেকজেণ্ডাৰ ৱাঙে এতিয়া Metaৰ সামগ্ৰিক AI প্ৰগ্ৰেমৰ নেতৃত্ব দিছে। কোম্পানীটোৰ ছুপাৰ ইনটেলিজেন্স লেবৰ মুখ্য স্থপতি আৰু AI অপাৰেচনৰ মুৰব্বী হিচাপে নিযুক্তি দিয়া হৈছে ৱাঙক। কোম্পানীটোৰ AI গৱেষণা আৰু বিকাশ ত্বৰান্বিত কৰিবলৈ Metaই তেওঁক চলিত বৰ্ষৰ আৰম্ভণিতে নিযুক্তি দিছিল। এই পদক্ষেপ গুগল, মাইক্ৰ’ছফ্ট, আৰু অ’পেন AIৰ দৰে কোম্পানীসমূহৰ সৈতে প্ৰতিযোগিতাত অৱতীৰ্ণ হোৱাৰ বাবে Metaৰ কৌশলৰ অংশ।

১৯ বছৰ বয়সত আৰম্ভ কৰিছিল স্কেল AI, ২০ বছৰ বয়সত কোটিপতি

আলেকজেণ্ডাৰ ৱাঙে ২০১৬ চনত ১৯ বছৰ বয়সত নিজৰ ষ্টাৰ্টআপ স্কেল AI আৰম্ভ কৰিছিল। সেই সময়ত তেওঁ আৰু তেওঁৰ সংগী লুচি গুওৱে ছিলিকন ভেলীত ষ্টাৰ্টআপ এক্সিলেটৰ প্ৰগ্ৰেমত নামভৰ্তি কৰিছিল। আনকি তেওঁলোকে কলেজ (MIT) বাদ দি নিজৰ ষ্টাৰ্টআপ গঢ়ি তুলিছিল। আজি স্কেল AI বিশ্বৰ অন্যতম আগশাৰীৰ ডাটা লেবেলিং আৰু AI প্ৰশিক্ষণ প্লেটফৰ্ম, যাৰ মূল্য ১৪ বিলিয়ন ডলাৰ। কোম্পানীটোৱে গিগ ৱৰ্কাৰৰ জৰিয়তে প্ৰধান টেক কোম্পানীসমূহক প্ৰশিক্ষণৰ তথ্য প্ৰদান কৰে। এনভিডিয়া, আমাজন, আৰু এতিয়া Meta ইয়াৰ প্ৰধান বিনিয়োগকাৰীৰ ভিতৰত অন্যতম।

Meta ই আৰম্ভ কৰিলে AI ষ্ট্ৰাকচাৰ ডাঙৰ পৰিৱৰ্তন

ব্লুমবাৰ্গৰ এক প্ৰতিবেদন অনুসৰি Metaত যোগদান কৰাৰ পিছত আলেকজেণ্ডাৰ ৱাঙে কোম্পানীটোৰ AI দলটোক সম্পূৰ্ণৰূপে চাৰিটা গোটত পুনৰ সংগঠিত কৰে। তেওঁ এখন আভ্যন্তৰীণ স্মাৰকপত্ৰত লিখিছে, “ছুপাৰ ইনটেলিজেন্স আহি আছে। ইয়াক লাভ কৰিবলৈ আমি গৱেষণা, প্ৰডাক্ট, আন্তঃগাঁথনিৰ দৰে ক্ষেত্ৰত গুৰুত্বসহকাৰে কাম কৰিব লাগিব।” এতিয়া তেওঁৰ গুৰুত্ব হৈছে Metaৰ দীৰ্ঘম্যাদী AI কৌশল আৰু অধিক উন্নত কৰা, যাতে কোম্পানীটোৱে ভৱিষ্যতৰ AI পৰিৱেশ তন্ত্ৰত আগশাৰীৰ খেলুৱৈ হ’ব পাৰে।

চীনত শিপাই থকা পৰিয়াল আৰু ছিলিকন ভেলীৰ সৈতে গভীৰ সম্পৰ্ক

আলেকজেণ্ডাৰ ৱাঙৰ পৰিয়ালটো মূলতঃ চীনৰ। তেওঁৰ পিতৃ-মাতৃ পদাৰ্থবিজ্ঞানী আছিল আৰু ৱাঙে সৰুৰে পৰা গণিত আৰু ক’ডিঙৰ প্ৰতি আগ্ৰহ প্ৰকাশ কৰিছিল। কেৱল ছিলিকন ভেলীতে নহয়, অ’পেনAI ৰ ছেম অল্টমেন আৰু আমেৰিকাৰ সাংসদসকলৰ সৈতেও তেওঁ শক্তিশালী সম্পৰ্ক গঢ়ি তুলিছে। AI জগতত এতিয়া তেওঁক Metaৰ AI গেম চেঞ্জাৰ বুলি কোৱা হৈছে, যিটো কোম্পানীটোক ছুপাৰ ইনটেলিজেন্সৰ দিশত আগুৱাই নিয়া অন্যতম মূল মন্ত্ৰ।